Penerang pasal blog tu

Mayuh bala kaban aku nanya aku. Nuan jang ngari ka gerija nama? Tang juluk ati aku nyaut, aku ukai ngari ka gerija tang aku ngari ka Jesus Kristus. Ko aku nyaut sida, "Barang alai endur aku sembiang - seagi nama Jesus Kristus di kena orang ngajar dalam gerija nya, dia alai aku; sereta Bup Kudus ti nyadi ka perintah dalam dunya tu, lalu Jako dalam nya meh di jadi ka aku teladan nyentok ka diatu lalu datai jemah ila."

Kati ko enggau jalai penyembahan iya enda sebaka enggau kitai deh, jang? ko sida nampung saut aku tadi. Ko aku nyaut baru, "kitai datai sembiang ukai deka belakon, mantai ke pendiau diri tauka nunjuk diri empu 'alim', tang kitai datai sembiang mai piring tuboh kitai empu ti di enjok kitai ngagai Jesus, nyadi tu meh reti penyembahan. Enggau ATI TI BAROH sereta ATI TUCHI aja diterima Kristus leboh sembiang."

Tuju blog tu digaga aku ka bendar iya kena aku mai bala anembiak kitai ka rebak diatu bekelala enggau Kristus. Ajar dalam blog tu chukop senang di kingat. Ba lumpar 'discipleship' tauka nyadi murid Kristus aku bisi ngajar asas tauka permulaan kitai berengkah deka nemu pengarap Kristen. Ka terubah aku madah, aku tu ukai orang ka 'preach in public' tang aku nguna blog writing aku kena aku bekunsi ka penemu enggau bala pemacha semoa.

Engka kita ka nemu nama kebuah aku meri nama blog tu 'Gospel Youth Ministry'. Aku ka nerang ka aku tu... nadai kaitan enggau gerija gospel! Aku milih leka jako gospel nya laban reti iya injil jako pinjau kitai. Lalu nguna injil mega aku ngajar doktrin Kristus dalam blog tu. Nyadi reti Youth nya kena aku mission ngagai bala anembiak ti rindu deka betuai ka Kristus lalu aku enggau bala penulis ti di invite aku deka nyaup ngajar kitai pasal pengarap. Lalu diatu kami semoa nyadi siti Ministry ti ngajar pasal Bup Kudus enggau teologi pengarap.

Aku diatu agi ngiga orang mega ti deka bekunsi ka jako ajar lalu aku ka nyimpan iya awak rebak dudi ari ila tau belajar ka pengarap dalam blog tu. Fokus ka amat bala G.Y.M iya nya, deka ngerembai ka pengarap ba bansa kitai Iban.

Suah aku meda bala kitai Iban udah masuk Kristen, udah di baptisa, udah di tetap lalu lenyau enda natai ka diri ka gerija. Lalu enti bisi bala kitai ka anembiak tauka orang ti tuai deka negap ka diri dalam pengarap, aku minta kitai semoa nguna blog tu nyadi ka palan penemu mayuh. Awak ka tiap iko kitai ka macha iya ulih berekat sereta mansang tuai dalam pengarap.

Tu jako peransang aku ngagai bala mayuh, enti kitai ngumbai diri orang Kristen, kitai semampai deka belajar nambah ka penemu diri dalam Kristus. Taja kita enda mayuh ngereja ka pengawa Tuhan baka ka diatu, aku minta secara belubah kitai belajar talok ka iya.

Blog tu nguna tiga iti bansa jako, English, Melayu, enggau Iban. Tang batang bansa jako ka amat di kena ditu Iban. Jako English & Melayu nya semina penerang awak ka silik agi bala anembiak belajar. Laban anembiak ka rebak diatu enda entu mereti ka jako kitai Iban kelia. Nyadi aku enggau bala penulis blog bukai besetuju nguna jako ti mudah di temu ka rebak diatu.

Aku meri terima kasih ngagai Tuhan, laban aku nemu iya ti ngiring kita tama kitu belajar enggau kami semoa bejurai ka penemu Bup Kudus. Aku meri terima kasih mega ngagai kitai semoa ti udah nyaup enggau mantu aku bekereja ka pengawa tuhan ka lebih agi ngagai Revd. James Juhari ti mayuh meri jako ajar iya dalam blog tu.

Nyadi naka tu aja aku nangkir ka jako penerang aku pasal blog tu. Aku besampi tuhan deka merkat ka kita selalu. Amen.