Iya nanya, "KATI NUAN SAYAU KE AKU?"
Aku nyuat, "Pia meh, Tuhan!"
Iya nanya, "Kati enti nuan timpang, agi nuan sayau ka AKU?''
Aku bingung, aku merening ke lenggan, jari, kaki pia mega seluruh tuboh lalu aku ngerunding nama pengawa ti enda ulih digaga, aku nyaut, "Ukai mudah Tuhan, tang aku seruan sayau ke NUAN."
Tuhan nanya baru, " Enti semak nuan buta, agi enda nuan sayau ke semua perkara ti di gaga AKU?" Kati aku ulih sayau ke utai ti enda ulih dipeda? Aku ngenang ke semua orang buta ba dunya enggau maioh sida ti agi sayau ke IA serta agi sayau ke utai di gaga IA. Aku nyaut, " Ukai mudah aku ngerunding semua nyak, tang aku semampai sayau ke NUAN."
Tuhan majak ke tanya IYA, "Enti semak nuan benggal enda ulih ninga, agi ke enda nuan ninga jako-KU?" Kati aku ulih ningga utai enti semak aku benggal? Tang aku nemu. Ningga jaku Tuhan ukai semina ngena pending kitai tang ngena ati kitai. Aku nyaut, "Ukai mudah tang aku seruan deka ninga jaku NUAN."
Tuhan majak nanya, "Kati enti semak nuan bisu, agi ke enda nuan meri puji ngagai nama-KU?" Kati aku ulih muji Tuhan enti nadai di dinga leka. Aku bepikir, Tuhan deka kitai belagu meri puji ari ati enggau pengidup kitai. Pia mega muji Tuhan ukai mina ngena lagu, tang lebuh kitai dalam penusah kitai mega patut meri puji ngagai Tuhan enggau beterima kasih dalam gaya singkang pengidup kitai. Ngujung ke nyak aku nyaut, " Taja pan aku enda ulih belagu ngena mulut tang aku seruan deka ngemesai ke nama NUAN."
Ari saut nyak tadi Tuhan nanya baru, " KATI NUAN AMAT-AMAT SAYAU KE AKU?"
Enggau pemerani diri ditambah ati ti andal aku nyaut, "Ya Tuhan, aku chukup sayau ka NUAN laban semina NUAN Tuhan ti BENDAR ba dunya enggau ba serega!"
Ba runding aku, aku udah nyaut enggau chukup manah, tang....
Tuhan nanya, "ENTI BAKANYA NAMA KEBUAH NUAN NGEREJA DOSA?"
Lubah-lubah aku nyaut, "Laban aku mina mensia, aku enda chukup menyana (sempurna)."
"Enti pia, NAMA KEBUAH nuan ngelesap ke diri maya LANTANG? NAMA KEBUAH nuan semina besampi naka pemendar semina maya di tuntung penusah?"
Nadai leka saut agi ku, ti bisi mina ati mata.
Tuhan nambah agi:
"Nama kebuh semina belagu ba geraja tauka lebuh maya gerempuru?
Nama kebuah ngiga AKU semina lebuh meri sembah?
Nama kebuah besampi minta tuk minta nyak semina ngira diri empu?
Nama kebuah besampi minta nadai enggau ati ti takluk?
Ai mata nyau baka berai ba kuyu aku.
"Nama kebuah chukup malu nyebut nama-KU?
Nama kebuah nuan enda ngerembai ke berita Injil?
Nama kebuah lebuh penusah lebuh pemerinsa, nuan nyambak ba pangku orang bukai enda nuan ngira AKU bisi lebuh nyak?
Nama kebuah selalu ajak nulak lebuh nuan di beri peluang mela AKU?"
Aku nguji deka nyaut, tang nadai leka saut ti ulih aku beri.
"Nuan diberkat enggau pengidup.
Aku nempa nuan ukai ambi ke dibasau.
Aku merkat nuan enggau pengelandik kena mela AKU, tang nuan nadai ati.
Aku udah naruh jaku-KU dalam ati nuan, tang nuan enggai mereti.
Aku udah bejaku ngagai nuan tang pending nuan ditutup.
Aku udah ngayan berkat ti naka pemaioh tang mata nuan enda berati ke semoa nyak.
Aku udah nganjung nembiak Aku merangsang enggau nginjil nuan, tang nuan duduk lantang ati meda sida ia enda dikebuh.
Aku udah ninga sampi enggau udah nyaut semua pinta nuan."
"KATI AMAT NUAN SAYAU KE AKU?"
Aku enda agi nyaut.
Aku udah chukup malu.
Aku enda ulih bekelikoh agi. Nama agi utai ulih di padah aku?
Enggau sabak aku semina besampi minta,
"Ampu meh aku Tuhan.
Aku enda patut nyadi anak NUAN."
Tuhan nyaut, "ANAKKU, nyak meh PENGASIH AKU."
Nama kebuh NUAN mengkang ngampun penyalah aku?
Nama kebuh NUAN naka ia penyayau ke aku?"
Tuhan nyaut, "Laban nuan meh rengka di tempa AKU. Nuan meh anak AKU. AKU enda kala neju ka nuan kediri, enda kala muai nuan. Lebuh nuan nyambak, AKU sinu ati nyambak enggau nuan mega. Lebuh nuan gaga ati lantang ati, AKU mega gaga ati enggau nuan. Lebuh nuan labuh terterap singkang, aku ngangkat ke nuan. Lebuh nuan lelak, aku ngema nuan. AKU deka seruan enggau nuan nyentuk ke pengujung ia, pia mega AKU deka sayau, rindu ke nuan belama-lama ia."
Enda kala aku nyambak ngemendar nyak sebedau tuk, nyau baka berai ai mata.
Kati meh aku ngelama tuk naka ia suam-suam aja.
Kati meh aku ngelama tuk naka ia ngemedis ke ati IA.
Aku nanya agi, "Ni naka NUAN sayau ke aku?"
Tuhan ngayan kedua-dua piak jari IYA, aku meda abi telih laban paku ba kedua-dua piak jari IYA.
Aku alu ngerembah ke diri besugang ba kaki Jesus Kristus, Penyelamatku.
Tuk meh keterubah ia dalam idup aku, naka ia pemendar besampi enggau sabak-sabak.
Halluyah. Puji Tuhan. Enti menyadi diberkati enggau jerita tuk alu deka ngasai ke KRISTUS bisi dalam ati menyadi enggau idup bejalai enggau TUHAN JESUS.Aku mai menyadi besampi nitih ke sammpi tuk:-
Tuhan Jesus, aku nemu aku orang ti bedosa ti enda ulih nulong diri empu. Aku beguna ke Nuan. Aku ngaku aku udah salah ngalaban Nuan. Dituk aku minta, darah Kristus nuchi mersi semua penyalah aku. Diatuk mega aku minta Nuan, Tuhan Jesus, datai masuk ke dalam ati aku. Aku nerima Nuan nyadi Tuhan enggau Raja Penebus semina Nuan siko dalam idup aku, Aku percaya Nuan meh Jesus Kristus nyak Tuhan ti udah mati ari ketiga angkat idup baru jadi penebus enggau nuchi idup aku. Terima kasih Tuhan, di dalam nama Tuhan Jesus Kristus aku besampi.Amin!
No comments:
Post a Comment