Pengaga tauka Pengelantang ti Meruan

Bala menyadi dalam Kristus,

Pengelantang ati tu utai ti tusah bendar diulih. Kebuah aku madah iya tusah diulih, laban suah bendar kitai nguji ngiga pengelantang ba endur ti salah. Mayuh bendar kitai nyangka pengelantang datai ari utai ti dikembuan kitai tauka nyadi dalam dunya tu. Tang pengelantang ti disebut dalam Bup Kudus datai ari Roh Kudus – iya dikumbai buah Roh (Galatia 5:22-23). Pengelantang ti bansa tu enda bepanggai ba utai ti nyadi dalam dunya tu.

Kati ko kitai tau bulih pengelantang ti bansa tu? Ingat, tadi aku madah ka pengelantang tu buah Roh. Enti nuan deka tulih ka buah ti manah, nuan enda tau enda bisi pun kayu ti manah. Baka nya mega, enti nuan deka tulih ka pengelantang – nuan semina tau tulih ka iya ari asal ti manah – iya nya Allah Taala empu. Baka buah ti tau kena rusak indu utai tauka kulat, baka nya mega pengelantang kitai mensia. Nya alai pengelantang nya patut dijaga ari 3 iti utai:

(i) Ati ti enda nemu puas. Mensia suah enda tetemu ka pengelantang laban sida enda nemu tepantup tauka puas ati ba utai ti udah dikemisi sida. Orang ti semampai deka ngiga lebih endang enda nemu lantang. Nya alai jaku lalau Paul ba Pilipi 4:11-12 beguna bendar. Ko iya, “...Aku udah belajar enda tau enda tepantup ati enggau utai ti dikemisi diri. Aku nemu bakani asai lebuh nadai utai, enggau bakani lebuh utai mayuh sereta belaloh...”. Laban Paul udah tetemu ka rasia nya, nya alai nadai utai ulih ngerusak pengelantang iya.

(ii) Penyerekang ti enda nemu badu. Enti kitai semampai ingat ka penyai orang enggau kitai, kitai enda nemu lantang. Enti ati kitai penuh laban dengki, pengeringat enggau runding ti deka bebalas dendam – jaku Tuhan pen enda ulih tama ke dalam kitai. Uji bacha jaku ajar Hebrew 12:14-15. Nama utai ti ko iya dia? Laya ti mit-mit patut diputar ka sebedau iya nyadi penyerekang ti besai, laban enti kitai beserekang pengelantang kitai kena rusak.

(iii) Dosa ti enda diampun. Dosa ti dikerja kitai tau nyekat pengelantang. Nya alai enti kitai udah ngaga penyalah minta ampun ari Allah Taala. Iya deka ngampun dosa kitai nya, lalu pengelantang deka pulai baru.
Nama utai bukai ti patut dikerja kitai?

(i) Ingat ka Allah Taala nya Tuhan ti penuh pengaga enggau pengelantang. Enti nuan selalu enda lantang ati, reti nya nuan enda ngelala sapa Tuhan nuan. Uji bacha Sepaniah 3:17 awak ka nuan tau nemu nama runding Allah Taala pasal kitai ti arap ka iya? Tuhan bepantun gaga ati ka kitai, lalu gagit ati meda kitai. Lalu ngenang pasal pengaga Tuhan Nehemiah 8:10 nyebut: “Pengaga ti udah diberi Tuhan ka kita ngasuh kita kering.”

(ii) Selalu besambiang enggau ati gaga. Masmur 66:1-4 madah ka Tuhan gaga sereta rindu bendar meda utai ti udah digaga iya enggau anembiak iya. Selalu besambiang meri puji enggau terima kasih ngagai Tuhan: anang semina besambiang lebuh nuan tusah ati! Lebuh kitai besambiang enggau ati gaga, kitai malas pengaga Tuhan nya. Uji aku meri chunto: Maya konsert, penyanyi tauka pelakon merindang orang mayuh. Tang enti orang ti meda enda bemunyi, enda betempap jari, enda senyum, iya ti belagu tauka betanda pen enda lantang ati. Tuhan kitai ti kudus serta bekuasa endang Tuhan ti penuh pengaga – nya alai lebuh kitai besambiang kitai mesti ngayan ka pengaga – kena nimbal pengaga Tuhan.

(iii) Tanggam ka kaul nuan enggau orang Kristian bukai. Kitai Kristian enda ulih ngasai ka pengelantang ari Roh tu enti kitai nyerara diri ari orang Kristian bukai. Tu meh kebuah kitai datai ka gerija, besambiang, bekerja, belajar, bemain enggau orang Kristian bukai. Pengaga tu baka api ti makai arang. Uji enti nuan nunu arang datai ka iya angus magang; udah nya ambi nuan sigi arang ti udah mirah empa api lalu serara iya ari arang bukai. Enda lama api ba arang nya deka padam. Baka nya pengaga orang Kristian ti nyerara diri ari orang Kristian bukai.

(iv) Tusoi Berita Manah ngagai orang bukai. Ingat: nuan belajar lebuh nuan ngajar orang. Enti nuan deka nambah ka penemu, nuan patut magi naka penemu ti dikemisi nuan nya enggau orang bukai. Dia Tuhan deka nambah ka nuan penemu ti mayuh agi. (Peda cherita ba Luke 19: 11-27). Tu mega reti jaku dalam Bup Kudus: Iya ti meri lebih beberkat ari iya ti nerima.

(v) Serah ka semua penusah ngagai jari Tuhan. Pengelantang ti datai ari Tuhan enda ulih dirusak penusah, pemedis tauka penyuntok, laban pengelantang tu ukai utai ti digaga mensia tauka datai ari utai dunya. (Bacha cherita Paul seduai Silas ba Kereja Rasul 16). Lebuh seduai dalam jil, seduai enda besambiang ngagai Tuhan minta lepas: seduai ngena penusah nya endur nyembah sereta meri puji ngagai Tuhan. Kitai enda ulih ngaga pengelantang, tang kitai tau nyerah ka ka penusah ngagai Tuhan, lalu lebuh penusah nya diserah ngagai jari iya, Tuhan deka meri pengaga kena nganti iya.

(vi) Meruan semak enggau Tuhan Jesus. Bacha John 15:10-11. Enti kitai deka ka pengaga tauka pengelantang ti chukup sereta meruan, kitai enda patut nyerara diri ari Jesus. Ba John 15: 4 Jesus udah madah munyi tu: “Mengkang begempong dalam aku, lalu aku deka mengkang begempong dalam kita. Dan anggur enda tau bebuah kediri, tang iya tau bebuah enti iya mengkang begulai enggau batang. Baka nya mega kita enda tau bebuah ngapa, enti kitai enda mengkang dalam aku”.

Ingat: pengelantang ti bansa tu enda ulih gaga tauka tempa nuan, tauka digiga nuan ba sebarang endur (iya nadai dalam dadah, ai bisa tauka macham-macham pemerindang dunya) – iya semina datai ari kaul nuan enggau Tuhan Jesus aja. Lalu enti nuan ukai orang Kristian, ka mar mimit nuan mereti ka jaku tu. Tang tu utai ti amat udah diasai ka orang Kristian ti bebepegai tegap ba Tuhan Jesus.