TERUS IDUP ENGGAU KRISTUS – Bagian 7

Bekelala enggau Roh Tuhan – Bagian 2

Dalam Epesus 1:13 madah ka kitai udah di kelaie tauka di cap ulih Roh Kudus. Ati penoh enggau pengerindu laban udah di kelaie Tuhan, laban nya meh nanda ka kitai tu di-empu Iya.

1.      Baca 2 Korint 1:21-22 Iya nya Allah Taala empu ti udah negap ka pendiau kami sama enggau kita mega besaum dalamKristus; iya nya Allah Taala empu ti udah ngiri kitai enggau Roh Kudus. Iya mega ti udah ngechap kitai kena nanda ka kitai amat enggi iya, lalu udah meri Roh Kudus ka dalam ati kitai kena netap samoa utai ti udah ditaroh iya ka kitai.

(S) sapa ti ngechap tanda iya nya kitai tu enggi Iya empu?

(J) Tuhan Allah Apai.

Tuhan nya satu. Enti kitai nerima Jesus dalam pengidup kitai, nya reti iya kitai mega udah nerima Tuhan Allah Apai enggau Roh Tuhan. Nya alai diatu kitai udah bisi Tuhan Triniti dalam hidup kitai.

Tang kitai nemu ari Bup Kudus kitai bisi madah Roh Tuhan ngereja ka dua bengkah pengawa ngagai bala orang Kristen.

a)      Iya nyaup kitai ngubah pendiau kitai nyadi orang Kristen ti lurus.

b)      Iya meri kitai pemeri kuasa Roh (Kereja Roh)

Kitai deka bejurai ka pengawa senentang dalam bab tu.

Roh Tuhan deka ngasoh kitai diau dalam pendiau sama baka Jesus iya nya deka ngasoh kitai ngasil ka Buah Roh Tuhan dalam kitai. Buah nya bisi sangkut enggau pendiau, atur jako, sereta enggau kaul kitai enggau orang bukai.

2.      Baca Galatia 5:22-23. Beri sembilan nama buah pendiau kitai ti bisi dalam genteran nya tadi.

i)                    Pengerindu

ii)                  Pengaga

iii)                Pemaik

iv)                Pengeliat ati

v)                  Penelap

vi)                Pemadas

vii)              Penalok

viii)            Pemaroh ati

ix)                Nagang tuboh diri

3.      (S) Diatu baca John 15:5”Aku tu pun anggor, kita dan iya. Barang sapa ti mengkang dalam aku, lalu aku dalam iya, deka bebuah lebat; laban kita enda ulih ngereja utai enti enda kategal aku.” Nama kunci kena kitai ngasil ka buah pendiau tu?

(J) kitai mesti diau dalam Iya, lalau Iya dalam kitai (Jako Tuhan)

4.      (S) Baca Galatia 5:16 “Tu reti utai ko aku: awak ka Roh Kudus ngator pendiau kita, lalu anang nitih ka gaya pengidup mensia ti bedosa ari asal.” Nama utai patut dikereja ka kitai enti deka diau idup tuchi?

(J) Kitai hidup ulih Roh (Enggau nunda ke teladan buah Roh)

5.      Baca Galatia 5:22-23 Tang Roh Kudus ngada ka buah pengerindu, pengaga, pemaik, pengeliat ati, penelap, pemadas, penalok, pemaroh ati enggau runding ti ulih nagang tuboh diri. Nadai adat ti ngelaban utai nya. Lalu bisi kah utai tu bebuah dalam kita? Tauka nadai?

Saut diri empu.

Genteran ti tau di kingat

John 15:5