Kati ko kitai ulih meruan nyadi orang Kristian

Blog tu diambi ari jaku lalau aku ba newsletter Gerija St. Margaret, Seria 15/11/2009:

Saritu kitai meri terima kasih ngagai Allah Taala ketegal pengerindu enggau pengasih iya, ti ngujung ka Jonathan Timothy Heng, Michael Bawin Assau, Avinash Mohan Varghese, Darren Shim Yung Chong, Soo Yuen Ho, Mike Empara anak Dadong, Silai anak Labin, Viviana Bangi Rickly, Melanie Lim Boon Jin, Ivy Yang Show Ling, Yang Tian Jiao, Chang Chee Mei, enggau Lenjai anak Sulau ulih ngenatai ka diri awak ka ditetap (confirmed) ulih Bishop pagi tu. Saritu sida deka nentu ka semaya diri ngagai Tuhan lalu meri pengidup sida ngagai jari iya, nyadi anak iru iya, lalu mega besemaya deka bekerja serta ngasi ka iya sepemanjai umur sida.

Kitai ti lama udah betetap tentu agi ingat maya kitai ditetap Bishop dulu menya: tu meh maya kitai berasai semak bendar enggau Tuhan. Tang pegila-lusa kitai deka pulai ngagai endur diri lalu ngereja utai baka ti dikerja kitai ngelama tu. Lalu dalam kitai ti ngereja utai tu, kitai mega ngasai ka pengudus ti bisi ba kitai nya majak lenyau. Lalu kitai nanya, “Maya ku betetap suba berasai semak bendar Tuhan. Dini iya diatu? Nama kebuah aku enda berasai kudus agi?”

Ba Parish ti endur aku udah bekerja kami netap beratus iko orang tiap taun, tang bala ti datai besambiang tiap Hari Minggu mengkang nyampau nya. Kini ka penunga sida ti udah ditetap? Nama kebuah sida badu datai ka gerija udah sida ditetap? Tentu bisi utai ti nyadi dalam pengidup sida, ti ngujung sida badu besambiang ba gerija lalu ngelengka ka Jesus, ti dikarap serta dikerindu ka sida lebuh sida baru masuk Kristian

Nya alai pagi tu kitai patut nanya diri, “Kati ko aku ulih meruan semak enggau Tuhan udah aku betetap?” Surat ngagai orang Hebrew tau nyadi ka lalau kitai. Surat tu mar dibacha tauka dipereti kitai, tang iya ditulis dikena meransang orang Judah ti baru masuk Kristian. Lalu kitai tu ti baru masuk Kristian mega tau diperansang ulih jaku dalam surat tu. Orang Judah, lebuh sida baru nerima Tuhan Jesus, chukup ransing bendar ati nyadi kaban baru. Tang nyau kelama udah nya sida belabuh mantul ati laban kena kachau orang Judah ti ukai Kristian, lalu orang Rome betenah ka sida ngena jaku bula. Lebuh sida ngasai ka penusah nya, sida nyangka sida udah salah pengarap dipilih, lalu deka mulai ka diri baru ngagai pengidup lama. Nya alai penulis surat Hebrew meri jaku lalau enda ngasuh sida mantul lalu nikal ngagai pengarap lama, laban ko iya Jesus lebih manah ari semua utai ti udah kala diasai sida. Lalu Surat ngagai Orang Hebrew tau disimpul munyi tu: ba bagi 1 & 2 penulis nya madah ka Jesus manah agi ari semua malikat; ba bagi 3 madah ka Jesus manah agi ari Moses; bagi 4 madah ka Jesus manah agi ari adat Hari Sabat; bagi 5 & 7 madah ka Jesus nya manah agi ari semua imam dalam Sempekat Lama; bagi 8 madah ka Jesus manah agi ari Adat dalam Sempekat Lama; lalu bagi 9 & 10 madah ka Jesus manah agi ari semua piring enggau genselan ti diberi mensia. Simpul jaku ajar dalam Surat Hebrew iya nya: “Nuan enda patut nyerara diri ari Jesus laban iya lebih manah ari semua utai bukai”. Pemesai pengerindu iya ka nuan baka jari iya ti entepa ba kayu regang maya iya mutus seput. Lalu udah iya angkat pulai idup baru iya besemaya ba Matthew 28:20: ko iya, “Kingat ka! Aku seruran deka enggau kita datai ka pemadu dunya.” Reti nya Jesus udah besemaya enda ninggal ka kitai. Kati ko kitai deka ninggal ka iya?

Bisi 3 iti utai ti patut dikereja kitai ngambika kitai meruan semak enggau Tuhan udah kitai betetap. Kesatu, kitai patut selalu besambiang. Hebrew 10:19 madah dalam ajar Sempekat Lama semina imam besai aja ulih tama sekali dalam setaun ngagai ‘Endur ti Kudus’ dalam Rumah Sambiang, awak ka ngenjok genselan darah kena muai dosa. Tang lebuh Jesus ngenjok diriempu nyadi ka genselan maya iya mati ba kayu regang, iya udah muai semua dosa. Reti nya, tiap iko orang ti arap lalu nerima Jesus udah dituchi ari dosa magang. Kitai enda agi beguna ka darah jelu kena muai dosa enggau pemali, laban darah Jesus udah chukup kena muai utai nya. Lalu lebuh kitai ngaga dosa baru, kitai ulih datai ngagai Tuhan barang maya, barang endur – lalu kitai deka diampun. Sambiang ukai semina dikerja maya Hari Minggu aja di gerija. Kitai tau datai besambiang ngagai Tuhan barang maya, barang endur, ngena leka jaku kitai empu – bediri, besugang, duduk, lalu kitai tau enda ibuh bejaku inggar laban Tuhan ninga kitai lebuh kitai bejaku dalam ati.

Kitai tau meruan semak enggau Tuhan enti kitai ngembuan pengadang ati (Hebrew 10:23). Barang utai tau nyadi dalam pengidup kita udah tu, lalu sekeda utai ti nuntong kitai tau ngasuh ati tusah tauka takut. Dalam kitai ti ngasai utai nya, kitai patut bepegai ba Tuhan Jesus lalu arap ka iya enggau ati penuh. Tuhan nemu nama utai ti nuntong kitai, lalu iya tau ngena utai nya (manah tauka jai, nyamai tauka pedis) awak ka pulai ka penguntong kitai empu dudi ila. Utai nya tau dikena Tuhan baka kitai ti ngena batu pengansah ti ngasuh duku tajam. Lalu lebuh Tuhan ngansah kitai ngena macham-macham utai – kitai deka ngembuan penajam ba runding enggau ati, lalu kitai nyadi orang tuchi. 1 John 3: 3 nyebut munyi tu: “Semua orang ti bisi pengadang nya dalam Kristus, ngintu diri tuchi, baka Kristus ti endang tuchi.”

Ketiga, kita anang ninggal ka gerija baka sekeda orang. Hebrew 10: 24 & 25 nyebut munyi tu, “Awak ka kitai berunding ka pangan diri, mandang ka pengerindu enggau pangan diri, nulong awak ka meransang diri sama diri, mandang ka pengerindu enggau kerja ti badas ngagai pangan diri. Awak ka kitai enda ngelengka ka pengawa begempuru, baka sekeda orang bukai. Kitai patut meransang pangan diri lebih agi ngereja pengawa nya, laban kita udah meda Hari Penatai Tuhan nyau ka datai.”

Menyadi, aku meransang kita – anang ninggal ka gerija, lalu anang enggai besambiang. Gerija endang amat bisi pengurang laban orang ti dalam gerija agi tau ngaga dosa; tang tu aja meh tempat ti pemadu manah endur kitai nerima jaku peransang ari Tuhan, lalu bejaku enggau Tuhan. Tu meh tempat endur kitai tulih ka pengering nyadi anembiak Tuhan. Ingat: kayu api ti ditunu lalu udah nya diserara kediri deka jampat padam. Baka nya ga orang Kristian ti nyerara diri ari gerija. Pengarap iya jampat padam, lalu pengadang ati iya enda meruan. Nya alai peransang diri sama diri datai ka gerija, bekerja ka Tuhan lalu nanggam ka kaul enggau orang Kristian bukai. Ari nya kitai tulih ka pengering, lalu ari nya kitai nerima berkat Tuhan. Nadai udah ti manah agi ba kitai Kristian ari Tuhan Jesus.