Semua utai ti nguan Kebun Eden enda engkeretik ngemata ke pengawa tu. Menaul terbai musin endur nya. Girafa nuduk Kediri. Pun kayu ngenduk. Kesulai ngetu ingap ba bungai lalu ngemata ke pengawa nya.
“Nuan deka sayau ke Aku, dunya,” Ko Tuhan bejako. “Aku ti ngaga nuan bakanya. Nuan deka nitih ke jako Aku, seluruh bumi. Laban peneka Aku nuan digaga bakanya. Nuan deka manchar ke mulia Aku, langit, kategal nya meh nuan digaga. Tang siti tu deka sebaka enggau Aku. Siti tu deka ngembuan kuasa milih.”
Semua utai enda engkeretik magang lebuh Tukang Pengaga ngambi ari dalam diri Iya empu, lalu dikeluar ke Iya utai ti enda dipeda nya. Utai nya dikumbai, “Leka Pemilih”.
Tukang Pengaga bediri enda bebunyi lalu merening ngagai tanah liat ke enda benyawa nya tadi.
Lalu bejako siko Melikat, “Kati enti nyema iya...”
“Enti nyema iya enda milih pengerindu maksud nuan?” Ko Tukang Pengaga nya nampung jako Melikat nya tadi. “Am, Ku nunjuk ke nuan.” Tuhan enggau Melikat nya lalu ngemata ke nama te ka nyadi jemah ila. “Nya, bisi meda pun buah ari Leka Pemilih, dia bisi pemanis enggau pait iya.”
Melikat nya alit ati meda utai dipeda Iya. Pengerindu ti nyengala. Pemeri ti enda dipejal. Pengelembut ti dipilih. Nadai kala Iya udah meda utai bansa tu. Iya ulih ngasai ke pengerindu Adam. Iya ulih ninga pengaga Hawa enggau bala anak iya.
Iya meda utai dempa enggau penusah dikunsi sama. Iya ngasai lalu tenggelam ba pengagat pemanah.
“Serga nadai kala udah meda pemanah tu Tuhanku. Amai meh, tu utai ti digaga Nuan ke pemadu iya manah.”
“Ah, tang nuan semina meda pemanis iya aja. Diatu peda pait iya.” Tekala nya lalu pansut bau ti enda nyamai mungkus pasangan mensia nya. Melikat nya lalu malik enggau takut serta bejako,
“Nama utai bansa tu?”
Tukang Pengaga semina nyebut siti jako aja: “Kepapas.”
Melikat lalu bediri enda engkeretik lebuh seduai bejalai ngerencah masa. Enda kala iya meda pengamah bansa nya. Ati ti jai. Janji ti balang. Enda ngingat ke penalok. Mensia bejalai dalam pemetang nengah dunya pemati.
“Tu pengujung iya ari Leka Pemilih? Ko Melikat nanya.
“Ya.”
“Sida deka enda ingat ke Nuan?”
“Ya.”
“Sida deka ngenggai ke Nuan?”
“Ya.”
“Sida deka enda ngemulai kediri ngagai Nuan?”
“Sekeda deka. Tang mayuh ke enda.”
“Nama utai ti tau ngasuh sida ninga?”
Tukang Pengaga mansang bejalai ngerencah masa, jauh ngagai masa depan datai ke Iya bediri ba siti pun kayu. Kayu ti deka digaga nyadi palung. Maya nya pen Iya udah ulih ngensium bau rumput rangkai ngelinggi Iya.
Selangkah agik mansang ngagai masa depan, Iya berenti sebedau datai ba pun kayu siti dak. Pun nya bediri kediri dia, ba pucuk bulit. Urat iya tebal serta kayu nya bansa ti kering. Enda lama iya deka ditebang. Udah nya deka dipansap alus. Udah nya, kayu nya deka dibai ngagai siti bukit ti bebatu. Enggau nya Iya deka diregang diak.Iya ulih ngasai ke kayu nya ngansar belakang Iya taja maya nya bedau datai.
“Nama Nuan deka turun kebaruh pia?” Ko Melikat nanya baru.
“Auk.”
“Nama nadai cara bukai?”
“Nadai.”
“Kati enda senang agik enti enda nanam leka nya sekali? Enda ka lebih senang enti enda meri pemilih ngagai sida?”
“Amai,” ko Pengaga bejako belubah. “Tang meh enti nyema Aku muai pemilih nya tadi nyau sebaka enggau muai pengerindu.”
Iya berati ke seluruh bukit nya lalu meda utai ti deka nyadi ba masa depan. 3 iti tubuh dipeda Iya tegantung ba 3 iti kayu regang. Jari sida tebuka. Pala ngeruntuk ke mua. Sida demuh beserta angin. Bala lelaki ti ngena ngepan solsadu benung duduk ba tanah ngerimbai mensia 3 iko nya. Sida bemain ba tanah kamah serta ketawa.
Bala lelaki ti bekena ke ngepan pengarap bediri enda jauh ari nya. Sida senyum. Sumbong, jegak. Sida ngumbai diri udah nyaga Tuhan kategal ti ngumbai diri udah munoh iya ke palsu.
Sida ke indu benung tusah ati beberap pangan diri ba baruh kaki bukit. Enda tejaku kediri. Mua sida dibalut ai mata. Mata nyau layu. Siko ari sida meluk indu siko lalu nguji mai iya pulai. Indu nya enggai. “Aku ka nganti ditu,” ko iya nyaut lembut. “Aku ka nganti ditu.”
Semua bala serga angkat besedia deka beperang. Semua isi dunya angkat deka nyelamat. Semua utai ti idup meruan besedia deka ngelaban. Tang Tukang Pengaga nya enda mri pemendar.
“Utai tu mesti digaga...,” ko Iya, lalu ngundur diri.
Tang udah Iya tama ngagai maya nya, dia Iya ninga bunyi panjung ti deka dipansut ke Iya maya nya ila: “Tuhan ku, Tuhan ku, nama kebuah nuan ninggal ke aku?” Iya sebana ba penusah Iya maya nya.
Melikat nya bejako baru. “Utai tu deka kurang agi pemedis...”
Tukang Pengaga nya jampat nyaut iya enggau lembut. “Tang, enti bakanya, nadai pengerindu.”
Seduai tama ngagai Kebun nya baru. Tukang Pengaga nya itok meda tanah liat ke digaga Iya. Iya lalu ngasai ke pengerindu ti dalam malut Iya. Iya udah mati ke utai ti digaga Iya sebedau Iya meri pengidup ke tanah nya. Roh Tuhan lalu meremi semak mua cuan tanah liat nya lalu ngesuh ke seput Iya. Debu lalu tekesai ari mulut mensia nya. Dada iya lalu angkat, tanah mirah lalu merekah. Pipi iya lalu ngerembai. Jari berengkah engkebut. Lalu mata mensia pen tebuka.
Tang utai ti lebih nyelai ari tubuh ti engkebut nya ianya roh mensia nya empu. Utai ti ulih meda utai ti enda ulih dipeda alit ati. Engka angin ti dulu bejako. Engka utai ti dipeda bintang keterubah nya kini ngasuh iya mengkijap blama pengudah nya. Engka ungkup Melikat nelah utai nya betelai:
“Sebaka enggau...cukup sebaka enggau...nya IYA (Tuhan) empu!”
Melikat nya ukai bejako ke mua, pendiau tauka tubuh. Iya meda ke dalam – meda roh nya.
“Nya meruan!” ko sekeda nyaut.
Ba dalam mensia nya, Tuhan udah nanam leka ti kudus. Leka ari Iya empu (Leka Pemilih). Tuhan ti bekuasa udah ngaga dunya ti ngalit ke ati...Enggau Iya ke udah milih pengerindu udah ngaga siti utai ti ulih mulai ke pengerindu nya ngagai Iya baru.
Diatu tepulai ngagai kitai empu milih.
No comments:
Post a Comment