Mark 10 nusoi pasal Jesus ti benung berandau enggau bala murid iya enggau orang Parisi pasal "sarak enggau pengawa jadi melaki-bini". Udah lepas nya, orang mayuh lalu mai anak mit tama ka rumah ngagai Jesus awak ka Jesus merekat sida. Kitai enda nemu sekali ka nya maya Jesus ngajar tauka udah tembu iya ngajar.
Bala apai-indai suah bendar mai anak sida ngagai bala Rabbi (pengajar pengarap) awak ka sida diberekat. Tang lebuh sida mai anak mit ngagai Jesus sekali tu, bala murid Jesus nagang sida lalu muru sida pulai. Udah Jesus ninga utai ti dikerja sida, iya ringat bendar lalu nganu bala murid iya. Iya bejaku, “Awak ka sida anak mit datai ngagai aku! Anang nagang sida, laban Perintah Allah Taala endang enggi orang ti baka anak mit tu”.
Kitai enda nemu nama kebuah bala murid tu nagang anak mit dibai ngagai Jesus: nyangka sida ngasai orang tu ngachau Jesus ti benung meri jaku ajar, tauka ngachau sida ti deka belelak. Tang kitai semua nemu: orang, baik ka iya jeman kelia tauka diatu, suah bendar enggai meda meda anak mit bebalut enggau pengawa orang besai-tuai. Anak mit suah dikira enda beguna ba mata orang mayuh. Nya alai Jesus nyangkal penemu nya, lalu madah ka anak mit amat beguna ba Perintah Allah Taala.
Enti kitai bisi ati deka ngutok bala murid Jesus ketegal pengawa sida tu, anang guai dulu: ulah kitai ti besai tuai kemaya hari tu ngagai anak mit nadai tentu ubah ari sida murid Jesus. Aku enggai bejaku pasal gerempong bukai, tang gerija: uji peda berapa iti gerija ti amat-amat bisi ministri ti diungkup ka bala anembiak? Nyema ka jaku, sekeda gerija nudok ka Sunday School ukai nama – awak ka anak mit enda ngachau apai-indai sida ti deka sambiang. Reti nya kitai enda tentu 'serious' pasal pemansang pengarap anak mit.
Bala anak mit amat tau manchal tauka inggar, tang sida beguna ba gerija awak ka sida tau ngelala Tuhan Jesus. Kitai udah ninga Jesus bejaku, “Barang sapa ti ngasuh anak mit tu ngelengka ka pengarap iya ka aku, manah agi enti iya ditating enggau batu kisar ti besai lalu dibuai ngagai tasik” (Mark9: 42). Aku enggai dibuai ka tasik ketegal nya!
Mayuh kitai nya nyangka anak mit enda mereti pasal Tuhan enggau serga, tauka ngelala sapa Jesus nya. Nya alai sekeda orang enggai nganjung anak mit dibaptisa, tang nganti sida nyau besai-tuai. Laban ko sida, anak mit enda mereti - nya alai enda patut dibaptisa. Enti nya amat, nama kebuah Jesus bejaku, “Awak ka sida anak mit datai ngagai aku! Anang nagang sida, laban Perintah Allah Taala endang enggi orang ti baka anak mit tu”.
Nama kebuah Jesus bejaku manah pasal anak mit? Nama utai ti dipeda Jesus ba anak mit, ti enda dipeda kitai? Terubah iya, Jesus nemu anak mit chukup arap ka Allah Taala; sida ukai semina arap ka Allah Taala nya bisi, tang iya mega ulih ngereja semua utai. Amat sida enda nemu nusoi utai ti dikarap diri, tang sida arap. Anak mit enda tusah mereti pasal ajar Bup Kudus ti madah ka Allah Taala ulih ngaga semua utai. Tang kitai ti tuai tu mayuh tanya; mayuh utai ti tau ngasuh ati kakang. Gerija kitai bepechah laban kitai enda ulih besetuju - ukai laban anak mit nya: kitai ti besai-tuai ti ngumbai diriempu mereti tauka ngelala Tuhan, ti empu kerja nya. Nya meh kebuah Jesus ngasuh kitai arap ka iya baka anak mit ti arap ka iya: reti nya kitai patut ngembuan pengarap ti enda kelalu mayuh tanya tauka leman; pengarap ti bepanggai ba Allah Taala seratus-peratus.
Kitai ti tuai ukai semina bisi penanggul ba pengarap ba Allah Taala; kitai mega bisi penanggul nerima utai ti diberi ‘percuma’ (reti nya utai ti enda bebayar). Enda baka anak mit; enti maya Krismas, sida enggau ati gaga nganti orang meri present. Kitai ti tuai suah malu nerima utai ti diberi percuma. Nya alai lebuh Jesus datai ka dunya tu, madah ka pasal Perintah Serga ti diberi percuma ngagai mensia, mensia mayuh enda arap lalu enggai nerima selamat ti diberi. Orang besai tuai mayuh enda arap ka Jesus nya udah mati ba kayu regang awak ka dosa mensia diampun.
Nama kebuah kitai tau badu agi arap ka Allah Taala baka anak mit? Kati ko kitai mulai ka pengarap nya baru? Ayat 15 tadi ngingat ka kitai semua: “…barang sapa ti enda nyambut Perintah Allah Taala baka anak mit, enda tau tama ke dalam iya.” Reti nya, seagi-agi kitai ngembuan ati kakang, enda bepangarap, kitai enda ulih tama ngagai Perintah Allah Taala. Kitai mesti ngembuan pengarap baka ti dikembuan anak mit – nya baru ti tau masuk perintah serga. Peda, nama utai ti nyadi lebuh anak mit dibai datai ngagai Jesus? Ayat 16 madah ka Jesus merap bala sida, ngengkah ka jari iya ba genap iko sida, lalu merekat ka sida. Baka nya mega enti kitai ti tuai datai ngagai Jesus enggau pengarap ti penuh: iya nyambut kitai, merap kitai lalu merekat ka kitai.
Nama utai ti tau dipelajar kitai ari cherita tu? Kesatu, tuai-tuai gerija (padri & pastor) ti meri jaku ajar anang semina meri jaku ajar ngagai orang tuai; anambiak mega beguna ka jaku Tuhan.
Kedua, kitai ti apai-indai, enda tau enda meransang anak kitai datai ngagai Jesus. Enti kitai nyau udah nyadi aki-ini, bai bala uchu kitai ngagai gerija, awak ka sida sama ngasai pengerindu enggau pengasih Tuhan Jesus. Badu agi nyangka anak mit nya enda nemu utai, lalu ngarap ka sida datai ngagai Tuhan udah umur sida tuai ila. Laban enti kitai enda mai sida diatu, nyau tuai ila pen sida enda datai ngagai Jesus.
Ketiga, enggau ka pengujung iya tu, besampi ka tiap iko bala anak-uchu kitai awak ka sida tau ngelala Tuhan. Sida mega beguna ka berekat Tuhan baka kitai tuai tu. Nya alai besampi ka sida awak ka sida tau nyadi anembiak Tuhan lebuh umur sida agi biak. Puji Tuhan enti bala kita ti macha tu bisi anak mit tauka menyadi mit ti arap ka Tuhan.
No comments:
Post a Comment