Kitai diatu nyau datai ba pengujung Gawai, lalu ba sekeda endur bala Iban nyau belabuh ngiling tikai tauka bidai. Lalu sepemanjai Gawai tu kemari bala Iban ngirum pesan ngajih pangan diri “idup gayu-guru, gerai-nyamai, lantang-senang nguan menua. Nama reti jaku nya?
Ba Pilip 4: 11 & 12 Paul nulis munyi tu: “...aku udah belajar enda tau enda tepantup ati enggau utai ti dikemisi diri. Aku nemu bakani asai lebuh nadai utai, enggau bakani asai lebuh mayuh serta belaloh. Aku udah belajar ka utai tu, ngambika di sebarang endur, barang maya, aku tau puas ati sekali ka lebuh aku kenyang tauka lapar, sekali ka lebuh aku bisi mayuh tauka nadai.”
Nama utai ti dikumbai kitai “pengelantang”? Ari ni penatai pengelantang? Jaku aku tu munyi iya ngemudah ka utai, tang iya ti bendar pengelantang tu utai ti dipilih kitai empu. Mayuh bendar orang nyangka pengelantang tu datai ari utai ti digaga tauka diberi orang bukai. Sida ngarap ka orang bukai meri sida pengelantang. Iya ti bujang-dara nyangka enti sida bisi pangan tauka belaki bebini, pangan tauka laki-bini sida deka mai pengelantang ngagai pengidup sida. Sekeda ti udah belaki-bebini ti ngasai ka diri nadai pengelantang, nguji ngiga orang bukai nyadi ka ganti. Orang suah bendar begiga ka pangan ti betul awak ka tau meri pengelantang ngagai pengidup. Tang iya ti bendar pangan ti betul iya nya nuan empu, laban semina nuan empu aja ti tau ngasuh nuan empu lantang.
Nambah ka nya, pengelantang tauka pemuas ati ukai semina utai ti dipilih nuan empu: nuan empu ti nentu ka diri deka idup lantang tauka enda. Tu ukai utai ti mudah laban nuan patut meda diriempu dulu – ngelala pengulih enggau pengurang diriempu lalu nerima utai nya. Utai ti terubah iya patut dikerja nuan enti nuan deka lantang tauka nemu puas ati, iya nya badu agi ngarap ka orang bukai tauka utai bukai tau ngasuh nuan lantang. Orang ti betanggung-jawab nentu ka pengelantang nuan iya nya nuan empu – ukai laki tauka bini, ukai anak tauka pangan nuan. Pengelantang mega ukai bepanggai ba utai ti dikemisi nuan, tauka laban pemanah enggau penyai hari. Mayuh orang nyangka enti sida kaya agi sida tau idup lantang agi. Tang, uji tanya orang ti kaya - amat ka enda sida nya lantang ati tiap hari?
Nama kebuah kitai enda ulih bepanggai ba orang tauka utai bukai? Laban mensia tau berubah, lalu utai semampai beganti – lalu enti kitai semina bepanggai ka utai nya dia pengelantang kitai mega nurun-niki (enda tetap). Tu ukai reti nya kitai enda beguna ka pangan, tauka kaban- belayan, tauka utai ti dikena beridup. Kitai beguna ka semua tu, tang kitai mega patut nemu mensia enggau utai ba dunya tu bisi sekat: sida enda ulih meri pengelantang ti meruan.
Aku semina ulih bejaku ngagai bala orang ti bisi pengarap ba Allah Taala laban aku enda nemu nama utai ti diadang orang ti enda arap. Kitai ti bisi pengarap (lebih agi orang Kristian) bepanggai ka Tuhan ti tetap, ti enda nemu berubah, ti penuh pengasih serta ti meruan belama-lama. Lalu tiap kali kitai tetemu ka penusah tauka utai ti ngirau ati, kitai datai ngagai Tuhan tu minta saup iya, minta pengering ari iya awak ka kitai ulih nangkup penusah enggau pemedis di dunya tu. Nambah ka nya kitai mega besampi minta Tuhan ngubah penemu ti enda betul ti bisi dalam kitai, ngambika kitai nembuan penemu ti lebih serta luas. Lalu dalam kitai ti idup bansa, kitai ngembuan pengelantang dalam ati (taja pen ba luar baka ti tusah) laban kitai nemu diri bepanggai ka Tuhan ti tetap, tegap serta meruan.
No comments:
Post a Comment