Pasal pengudus (Mark 7: 1-8, 14-15, 21-23)
Ari ni penatai penyai ti bisi dalam dunya tu? Nama kebuah mensia belaya, begedi lalu merinsa pangan diri? Tu utai ti ditanya semua mensia; lalu saut ti diberi orang mayuh macham.
Pengarap Kristian mega bisi ajar ke diri empu pasal tu. Bup Kudus madah lebuh Allah Taala ngaga dunya, semua utai ti digaga iya manah magang. Tang utai ti digaga Allah Taala rusak laban dosa; lalu dosa tu nyadi bepun ari mensia nulak peneka enggau jalai Allah Taala. Nya alai dunya nyadi tempat ti ngembuan pemetang, pemedis enggau pemerinsa.
Kitai ti anembiak Jesus ngembuan penemu madah ka penusah mensia bepun ari dosa. Tang bida antara kitai enggau orang bukai, iya nya ba senentang kati ko kitai mutar ka penusah nya. Nya alai Injil ti dibacha kitai pagi tu beguna bendar: iya ngenang pasal Jesus ti besangkal penemu enggau orang Parisi pasal ni jalai ti manah di kena ngelaban enggau muai dosa.
Sapa orang Parisi tu? Orang Parisi tu ukai padri tauka imam. Sida tu orang biasa ti nguji nitih ka adat Allah Taala enggau naka ulih. Tuju sida iya nya nguji mai orang mayuh sama talok ka adat Allah Taala, sama ngereja utai ti manah dikena ngemesai ka nama Tuhan. Reti nya orang Parisi tu ukai orang jai taja pen kitai suah ninga sida belaban penemu enggau Jesus.
Nitih ka penemu sida, tiap iko orang enda tau enda ngembuan pengudus baka sida imam tauka padri di Jerusalem. Nya alai semua adat ti diberi ngagai bala imam enggau padri mega dititih sida magang. Nyema ka jaku, nitih ka adat Sempekat Lama, iman tauka padri enda tau enda masu jari enggau chara ti betul sebedau sida makai roti ti dienjok nyadi piring ba rumah sambiang. Lalu orang Parisi mega lalu ngena adat nya lebuh sida makai di rumah tauka ba dini endur. Sida ukai semina ngena adat nya ba sida empu; sida mega ngasuh semua orang Israel ngena adat nya lebuh sida makai.
Nama kebuah sida ngereja utai tu? Orang Parisi nyangka dosa tauka utai ti ngamah mensia datai ari luar. Mayuh utai ti dikira sida tau ngasuh orang enda tuchi: nyema ka jaku, enti sida negu bangkai mensia tauka jelu, negu tauka bepansa enggau orang ti sakit lan tauka bisi penyakit kulit. Lalu orang ti udah ‘kamah’ baka tu enda tau datai ngadap Allah Taala enti sida enda dituchi dulu. Nya alai orang ti dikira kamah mesti nuchi diri ngena ai nitih ka letak adat sebedau besambiang. Lalu utai ti tau ngasuh orang kamah tauka bedosa ukai semina utai ti dipegai tang diempa mega. Lalu nitih ka adat Sempekat Lama sida enda tau makai dagin babi, tauka ikan ti enda betisik baka ikan keli tauka baong, tauka sekeda macham burong. Tuju iya adat tu digaga menya, iya nya awak ka bansa Israel dikelala orang - bansa ti lain adat tauka chara idup ari bansa bukai. Tang orang Parisi nambah ka adat ti udah diletak – datai ka adat masu periok enggau pinggai-mangkuk pen bisi. Nitih ka penemu sida enti utai nya enda dibasu enggau betul, orang ti makai ngena perengka nya deka nyadi kamah lalu bedosa.
Nama kebuah sida ngaga adat bansa tu? Tuju sida nya endang manah – awak ka bansa Israel idup nyadi orang ti kudus, lain ari bansa orang bukai. Ko penemu sida, Allah Taala ngasuh kitai mensia nyadi orang kudus, tang iya enda madah ka kati ko chara kitai nyadi kudus; nya alai adat digaga awak ka orang ulih nemu bakani ko chara tau nyadi kudus. Nya alai sida ngaga mayuh macham adat ti diasuh sida titih orang mayuh. Tang penyalah sida - iya nya sida nyangka dosa enggau penyai ulih buai tauka seliah ngena adat ti digaga sidaempu. Kadang-kadang kitai Kristian pen bisi bansa tu. Sekeda kitai nyangka dosa nya bepun ari utai ti dipegai, diempa tauka di-irup (reti nya utai ti ulih dipeda enggau mata). Lalu kitai ngaga macham-macham adat dalam gerija, nyangka enti kitai ulih nyeliah utai tu – kitai ulih ngelaung dosa lalu idup dalam pengudus. Nya meh baka penemu sida Parisi tu.
Nama penyalah penemu ti bansa tu? Penyalah iya – laban penemu ti bansa tu semina ngira utai ti nyadi ba luar tubuh aja – ukai iya ti di dalam. Kedua, sida nyangka adat ti digaga sida empu sama pemesai enggau adat Allah Taala. Lebuh kitai ngaga adat mensia sama sebaka enggau pesan Allah Taala, iya deka pulai ka penanggul. Iya tau semina ngasuh kita ngereja utai nitih ka adat ti digaga mensia, lalu enda ngasi ka adat Allah Taala empu. Lalu Jesus ngenang jaku nabi Isaiah (Mark 7: 6-8) ti madah ka ketegal nya sida nyadi orang pengelakar. Tu ukai reti nya adat ti digaga mensia nadai guna. Tang ba kitai Kristian, adat Allah Taala patut ngalah adat ti digaga mensia.
Utai ti terubah dipesangkal Jesus enggau orang Parisi iya nya pasal adat orang Parisi pasal masu jari sebedau makai. Tang datai ba Mark 7: 14-15 & 21-23, kitai ninga pekara ti bekaul enggau utai ti tuchi enggau utai ti kamah. Bup Kudus nadai ngajar orang biasa masu jari nitih ka adat sebedau makai (tu adat ti diletak ngagai orang ti nyadi imam tauka padri aja, lebuh sida makai roti piring). Sempekat Lama amat enggau terang ngajar orang enda ngasuh sida makai dagin babi tauka jelu, ikan enggau burong ti dikira enda tuchi. Tang nama kebuah kitai tau makai utai tu diatu? Utai tu enda agi nyadi pemali laban Jesus udah datai ka dunya tu mai perintah Allah Taala: lalu berengkah ari nya semua utai berubah magang. Jesus datai madah ka adat ti dikena orang Israel ngasuh diri tuchi ba Sempekat Lama enda dikena agi, ukai laban adat nya salah tauka nadai guna; iya enda dikena agi laban Jesus udah datai nyelamat semua mensia. Ketegal penatai Jesus mensia enda agi dibagi nyadi dua bansa: bansa Israel (ti dipilih Allah Taala) enggau orang bansa bukai (ti bedosa); semua bansa mensia diatu tau nyadi anembiak Allah Taala magang.
Jesus ngajar utai ti ngamah mensia ukai utai ti tama ke dalam perut iya; utai ti ngasuh mensia enda tuchi iya nya utai jai ti pansut ari ati enggau runding sida (Mark 7: 20-23). Dosa ukai datai ari luar, ukai ari bansa, ukai ari peturun – iya datai ari penyai ti endang udah bisi dalam ati tiap iko mensia. Kati ko kitai muai penyai enggau dosa tu? Kitai nadai kuasa bukai kena mutar ka utai tu – ukai undang-undang, ukai perintah, ukai pemandai, ukai duit. Semina Jesus aja bisi kuasa ti nuchi ati lalu muai penyai ari kitai. Uji perunding ka tu: enti penusah dunya laban mensia enda pandai, Allah Taala tentu udah nganjung pengajar. Enti penusah dunya tu laban suntok duit, Allah Taala tentu udah nganjung pakar ekonomi; enti penusah dunya tu ketegal pengurang penemu teknologi, Allah Taala tentu udah nganjung scientist. Tang penusah kitai mensia ti bendar iya nya laban kitai kena pasong dosa – kitai beguna ka Pengelepas – Tuhan Jesus Kristus. Amen.
No comments:
Post a Comment