Mensia ngembuan mayuh macham penemu pasal Jesus. Orang ti ukai Kristian nyangka Jesus nya pengajar pengarap; sekeda orang ngumbai iya orang manah, tauka nabi. Kitai Kristian ngumbai Jesus nya Anak Allah Taala, ti udah datai ka dunya tu lalu meri nyawa diri, awak ka ngempong mensia enggau Allah Taala. Saritu kitai ninga Jesus bisi agi gelar ti bukai: Kristus ti Rajah.
Tu gelar ti jarang nebdar dikena kitai laban iya tusah dipereti kitai. Taja pen bala nabi terang bendar bejaku madah ka Pengelepas ti deka datai deka nyadi Rajah, tang lebuh Jesus ada, pengada iya ukai baka pengada anak rajah. Kati ko anak rajah ada dalam bansa chapi. Anak rajah tentu ada dalam Istana. Kati ko anak rajah bekerja nyadi tukang? Anak rajah tentu belajar ba sekula ti pemadu tebilang.
Rajah ngulu ka beribu iko bala sedadu lalu nguasa rampa menua ti besai: Jesus semina bisi 12 iko murid lalu numpang rumah pangan. Rajah nepan kerita kuda tiap kali iya mindah: Jesus bejalai kaki ari siti endur ngagai siti endur. Rajah disimpulang Menteri enggau pemesai-pemesai ti benama: Jesus dititih orang ti bedosa, sida ti sakit, pengumpul chukai enggau orang biasa. Rajah diau dalam Istana: Jesus madah ka diri nadai alai endur gali sereta belelak. Rajah ngena gari, mas enggau intan ti naka iya berega: Jesus dipelaba ka semina bisi dua pasang baju panjai aja – sepasang dikena, sepasang dibasu. Lebuh orang macha jaku bala nabi dalam Bup Kudus, sida nyangka nabi nya bejaku pasal dua iko Pengelepas: siko Pengelepas ti nyadi rajah, lalu siko Pengelepas ti baruh ati sereta merinsa.
Dunya kemaya hari tu mega bisi penanggul nerima Jesus. Kati ko Jesus tau dikumbai Rajah? Iya nadai sedadu; iya enda merintah menua; iya enda kala nyerang menua bukai. Iya idup baka orang biasa lalu mati kena ukum baka orang ti bepenyalah. Iya enda mejal orang nitih ka iya, tang ngasuh sida milih sekalika deka nitih ka iya tauka enda. Kati ko orang bansa nya tau dikumbai rajah?
Tang sekeda orang belabuh takut lebuh sida ninga Jesus nya rajah. Lebuh Jesus ada di Bethlehem, Rajah Herod mupok irau ati. Orang ti megai kuasa enggai ninga pasal rajah ti baru tu. Orang ti kaya-raja enggau sida ti bekuasa selalu irau ka Jesus, datai ka saritu, laban Jesus udah besemaya deka ngalih semua utai ti dikereja dalam dunya: iya ti pemadu baruh deka nyadi pemadu tinggi; iya ti pemadu mit deka nyadi pemadu besai; iya ti dulu deka nyadi dudi, lalu iya ti dudi deka pulai dulu. Nya alai mensia naka ulih nguji madam jaku Jesus. Nya alai ba sekeda endur dalam dunya tu Kristian diperinsa. Enti sida enda tulih ka Jesus, orang ti nitih Jesus endur sida ngambi ulih.
Enti Jesus nyadi Rajah, dini endur menua iya? Tadi kitai ninga Pilate nanya iya, ” Kati nuan amat rajah orang Judah?” Lalu ko Jesus nyaut iya, “Perintah aku ukai di dunya tu; enti perintah aku di dunya tu, sida anembiak aku tentu bebunoh ngelaban orang ti nyerah ka aku ngagai orang bansa Judah. Ukai, perintah aku ukai di dunya tu.”
Jesus tu Rajah ti nyelai – nyelai laban iya enda ngembuan kuasa tauka senyata dunya. Kuasa ti dikembuan iya datai ari Allah Taala di serga. Kati ko gaya kuasa ari Allah Taala di serga? Mark enggau Matthew sama-sama madah ka Jesus kala nyebut munyi tu: “Anak Mensia, iya datai ukai minta bela, tang deka mela lalu meri nyawa diri kena nebus orang mayuh.” (Mark 10:44-45; Matt 20:28).
Reti nya, Jesus bejalai ka kuasa iya enda sebaka enggau rajah enggau orang to bekuasa dalam dunya tu ngereja pengawa sida. Jesus ngayan ka kuasa iya dalam pengerindu iya ka mensia: ngerai orang ti sakit, ngampun orang ti bedosa, muru antu ti ngachau mensia, enggau ngajar orang pasal pengerindu. Ka pengujong iya, iya meri nyawa diri mati ka mensia ti bedosa. Kuasa Jesus dipeda kitai dalam pengamat utai ti disebut iya, pengarap & pengadang ati ti diperansang iya, pemaruh ati enggau pengerindu iya.
Dunya bejalai ka kuasa ngena undang-undang enggau ukum. Tang Jesus semina ngangau orang nitih ka iya. Lalu orang ti nitih ka iya disemaya deka diselamat lalu bulih pengidup meruan dalam Perintah Allah Taala. Lalu pengawa kitai ti tama ngagai Perintah Allah Taala nya dikumbai “diada ka baru ulih Roh”. Orang ti enda ngelal Allah Taala kurang lebih baka anak ti agi dalam kandong indai iya. Iya idup, iya enseput, iya beridup ba pemakai ti datai ari tubuh indai. Tang iya nadai kaul enggau utai ti ari luar tubuh indai iya. Orang ti enda ngelala Allah Taala pen baka nya: iya idup lalu bekerja dalam dunya tu; iya bisi utai sembah tang iya enda ngelala Allah Taala ti bendar. Iya nguji ngiga jalai ngagai Tuhan ngena chara iya empu; iya tau nguji nitih ka adat, meri piring tauka besambiang. Sekeda orang nyangka enti sida munoh munsoh, sida deka masuk Perintah Allah Taala – nya alai di sekeda menua baka di Iraq, Pakistan, Afghanistan bisi “suicide bomber” orang ti munoh diri ngena bom lalu sama naban nyawa orang bukai.
Tu meh kebuah Jesus madah ka orang ti deka tama ngagai Perintah Allah Taala enda tau enda diada ka baru ulih Roh Kudus. Laban enti iya enda diada ka baru, iya deka nguji ngena penemu, jalai tauka chara iya empu. Lebuh kitai ngaku Jesus nya Rajah, reti nya kitai ngaku iya bekuasa atas pengidup enggau semengat kitai. Kitai masuk ngagai perintah Allah Taala, ukai laban kitai tu manah tauka lurus: tang laban Jesus Kristus udah mati ba kayu regang ka dosa kitai. Reti nya kiai deka masuk ngagai Perintah Allah Taala ukai ketegal pengawa kitai, tang utai ti udah dikerja Tuhan Jesus enggau Roh Kudus ti bisi dalam kitai.
Lebuh kitai ada di dunya tu kitai diau dalam menua ti dipegai rajah dunya. Tang lebuh kitai diada ka dalam Roh, Rajah Serga idup dalam kitai. Nya alai lebuh kitai nyadi orang Kristian kitai ukai semina masuk pengarap baru: kitai nerima Jesus ke dalam kitai. Lalu tiap iko orang ti nerima Jesus bisi pengidup ti baru. Kitai mega bisi Roh Kudus ti diau dalam kitai, ti nulong kitai besambiang lalu mereti ka jaku Allah Taala ti ditulis dalam Bup Kudus.
Enti Jesus amat nyadi Rajah dalam pengidup kitai, kitai ulih ngereja mayuh macham utai. Tang sebedau nya kitai enda tau enda diada ka baru dalam Roh Akllah Taala. Kedua, kitai enda tau enda ngelengka ka peneka ati kitai empu lalu ngereja peneka Allah Taala ba kitai.
Nama utai bukai ti tau nyadi dalam pengidup kitai? Enti kitai amat enggi Kristus kitai dilepas ari penakut (baik ka nya takut ka pemati tauka antu). Enti Jesus amat Rajah kitai, kitai enda agi beguna ka pengaroh, jimat tauka nama-nama ubat ti diberi dukun tauka manang. Enti kitai amat bisi Jesus nyadi ka Rajah kitai, kitai enda agi dikungkong penti-pemali. Enti kitai amat bisi Kristus, kitai idup dalam pemenang – ukai laban kitai nadai agi penusah, tang laban penusah enda agi bekuasa atas pengidup kitai.
Enti Jesus amat Rajah kitai mega badu agi amu tauka rangka ka utai dunya tu. Nadai kebuah kitai ti dikuasa Rajah Jesus agi ka belaya diri enggau diri sebilik pasal reta tauka pesaka tuai. Enti Jesus nyadi Rajah, kitai mega enda semina berunding ka diriempu aja, tauka ngereja utai ketegal pemalu. Kadang-kadang orang bejaku, “Enti kitai enda nulong (tauka enda datai) malu ga dikenang orang ila.” Reti nya sida meri, nulong, ngereja ketegal malu. Tang enti Jesus amat nyadi Rajah kitai, deka deka ngereja, meri, nulong ukai ketegal malu tauka takut – tang ketegal pengerindu.
Nemu kita nama tanda kuasa Jesus? Orang ti megai perintah dalam dunya tu selalu ngena tanda ti ngayan ka pengering, kuasa enggau mulia, baka mata-hari enggau bintang, tauka jelu baka singa, rimau, naga, menaul, tauka senyata baka pedang, terabai enggau sangkoh. Tang ko Jesus madah ngagai bala murid iya: “Aku tu roti pengidup” (John 6:35). Nya tanda kuasa Jesus. Lalu tiap minggu kitai datai ka gerija nyambut roti. Nemu kita nama reti roti ti disambut kitai nya? Mayuh kitai nyangka nyambut Sakramen nya jalai kitai nyambut berkat ari Tuhan. Nemu kitai nama kebuah roti enda tau enda dipechah dulu sebedau iya disambut? Lebuh padri mechah roti iya nyebut, “Kitai mechah ka roti tu awak ka bisi bagi dalam Tubuh Kristus”. Reti nya sebedau kitai ulih nerima nama-nama penguntong ari Tuhan Jesus tubuh iya enda tau enda dipatah, dipechah dulu ba kayu regang. Kitai Iban nadai leka jaku kena nyalin “brokenness” dalam jaku English. Tang aku tau ngena telu tauka buah nyadi ka chunto. Enti nuan deka ngoreng telu – telu nya enda tau enda dipechah sebedau digoreng. Enti nuan deka makai buah, iya enda tau enda dikupak tauka dibelah dulu.
Jesus mechah ka roti ti nyadi tanda tubuh iya, sebedau iya meri ngagai bala murid iya. Reti nya sebedau Jesus ulih nyelamat mensia, iya enda tau enda meri tubuh diri nyadi ka genselan tauka piring ba kayu regang. Jesus meri nyawa iya ketegal kitai. Lebuh kitai nyambut roti ti udah dipechah – nya nanda kitai mega besedia meri diri ketegal ngagai Kristus. Nyangka kitai enda ulih meri nyawa diri – tang tiap iko kitai ti nyambut roti patut bisi utai diberi – awak tauka jam, pemisi tauka pengaya kitai, pengelandik tauka penau kitai - ka mulia Allah Taala.
Aku enda nemu kati ko gaya kita meda gerija. Tang aku nemu mayuh orang ngira gerija tu gerempong “sukarela” – gerempong rindu ati. Reti nya enti ku deka ngereja, aku ngereja; enti ku bisi hari aku datai, enti aku enda datai – nya barang ko aku; enti aku deka, aku meri; enti aku enggai – nya barang ko aku. Reti nya kitai nyangka pengidup nyadi orang Kristian nya barang ko kitai. Tang berani ka enda kitai berulah baka nya ngagai rajah menua kitai? Bisi ka enda kita madah ka diri nya semina “rayat sukerela” menua Brunei tauka Malaysia? Tentu enda – kitai berat ka utai nya: kitai ngaga surat pengada, IC, passport, tauka minta surat kerayatan. Kitai naka ulih nitih ka undang-undang enggau adat menua.
Baka nya mega pengidup Kristian. Rajah menua semina beguna ka orang ti talok ka menua enggau bansa: baka nya mega Kristus ti Rajah kitai. Iya beguna ka orang ti talok ka iya. Nya kebuah iya madah, “Barang sapa ti deka nitih ka aku, iya enda tau berat ka diri empu, tang ngesan regang iya lalu nitih ka aku.” (Matt. 16: 24).
Tiap kali kitai besambiang ba gerija kitai nyebut, “Datai meh perintah nuan, jadi meh peneka nuan; baka dalam serga bakanya dalam bumi.” Jesus nyaut Pilate, ko iya, “Perintah aku ukai di dunya tu; enti perintah aku di dunya tu, sida anembiak aku tentu bebunoh ngelaban orang ti nyerah ka aku ngagai orang bansa Judah. Ukai, perintah aku ukai di dunya tu!” Jesus udah madah perintah ukai di dunya tu, tang Perintah Serga ti deka datai. Reti nya kitai tu mega ukai rayat tetap dunya tu, laban kitai rayat Perintah Serga ti deka datai.
No comments:
Post a Comment