Sekali tu aku mai kitai berati ka pemerinsa enggau pemedis. Mayuh bendar utai udah disebut tauka ditulis orang pasal pekara tu, lalu kitai mega nemu utai ti dikumbai pemedis enggau pemerinsa. Tang semua penemu kitai nya enda ulih nyaga kitai ari pemerinsa enggau pemedis lebuh iya datai mangka pengidup kitai. Nadai utai ulih nyadi ka ‘guarantee’ dikena nentu pemerinsa enggau pemedis enda ulih datai ba pengidup kitai.
Semua pengidup, baik ka nya mensia tauka jelu, deka ngasai ka pemerinsa taja pen pemerinsa nya enda sebaka ba siko-siko kitai tauka jelu. Nadai siko orang ti udah idup dalam dunya ti enda kala ngasai ka pemedis enggau pemerinsa. Tang maya utai nya datai ba kitai enda sebaka, laban utai ti di asai orang bukai sahari tu tau datai ba kitai dudi ila.
Pemerinsa tu mar bendar diterima mensia laban kitai suah ngaul iya enggau pengawa Allah Taala. Laban tebal agi orang ti merinsa dalam dunya tu nya orang ti arap ka Allah Taala, enda ngira ni bagi pengarap ti dipegai sida. Nya alai mayuh bendar orang nyangka pemerinsa ti nyadi dalam pengidup sida digaga Allah Taala, tauka laban kena ukum Allah Taala. Sekeda orang nanya (tauka kita empu mega bisi berunding dalam ati diri), enti Allah Taala nya amat rindu ka kitai mensia, nama kebuah iya neju kitai merinsa. Laban enti Allah Taala kasih ka kitai, nama kebuah lebuh kitai besambiang minta diri dilepas ari penusah enggau pemerinsa, Allah Taala baka ti enda ninga kitai?
Ulah kitai mensia lebuh kitai dituntong penusah, pemerinsa enggau pemedis mega enda sebaka. Mayuh bendar orang ringat – ringat ka Allah Taala ti enda ngelepas ka sida ari pemerinsa nya. Kadang-kadang mega sida ngembuan pengeringat ka orang bukai ti dipeda sida lantang-senang, lalu nguji mai orang bukai nya sama merinsa baka sida. Sekeda orang putus asa, ngujung ka sida nyerara diri ari orang bukai enggau ari Allah Taala mega. Sida tau badu arap ka Allah Taala, lalu enggai agi besambiang tauka kiruh ka utai ti bekaul enggau pengarap. Kadang-kadang mega orang ti bansa tu nadai ati agi deka idup. Nyema ka jaku, enti sida sakit, sida enggai agi berubat. Sida enda kiruh ka gaya gamal tauka pendiau diri. Sekeda orang ti ditinggang pemerinsa nerima pemerinsa sida nya enggau ati sabar. Kadang-kadang kitai ti bukai enda nemu sida tu bisi pemedis tauka penanggul dalam pengidup sida, laban sida dipeda baka ti nadai penusah. Sida nyerah ka diri enggau semua penusah sida ngagai jari Allah Taala. Sida dipeda lantang ati baka orang bukai, tang dalam nyin sida nat ka pemedis enggau pemerinsa.
Utai ti deka ditanya kitai bekaul enggau pekara tu iya nya kati ko kitai Kristian meda pemerinsa diri tauka pemerinsa ti nuntong mensia di dunya tu? Penatai pemerinsa enggau penusah mayuh. Sekeda ari pemerinsa ti nuntong kitai endang datai ari penyalah tauka pemeli’ kitai empu. Reti nya pemerinsa enggau penusah nya datai ari utai salah ti dikerja kitai – baka pengerangka, makai-ngirup ti enda betagang tauka ngereja utai enda berunding. Sekeda datai ari ati kitai ti amu tauka kelalu besai – deka ngiga lebih ari ti patut, deka jampat kaya, tauka bepun ari ati ti semina berunding ka diri empu aja.
Sekeda pemerinsa enggau penusah datai ari pengawa orang bukai, sengaja tauka enda sengaja – baka penusah accident enggau perang antara menua. Sekeda kitai merinsa laban kena akal tauka dikeduan orang bukai, tauka ketegal orang ti mungkir ari semaya diri - suah bendar penusah ti bansa tu datai ari orang ti endang dikarap kitai.
Sekeda penusah enggau pemerinsa enda ulih dipereti tauka diterang kitai - baka penyakit ti enda ulih ubat. Apin lama tu kemari kitai ninga penusah tanah berenyang di menoa Italy ti ngujung ka beratus iko orang mati enggau beribu iko ti bukai nadai ari rumah endur diau. Pemerinsa ti bansa tu ukai semina mar dipereti; iya mega tusah bendar diterima kitai.
Lalu ba kitai Kristian, kitai diajar ngembuan penyabar lebuh kitai dituntong pemerinsa enggau penusah, laban Allah Taala bisi kebuah ngasuh kitai ngasai ka penusah. Allah Taala enda ngaga penusah nya, tang lebuh penusah nya datai ba pengidup kitai, iya tau ngena penusah nya pulai ka pemanah kitai empu tauka orang bukai. Penusah mensia mega tau pulai ka mulia Allah Taala.
Kati ko pemedis, pemerinsa enggau penusah tau bisi guna dalam pengidup mensia? Enti kitai deka mereti pasal utai tu, dia kitai patut badu berunding ka penusah enggau pemerinsa diri aja. Aku nemu tu pekara ti mar bendar dikereja kitai laban kitai mensia endang tebal agi suah berunding ka diri empu. Suah bendar kitai ngira enti orang bukai tusah nya enda ngawa, anang ga kitai tauka kaban kitai empu kena penusah tauka pemerinsa. Tang Allah Taala enda berunding bansa nya. Lalu enti kitai deka mereti pasal pemerinsa diri, kitai enda tau enda berati ka pemerinsa mensia di serata dunya tu enggau chara Allah Taala meda pemerinsa nya.
Sitan suah ngena pemerinsa enggau penusah ngelimpang kitai mensia ari Allah Taala. Mensia ti alah laban akal Sitan tau badu arap ka Allah Taala. Tang Allah Taala ngena pemerinsa enggau penusah nulong ngelurus tauka nuchi pengidup mensia. Enti dunya tu enda kala ngasai ka pemedis enggau pemerinsa, kitai dipelaba ka enda beguna ka Allah Taala. Dalam pengawa ti dikereja aku, aku suah bendar tetemu ka orang ti beguna ka Allah Taala lalu minta disembiang maya sida bisi dituntong pemedis, penusah enggau pemerinsa – baka penyakit, pengirau, penakut, pemati, enggau pengerugi. Sekeda ari sida tu endang enda kala kiruh ka gerija lebuh maia sida lantang-senang enggau gerai-nyamai. Udah tusah baru ingat ka Allah Taala. Tang Allah Taala nya Petara ti penuh pengasih, besedia nyaut kangau lalu nyelamat orang ti bansa tu.
Kedua, pemerinsa enggau penusah mega dikena nguji penalok enggau pengerindu kitai mensia ka Allah Taala enggau ka pangan diri. Mensia ti semampai bisi tauka lantang endang enda tusah ngiga pangan. Penalok enggau pengerindu orang ti ngumbai diri pangan kitai deka mega diuji lebuh kitai dituntong penusah enggau pemerinsa. Berapa iko ari sida tu agi malik ngagai kitai lebuh kitai sakit, pedis tauka nadai agi guna? Ari nya kitai nemu pangan kitai ti bendar. Penusah ukai semina dikena Allah Taala nguji orang bukai tang kitai empu mega. Pengarap enda tentu tusah dititih enti Allah Taala nya selalu merekat ka kitai ngena utai ti manah enggau utai ti meri ka kitai pengelantang. Tang berapa iko ari kitai agi deka nan ka pengarap kitai ba Allah Taala lebuh maya kitai nat ka pemerinsa tauka penusah?
Ketiga, pemedis enggau pemerinsa ti diasai kitai tau nulong kitai ngasai ka pemerinsa enggau pemedis orang bukai. Sekeda orang ti kala ngasai ka pemerinsa tau nyadi orang ti lebih agi beguna ari orang ti lantang-senang ti enda nemu reti pemerinsa. Sida tu orang ti nemu reti tusah enggau pedis, lalu ari nya sida nyadi penyaup enggau peransang orang bukai ti dituntong penusah enggau pemerinsa. Tang tu deka bepanggai sekalika nuan deka nyerah ka pemedis enggau pemerinsa nuan nya ngagai jari Allah Taala tauka enda. Orang ti manggai ka pemerinsa enggau penusah iya ngagai jari Allah Taala, deka meda penusah iya empu nya ngena mata Allah Taala. Iya deka ngembuan penyabar. Iya deka ngembuan pengerindu ka Allah Taala. Iya mega deka ngembuan pengasih ka orang bukai ti sama tusah enggau merinsa. Taja pen iya empu tusah, iya agi bisi awak nulong orang bukai ti tusah agi ari iya.
Ke-empat, pemerinsa mai penyerakup ngagai mensia. Iya tau nanggam ka kaul antara pangan enggau antara diri sebilik. Iya tau meransang kitai ngembuan tanggong pengawa ka pangan diri, lalu ari nya meri reti ti baru ngagai kaul kitai mensia. Pemerinsa, penusah enggau pemedis ti diasai mensia nya utai ti suah numboh ka pengasih antara mensia, lalu ari pengasih tumbuh kaul ti rapat.
Tiap iko kitai tu sebagi ari utai ti di dunya ti penuh laban pemerinsa enggau penusah. Tang orang Kristian nemu - Allah Taala ukai semina ngereja pengawa iya dalam penyamai enggau pengelantang: iya mega bekerja dalam pemerinsa enggau penusah mensia.
Lalu lebuh kitai berati ka pemerinsa enggau pemedis, kitai enda ulih ngelaung ka utai ti nyadi ba pengidup Tuhan Jesus empu lebuh iya idup di dunya menya. Jesus udah ngasai semua pemerinsa ti diasai kitai. Iya enda diterima orang ti sama menua enggau iya. Sekeda orang ngumbai iya gila. Sekeda madah ka iya nya dirasok antu. Iya dianu bala Parisi enggau Pengajar Adat. Orang mayuh enda mereti pasal utai ti dikerja iya. Ke pengujung iya ditangkap, dikeduan, diperinsa, lalu udah nya diregang datai ka mati. Bala murid iya lari magang ninggal iya kediri, laban sama bla deka nyelamat nyawa diri. Tang ari penusah, pemerinsa nya datai pengidup ti meruan. Enti Jesus enda ngasai ka semua penusah enggau pemerinsa tu, kitai tu agi diau dalam dosa enggau pemetang, lalu perintah serga tetap jauh ari kitai. Diatu kitai meri terima kasih enggau puji ngagai Allah Taala ketegal pemerinsa enggau pemati Tuhan Jesus, laban ari semua utai nya, mensia tulih ka selamat.
Lebuh kitai berati ka pemerat enggau pemerinsa ti ninggang mensia dalam dunya tu, iya tau ngasuh ati kitai ringat, takut, irau, tauka putus asa. Tang pengarap Kristian enda ngasuh kitai meda penusah ngena chara tu. Ba belakang utai ti pemadu petang enggau pemadu pedis bisi penampak enggau pengelantang. Ba Masmor 126:5 bisi ditulis munyi tu: “ Awak ka sida ti nyabak lebuh betanam, tau ngetau enggau pengaga! Sida ti nyabak bejalai mai benih; deka pulai belagu gaga ati mai utai ti ulih sida ngetau!” Ba Injil St. Luke 6:21, Jesus bejaku munyi tu: “Lantang kita ti nyabak laban penyalah diatu; laban kita deka ketawa!” Reti nya tiap iko kitai ti merinsa diatu, baik ka nya laban kitai deka ngereja utai ti lurus, tauka merinsa laban kena keduan enggau kena akal orang; kitai deka ngasai ka pengelantang dudi hari ila. Kitai ti idup merinsa dalam dunya tu diatu, deka ngasai ka pengelantang dalam pengidup baru di serga.
No comments:
Post a Comment