Blog tu diambi ari jaku ajar aku ba Gerija Calvary Baptist, di Bintulu dalam taun 2005. Jaku ajar tu bekaul enggau cherita ba Matthew 14: 22-32, ti ngenang pasal bala murid Jesus ti nyemerai tasik lalu dipangka ribut enggau gelumbang besai.
Dalam kandang seminggu nya Jesus udah ngajar orang, ngerai orang sakit lalu muru antu. Udah nya Jesus meri kira 5000 iko orang makai ngena roti lima keping enggau ikan dua iko. Injil Matthew 14: 22-32 nya sambung cherita tu tadi.
Udah bekau ti gawa seminggu nya Jesus tentu berasai lelak. Tambah mega seminggu sebedau tu iya udah nerima berita pasal pemati petunggal iya, John Pemaptisa ti dibunoh Herod. Ketegal nya dia Jesus ngambi awak diau kediri, belelak enggau besambiang. Nya alai Bup Kudus madah lebuh hari nyau lemai Jesus agi tinggal kediri di endur nya, lalu maya nya perau ti dikena sida murid iya nyau datai di puak tasik, lalu gilik-gilik dialun ka gelumbang, laban ribut muput nachak ka iya.
Tasik Galilee tauka dikumbai Tasik Tiberias kita 14 batu pemanjai enggau 8 batu pemesai. Reti nya bala murid Jesus udah bekayuh kira 3½ ngagai 4 batu penyauh lebuh sida dipangka kabut. Mark 6: 48 madah ka Jesus bisi meda sida murid iya kena penusah nayung perau sida. Lalu kira semak dini hari sida agi bekayuh ngelaban ribut enggau gelumbang.
Sekali tu aku mai kitai berati ka reti cherita tu. Lalu terubah iya tu aku deka ngenang ka gaya chara kitai suah ngaga perambu. Aku enda nemu kita; tang enti aku beperambu, aku suah bendar ngira kati enti utai ti deka digaga enda mujur tauka enda betul. Jangka aku kita kurang lebih baka nya: kitai suah agi besedia enggai ka utai enda mujur. Reti nya kitai selalu bisi “contingency plans” tauka “redundant systems”. Kitai nyendia ka plan B tauka Plan C enggai ka Plan ti terubah enda mujur.
Tang utai ti jarang disedia kitai iya: kati enti pengawa nya mujur? Kati enti sema nuan tulih ka pengawa ti endang diati nuan, lalu tiap iti utai ti dikereja nuan mujur magang? Kala nuan nyendia ka diri nangkup sebarang pemujur? Sekeda kitai nyangka nanya: Enti utai nya tentu deka mujur, nama kebuah ngaga perambu bukai?
Utai ti ko aku, iya nya dalam pengidup jarang bendar kitai nyendia diri nangkup pemujur ba pengawa. Laban ba runding kitai pemujur nya utai ti manah, lalu nama kebuah kitai enda nerima iya? Aku deka ngingat ka kitai mayuh: pemujur tau mai utai ti enda manah ba kitai, lebih agi enti kitai nadai “contingency plan” tauka perambu nangkup pemujur. Nya alai kitai meda sekeda orang ti mujur enda nemu idup ngena pemujur sida. Ensepi` diri udah kaya tauka besai pangkat sida tau enda agi ingat ka asal penatai diri: sida temegah ba utai ulih diri. Sida tau mabok kuasa ti ulih ari pemujur pengawa sida. Nya alai kitai kala ninga orang bejaku “Sanu diatu udah kaya, udah bepangkat besai – enda iya ingat ka kitai agi”.
Orang ti gawa ba ministri gerija mega enda kena kelaung penanggul ti bansa tu. Dipelaba ka aku utai selalu ngerusak ka kitai ti gawa ba ministri gerija iya nya pemujur; laban iya tau ngujung ka kitai enda ingat ka sapa kitai empu. Pemujur dalam ministri tau ngujung ka kitai enda ingat ka diri gawa ka Allah Taala. Kitai tau enda ingat ka utai ti diulih enggau pemujur kitai nya datai ari saup Allah Taala. Nya alai kitai tau meda orang ti gawa ba gerija ngemesai ka diri, lalu ngasai ka diri lebih kudus, lurus tauka bekuasa ari orang bukai.
Jesus udah berati ka gaya murid iya: lalu bisi meda penyumbong nya dalam sida. Kitai kala macha dalam Bup Kudus pasal sida murid ti besangkal enggau diri sama diri pasal sapa ti lebih besai di antara sida. James seduai John, laban ti suah dibai Jesus kin-kia, lalu minta diri dudok ba sepiak kanan enggau kiba Jesus ba perintah iya ti baru. Dalam kandang seminggu nya sida udah meda beribu-ribu iko orang nitih Jesus, lalu sida sama udah kiroh nulong Jesus meri orang nya makai, lalu ngereja mayuh macham utai. Nya alai, ngambi ka sida enda berasai kelalu temegah ka pengawa diri, dia Jesus ngasuh sida merau’ ka diri. Kitai meda ba ayat 2: “Udah nya Jesus ngasuh sida murid iya nepan ka dalam perau lalu mansang ka saberai; dulu agi ari nya, lebuh iya benong ngasuh orang mayuh pulai. Udah iya ngasuh orang mayuh pulai, iya lalu niki bukit sigi lalu besambiang ba endur nya.”
Jesus sengaja nganjung bala murid ka seberai tasik Galilee malam nya awak ka sida kena pangkat kabut lebuh sida ba tengah-tengah tasik. Nama kebuah Jesus ngaga utai nya? Nya chara dikena Jesus ngajar sida. Kitai enda nemu nama jaku bukai ti disebut Jesus ngagai sida sebedau nya. Nyangka ko iya, “Seminggu tu kita udah enggau aku, lalu meda mayuh kerja nyelai. Diatu aku ngasuh kitai merau’ kediri, laban aku deka besambiang kediri. Pegila aku deka betemu enggau kita ba seberai nyin”.
Jesus ngasuh sida bekayuh nyemerai tasik kediri laban iya bisi kebuah: awak ka sida kena pangkat kabut lebuh sida datai ba puak tasik nya. Lebuh ti ingat ka tu, kitai mega ingat ka diriempu: Nama kebuah kabut datai kedalam pengidup kitai? (Why do storms come into our lives?) Tu pekara ti patut ditanya kitai ba diri empu laban tiap iko kitai deka kena pangkat kabut: baik ka nya benong nyadi diatu tauka deka nyadi pegila-lusa. Pengarap nuan ba Tuhan Jesus enda semesti iya nentu nuan deka dikelaung kabut ti mangka pengidup mensia. Jesus udah bejaku ba Matthew 5: 45 munyi tu, "Laban iya ngasuh mata panas manchar atas orang ti jai enggau orang ti manah, lalu meri ujan ka sida ti lurus enggau ti bingkok.” Nya alai penusah, pemedis, pemerinsa, penyakit, tauka pengirau deka diasai kitai semua. Nadai siko orang deka dikelaung, taja meh gaya enggau pemerat penusah ti diasai kitai enda sebaka.
Pulai baru ngagai tanya tadi: Nama kebuah kabut datai ngagai pengidup kitai? Siti ari kebuah iya nyadi laban kitai ngelaban peneka Allah Taala. Kita ingat lebuh Jonah diasuh Allah Taala nusui pesan ngagai orang di Niniveh, iya enggai iya lari nepan kapal ngagai endur bukai. Allah Taala ngasuh kabut mangka kapal nya! Kabut datai ngagai pengidup Raja Saul laban iya enda ngasi jaku Allah Taala. Dalam Surat pasal kerja rasul Ananias enggau bini iya Sappira mati ngenyit laban seduai iya bejaku bula enggau Allah Taala enggau ekklesia iya. Kabut mangka pengidup kitai laban kitai ngelaban peneka Allah Taala.
Tang kabut tau mega mangka pengidup kitai maya kitai ti nitih ka peneka Allah Taala. Injil tu tadi udah nunjuk ka kitai siti chunto, lalu kitai nemu ukai bala murid ti deka bekayuh nyemerai tasik: Jesus ti ngasuh sida nepan perau lalu bekayuh ka seberai. Bala murid ti merau kena pangka kabut laban Jesus ngasuh sida
Siti agi chunto iya nya Jop. Jop orang ti kaya, lalu ruang-bilik iya chukup pengelantang. Jop orang ti lurus ba mata Allah Taala. Tang kitai nemu pasal penyadi Jop. Anak iya mati magang kena tinggang rumah runtuh laban kabut, jelu tupi iya dichuri orang tauka mati kena pangka ngitar, orang gaji iya kena bunuh. Jop empu lalu sakit diempa pisa` ari pala datai ka ujung kaki. Jop orang ti lurus tang pemerinsa agi nuntung pengidup iya.
Enti nuan cherita pasal Josep, baka nya mega. Joseph orang ti manah sereta dikerindu apai iya. Tang bala menyadi iya begedi ka iya ngujong ka iya dijual nyadi ulun ketuai ti nyaga istana rajah menua Ejip ti benama Potiphar. Joseph ditudoh bini Potiphar deka ngachau iya, ngujong ka Joseph ditangkap lalu dijil. Joseph idup merinsa dalam jil tang iya orang ti lurus. Nama ko Joseph enggau bala menyadi iya ba pengujung cherita, udah iya nyadi orang ti bepangkat besai ba Istana rajah? Ko iya, “Aku tu menyadi kita ti benama Joseph, ti dijual kita ngagai menua Ejip. Kita anang tusah ati tegal kita udah nyual aku ngagai menua tu, laban Allah Taala ti ngatur aku datai kitu dulu ari kita.”
Paul iya empu mega tau nyadi ka chunto. Paul udah tasah di tasik laban kapal pechah; iya udah dipalu lalu disimpan dalam rumah jil. Pengujung iya mati kena bunuh. Tang Paul anembiak Tuhan; siko ari orang ti tebilang bendar dalam cherita tuai eklesia Kristian. Iya ngereja peneka Tuhan, tang iya ditinggang pemedis enggau pemerinsa. Nya alai, enti nuan ngasai ka diri dalam pemerinsa, pemedis tauka penusah, iya enda semesti ketegal nuan udah bedosa ngelaban Tuhan. Orang ti ngereja peneka Tuhan tauka semak Tuhan mega tau ngasai ka penusah.
Pekara ti kedua iya nya: Nama ti dikereja Jesus lebuh nuan kena pangka kabut? Bup Kudus madah ka iya meda bala murid iya lebuh sida kusil-kusil ngayuh perau ngelaban gelumbang besai. Arap ka enda nuan, enti aku madah ka Tuhan Jesus meda meda nuan ngelaban kabut ti nempoh pengidup nuan? Lalu nama utai ti dikereja Jesus lebuh iya meda nuan ngelaban kabut?
Ayat 22 enggau 23 madah ka lebuh bala murid benong ba puak tasik ngelaban gelumbang besai, Jesus besambiang. Nama ti dikerja Jesus lebuh iya meda nuan tusah ngelaban kabut? Iya mega besambiang ka nuan. Hebrew 4: 14 nyebut munyi tu: "Nya alai, awak ka kitai bepegai tegoh ba pengarap ti dititih ka kitai. Laban kitai bisi Imam ti pemadu besa, ti udah datai ngagai Allah Taala di serega – Jesus Anak Allah Taala. Imam Besai kitai ukai orang ti enda nemu pengelembut kitai. Tang lebih ari nya – Imam Besai kitai udah kena penguji dalam semua utai baka kitai, tang iya enda ngaga dosa. Awak ka kitai berani mansang ka mua ngagai penudok Allah Taala endur ti bisi pengasih. Dia kitai deka nyambut penyinu lalu tetemu ka pengasih ti tau nulong kitai lebuh kitai beguna ka iya." Reti jaku tu iya nya, lebuh kitai tetemu ka mayuh macham penusah enggau penanggul di dunya tu, Jesus duduk ba kanan Allah Apai besambiang ka kitai.
Enti nuan nemu diri disambiang ka orang, iya chukup nyadi ka peransang nuan. Tang enti nuan nemu Jesus besambiang ka nuan, iya mai peransang ti besai agi. Jesus nemu nama utai ti patut disambiang ka iya laban iya udah ngsai semua penguji engga pemerinsa di dunya tu.
Pekara ti ketiga, iya nya Jesus datai ngagai kitai. Ayat 25 nyebut munyi tu, "Entara pukul tiga dini hari enggau pukul enam pagi Jesus datai ngagai sida bejalai atas ai.” Ingat nama ti disebut Nabi Malaki pasal Allah Taala? Malaki 3: 3 madah ka Allah Taala baka orang ti ngaga pirak enggau mas. Aku bisi macha cherita ba internet pasal chara orang ngaga pirak. Ko iya, "Udah aku ngengkah ka batu pirak ke dalam api, aku deka berati ka iya berari sepengelama pirak nya dalam api. Aku enda malik ka bukai, laban aku enda tau enda ngambi pirak nya ari api be maya ti betul. Enti aku ngambi iya tumu mimit, pirak nya enda nyadi pirak ti tulin. Tang enti aku neju pirak nya kelalu lama dalam api, pirak nya deka angus lalu enda beguna. Nya alai aku enda tau enda merening iya berari, nganti maya iya tau dibai pansut ari api. Lalu orang nanya iya: “Kati gaya nuan nemu maya ti manah endur ngemansut ka pirak ari api? Ko tukang pirak nya nyaut: “Lebuh aku tepeda ka mua aku diayan ba pirak nya (baka cheremin), dia aku nemu nya meh maya iya.”
Aku enda nemu kita; tang suah bendar lebuh aku ngasai ka diri tetemu ka kabut, aku minta Allah Taala ngemansut ka aku ari penusah nya enggau jampat. Tang jarang bandar Allah Taala deka ngereja utai ti dipinta aku nya. Kebuah iya, laban Allah Taala ngereja pengawa iya baka tukang pirak tadi. Iya nganti maya ti patut endur iya ngereja utai ti dipinta aku. Baka nya mega Allah Taala enggau kitai: Jesus enda datai kelalu tumu; iya mega enda datai kelalu laun; iya nganti maya ti manah enggau maya ti patut.
Dalam cherita kitai pagi tu Jesus ukai semina datai lebuh maya ti patut; iya datai kira pukul 4.30 pagi – lebuh maya ti pemadu petang enggau ti pemadu chelap. St. Mark madah ka Jesus ulih meda sida ngayuh perau ngelaban ribut deras enggau gelumbang besai semalam-malam nya. Jesus nemu sida takut. Tang nama kebuah iya datai ngagai sida nyau semak dini hari? Nama reti nya? Reti iya: Jesus deka datai ngagai nuan lebuh maya nuan nyau ngasai ka diri nadai daya agi nulong diri, lebuh maya nuan nyau sandat, nadai akal agi; enggau lebuh nuan dalam pemetang.
Siti agi utai ti tau dipelajar kitai ari cherita tu iya nya, lebuh Jesus datai, iya enda nganti sida ditebing seberai: iya datai ngagai sida bejalai atas ai. Nama utai ti ngenakut ka bala murid iya? Gelumbang besai. Sida takut ka perau karam, takut ka diri mati lemas. Tang Jesus datai – bejalai datas utai ti ngenakut ati sida.
Nama utai ti ngenakut nuan diatu – utai ti ngasuh nuan irau? Enti kitai ngangau Jesus, iya deka datai bejalai atas utai ti ngenakut tauka ngirau ati kitai. Reti nya Jesus datai ngayan ka diri bisi kuasa atas utai ti ngasuh kitai takut tauka irau. Enti nuan irau ka penyakit Jesus datai bejalai atas penyakit nuan nya. Enti nuan putus asa Jesus datai ngindik utai ti ngasuh nuan putus asa. Enti nuan irau ka dosa, Jesus bisi kuasa ngampun dosa.
Peter, dalam cherita tadi deka mega bejalai atas ai baka Jesus. Jesus ngasuh iya. Udah Peter nurun ari perau, iya amat ulih bejalai atas ai; tang lebuh iya meda gelumbang besai iya takut lalu belabuh tengelam. Kitai Kristian, kadang-kadang baka Peter. Kitai meda Jesus ulih ngereja utai – kitai mega deka, lalu kitai amat ulih ngereja utai nya. Tang lebuh kitai tetemu ka utai ti ngenakut ati, kitai badu berati ka Jesus lalu semina meda ka utai ti ngenakut ka kitai. Nya ngujung ka kitai tenggelam.
Pekara ti ke-empat, bekaul enggau ayat 26 & 27, ti madah ka lebuh bala murid meda Jesus, sida nyangka iya antu. Tang Jesus enda ngasuh ngasuh sida takut. “Anang takut,” ko iya, “aku tu”. Nama reti nya? Tu madah ka kitai, Jesus tetap nulong kitai dalam penusah taja pen kitai apin tentu mereti. Bala murid enda ngelala tauka nemu sapa ti datai ngagai sida. Bala menyadi dalam Kristus, lebuh Jesus datai ngagai kitai, kitai mega tau enda nemu tauka ngelala sapa iya. Kitai tau enda mereti ka kebuah utai ti enda manah nyadi ba kitai. Tang taja kitai enda mereti Jesus tetap deka nulong kitai.
Sekeda orang Kristian nyangka sida enda tau enda nemu semua utai. Tang aku madah ka kita, Bup Kudus nadai madah ka kitai enda tau enda mereti pasal semua utai. Reti nya: anang irau enti nuan enda mereti ka penusah tauka utai ti nyadi dalam pengidup nuan. Laban agi mayuh utai ti enda ulih temu kitai. Aku tiap minggu meri jaku ajar ba gerija, tang aku enda berani madah ka diri nemu semua utai. Mayuh bendar utai pasal Allah Taala ti enda ditemu aku.
Tang taja pia, kitai tau besetuju enggau Paul ti madah ba Rome 8: 28 munyi tu: “Nyadi kitai nemu, semua utai dikereja pulai ka pemanah sida ti rindu ka Allah Taala...” Kati ko kitai nemu? Kitai nemu laban Allah Taala tau dikarap ka kitai. Pemanah ti datai ngagai pengidup nuan enda bepanggai ba pemintar nuan berunding. Iya enda bepanggai ba nama utai ti ditemu nuan, tang sapa iya ti ditemu nuan. Nya alai lebuh pengidup nuan dipangka kabut: lebuh nuan sakit, suntok, irau, takut, tusah ati, nuan tau ngaku diri enda nemu kebuah. Nuan tau madah ka diri ngenggai ka utai nya. Tang laban nuan nemu Sapa Iya ti bekuasa atas semua utai, nya udah chukup nyadi ka peransang nuan.
Kitai patut baka Jop ti nyebut, “Tuhan udah meri, lalu diatu iya udah ngambi pulai baru. Awak ka nama iya dipuji!” (Jop 1: 21). Jop enda rindu ka pengerugi, pemedis enggau pemerinsa ti diasai iya. Iya enda mereti nama kebuah penusah ti bansa nya nyadi ba iya. Tang ko iya, “Aku nemu sapa ti bekuasa atas semua utai.”
Ingat: Jesus tetap deka nyaup nuan taja pen nuan enda mereti ka utai ti nyadi. Iya nyaup kitai taja pen kitai takut. Sebedau penusah tu nyadi, bala murid udah meda Jesus ngereja mayuh macham utai ti ngalit ka ati. Tang dini hari nya sida terubah meda Jesus nyaup sida maya sida balat bendar takut, belayar dalam petang, bekayuh ngelaban ribut enggau gelumbang.
No comments:
Post a Comment