1 Jun tu ila kitai deka ngintu Gawai. Udah mayuh bendar message Gawai diterima enggau dikirum maya tu. Lalu blog tu mega tau dikira jaku pesan rambau Gawai ngagai bala Dayak ti megai pengarap Kristian ba dini enur kita diau.
Dulu menya, lebuh Gawai tu terubah iya ditumbuh, musin tu dikira ujung taun udah kitai ngetau. (Maya nya menya kitai semina bumai padi sekali setaun). Tang jeman nyau berubah – diatu orang nanam padi 2 tauka 3 kali setaun, lalu maya ngetau ukai semina dalam bulan 4 enggau 5 aja. Baka nya mega pengidup kitai nyau berubah – kitai semina orang bumai-betupi, tang nyau ngembuan mayuh macham pengawa.
Tang taja pen utai jauh udah berubah, tuju kitai ti ngadu Gawai nadai udah berubah, lalu rambai jaku (tema) ti selalu dikena meruan beual bekaul enggau terima kasih. Kitai Dayak masin-masin meri terima kasih ngagai petara ti dikarap kitai empu. Lalu ba kitai bansa Dayak ti ngaku diri Kristian tu meh maya kitai meri puji enggau terima kasih ka Tuhan ti udah meri ka kitai semua utai. Nyema ka jaku, enti orang nya bumai-bekebun, sida beterima kasih ka padi ti udah diketau, tauka sayur ti sayur ti udah dijual tauka diempa; orang ti ngasu beterima kasih ka jelu ti udah diulih; lalu orang ti berikan tauka bisi pegong ikan beterima kasih ka asil ti datai ari ai. Lalu kitai ti bekerja ba kompeni minyak tauka gas (LNG) beterima kasih laban udah tulih ka pengidup ketegal minyak enggau gas ti datai ari tanah. Kitai ti bekerja ba sawmill kayu, kitai beterima kasih ka kayu ti diberi Tuhan. Orang ti tukang tebas patut beterima kasih ka Tuhan ti meri rumput, ngambi ka ulih dikerja kitai dikena ngidup ka diri. Lalu enti kitai nyidi asal semua pengawa ti dikerja mensia – iya bisi kaul enggau pemeri Tuhan magang.
Ujung taun ditampong pun taun. Lalu ba pun taun, nya maya kitai besampi minta berkat ari Petara ti ngaga semua utai. Tu maya orang besampi ka tanah ti endur bumai, nanam sayur, kayu buah tauka endur betupi ka jelu – endur sida minta Tuhan meri ka hari ti manah enggau ujan ti chukup; sereta mega minta utai ti ditanam enda dirusak indu utai tauka jelu babas.
Pengerami ti bansa tu mega ngingat ka pasal pengidup semua mensia. Tu ukai semina endur kitai besampi ka diriempu: tu maya kitai besampi ka semua mensia di dunya tu, awak ka sida ngelala Allah Taala ti meri semua utai. Laban enti mensia ngelala utai dunya tu diberi Allah Taala, dia sida deka nemu ngena utai nya enggau betul, lalu enda ngemasau tauka ngerusak ka asil ti datai ari tanah. Iya mega ngingat ka kitai pengidup tu ukai semina “nasip”. Suah bendar mensia ngira diri bulih utai ari ketegal nasip. Enti bulih ikan maya mukat, bulih babi maya ngasu, tauka bulih padi maya bumai – nya ketegal nasip. Nadai nya ngira Tuhan ti meri semua utai tu. Kedua, sekeda mensia ti udah bulih utai semina ngira diri empu aja. Lalu sida ti bisi nadai ati deka nulong orang ti nadai; iya ti kering nadai ati deka nulong sida ti lembut.
Nya alai pengerami ti bansa tu ukai semina maya endur kitai betundi-begagai, makai-ngirup: iya mega dikena ngingat ka kitai pengasih enggau pemanah Allah Taala. Bansa Dayak ti ngemeran ka pengarap asal meri terima kasih lalu ngenjok piring ngagai macham petara di langit, di tanah tauka ba ai. Sekeda kitai Dayak ngerami Gawai semina laban ka rami, ngabang, makai enggau ngirup. Tang kitai Kristian ngintu Gawai beterima kasih ngagai Petara ti siko – Allah Taala ti Pengaga serga enggau dunya.
Siti agi tuju pengerami tu iya nya awak ka kitai belabuh betuai ka Allah Taala baru. Semua utai ti dikumbai enggi kitai endang udah bisi sebedau kitai ada. Reti nya kitai ti idup di dunya tu semina ngena tauka makai utai ti udah disedia Tuhan. Baka nya mega lebuh kitai ninggal ka dunya tu ila, nadai siti utai ulih bai kitai. Nya nyengkaum tubuh kitai tu – iya deka pulai nyadi tanah.
Dalam dunya kemaya hari tu, mayuh bendar bendar kiruh begiga ka pemaju enggau pengaya, lalu enda sedar ka pengidup semengat sida tasal lalu nadai kini-kini. Semengat kitai tu sebagi ari kitai – lalu iya enda tau enda ditupi lalu di-idup ka. Iya enda selalu diberesi ari dosa enggau penyai. Mayuh bendar leka sampi ti disebut maya Gawai munyi tu: minta lantang-senang, gayu-guru, gerai-nyamai nguan menua. Reti nya utai ti dipinta semina idup lantang, gerai enggau gayu dalam dunya tu aja. Tang ni pengelama kitai ulih idup dalam dunya tu? Nama penyadi kitai udah kitai mati ninggal ka dunya tu? Kitai ti udah Kristian pen kadang-kadang enda berunding ka pekara tu enggau dalam.
Pengerami tu ngingat ka kitai - Tuhan semampai bisi enggau kitai, maya bisi tauka nadai; maya lantang tauka tusah; gerai tauka sakit. Tuhan tetap bisi enggau kitai ba dini endur kitai diau. Kitai diau ba tempat ti udah digaga Tuhan, lalu beridup ba utai ti udah disedia ka iya. Nya kebuah lebuh kitai ngepun Gawai kena malam 31 haribulan Lima ngena sambiang – awak ka kitai ukai semina betundi-begagai; makai-ngirup datai ka kitai nyau enda sedar diri. Kelimpah ari tu, kitai Kristian ngadu pengerami tu dikena nunjok ka orang Kristian nya orang ti nemu berami, nemu bekaul, serta manah ati enggau orang bukai. Tuhan udah ngangau kitai nyadi anembiak iya, lalu kitai enda tau enda idup betanggung jawab enggau pangan diri. Tuhan udah meri ka kitai semua utai ti diguna kitai; nya alai kitai patut bisi tanggung jawab ngena pemeri Tuhan nya. Enti kitai semampai ingat ka pemeri Tuhan, kitai enda nyadi orang ti temegah ka kuasa, pangkat enggau pengaya diri. Nya alai ba pengerami ti bansa tu, kitai ti bisi meri; kitai ti lantang ngereja; kitai ti nemu madah. Kitai enda ngasuh pangkat, pengaya, tauka pemandai nyadi ka utai ti ngeranggang ka kaul kitai enggau Tuhan, sereta enggau diri sama diri.
Aku ngarap ka kitai sama-sama ngena Gawai tu nyadi awak endur berunding ka semua berkat ti udah diterima kitai ngelama tu, lalu berunding mega ka tanggung-pengawa ka ruang-bilik diri, ka raban bansa kitai, ka genturong pendiau kitai enggau ka menua kitai – awak ka dunya tu nyamai tauka lantang agi endur diau. Selamat Hari Gawai Dayak ka semua kitai.
No comments:
Post a Comment