Jerita malam Krismas

Kala kita meda jerita TV,  A Christmas Carol? Dalam jerita nya bisi madah ka pasal siko apai tuai orang ti bangat kedekut sereta mangah, nama iya Mr. Scrooge. Iya tu endang cukup jai. Malam ketungkah deka Krismas bisi tiga iko roh datai ngagai iya, lalu ba pengujong jerita, iya berubah nyadi manah kategal utai ti di pandang bala roh nya ngagai iya. Tuju asal jerita tu lebih mandang ka pendiau dunya leboh nyambut hari Krismas. Nyadi jerita tu udah di ubah aku versi Kristian,, jalai jerita tu evangelistic kena aku mai bala kitai bekelala enggau Jesus Kristus.

Nyau jauh malam maya Krismas eve, di peda ari jauh bisi rumah pengumpol chukai agi benong gawa malam nya. Jam nyau ka pukul dua-belas, Mr. Scrooge agi benong ransing ngira duit iya ba dalam opis iya. Lalu kemaya nya bisi siko orang ka gawa enggau iya, orang gaji iya nya tadi benama Bob Cratchit. Bob Cratchit tu tadi orang ti dibayar iya enggau gaji tu chukop mit. Iya idup enggau penoh merinsa.

Bob Cratchit tama ngagai opis Mr. Scrooge. “Tuan Scrooge, ulih aku pulai kerumah? Udah laun amat diatu… bala aku sebilik nyau nganti aku pulai malam tu,” ko Bob Cratchit minta kasih kedeka pulai tumu. “Lapa?” ko saut Mr. Scrooge. “Kami deka nyambut pengada Tuhan Jesus, tuan. Nemu nuan…anembiak ka ada ba dulang chapi nya?” ko Bob Cratchit nampung randau saduai iya. Salji majak turun ba luar, nyau makin berasai chelap. “Aku enda nemu nama utai ko nuan tu, Bob Cratchit! Dunya aku semina DUIT aja – UKAI jerita dongeng!” ko Mr. Scrooge nganu Bob Cratchit. Lalu saut Bob Cratchit bejako enggau Mr. Scrooge ti benong nganu iya, “Iya UKAI jerita dongeng, tuan Scrooge!” Tunjuk Mr. Scrooge mua Bob Cratchit seraya bejako, “Nya jerita bula! Anang nuan ngelaban aku, Cratchit!”

Lalu saduai nyedia ka diri deka mupuk pulai ke rumah, Bob Cratchit nyingkau scarf iya ti begantung ba dinding nya. Mr. Scrooge mega nyingkau tupi iya ba atas meja, mua iya bangat ringat ngenang jako Bob Cratchit; nyau nyeling-nyeling Bob Cratchit enggau pemedis ati iya. “PENGIDUP MERUAN nuan bisi dalam jerita nya, tuan!” ko Bob Cratchit nampung randau seduai tadi. “Kati tau pengidup meruan AKU bisi dalam jerita anembiak mit nya? Nuan tu udah BEBAL – Cratchit!” ko saut Mr. Scrooge kasar.

“Tuan Scrooge… anembiak mit nya meh Tuhan Allah Taala ti udah nempa dunya, iya ti nurun nyadi mensia!” ko Bob Cratchit baru. Lalu malik ngagai iya Mr. Scrooge lalu bejako merak iya, “Sedar ka enda nuan jako nuan nya, Cratchit? Lapa Tuhan deka kiruh ka kitai mensia? Mensia tu jai pendiau ulah! Mensia tu semampai bedosa ba dunya! (Rome 3:10-19)”

Seduai iya mansang bejalai maya salji benong nurun, sepanjai jalai nya seduai majak becakah penemu senentang pengarap. Bob Cratchit nampung jako iya, ko iya, “Sama penemu nuan, tuan Scrooge. Bup Kudus mega madah utai ti sama munyi ko nuan. Munyi ditulis dalam Bup Kudus: ‘Nadai siko mensia ti lurus’ (Rome 3:10) ‘laban samoa mensia bela udah bepenyalah lalu jaoh ngejang ari mulia Allah Taala’ (Rome 3:23)” “Amat nya? Pia ko iya ney? Humm, aku enggai ninga agi rambai jako nya!” ko Mr. Scrooge, tang diatu udah tebuka mimit runding iya, celap agi asai ati iya ari ka tadi.

“Cratchit! Tuhan deka nimbang dosa aku?” Tanya Mr. Scrooge ngagai Bob Cratchit. “Oh, au tuan Scrooge. Iya deka meda samoa pengidup nuan ti ngaga dosa, nadai utai ulih di-lalai nuan ari Iya. (Hebrew 9:27; Matthew 10:26)” Ko Bob Cratchit nyaut utai tanya Mr. Scrooge. Mr, Scrooge nelan ai liur ninga utai ko Bob Cratchit lalu iya bejako “Selamat malam, Cratchit!” nanda ka diri iya deka mupuk. Ba pengujong jalai bepanga semak enggau tiang lampu ti benong terang, Bob Cratchit meri kertas surat ngagai Mr. Scoorge lalu iya bejako, “Baca tu, tuan. Iya ulih nyelamat ka nuan ari pengeringat Tuhan Allah Taala.” “Ko aku, SELAMAT MALAM, Cratchit!” saut Mr. Scrooge ringat. “Selamat malam, tuan” ko Bob Cratchit malas. Seduai bela pulai nitih jalai nuju rumah sida iya empu.

Bob Cratchit belagu pantun leboh iya bejalai nuju rumah iya. Sekali peda iya bisi kedai enda jauh ari rumah iya nya agi terang, agi buka. Lalu iya mansang tama kia deka meli utai di-empa bala sida sekayu bilik: “Bisi nyual itit serati nuan?” ko iya nanya taukey kedai nya. “Au bisi, Bob. Enda alah beli nuan itit serati tu.” Ko taukey nya nyaut iya. Taukey kedai nya nampung jako iya baru, “Cratchit! Kati meh nuan nupi bala kita sebilik enggau gaji ti chukop mit baka nya. Scrooge nya amat jai enggau nuan!” Lalu Bob Cratchit nyaut, “Oh Allah Taala semampai bisi meri nama utai deka kami. (Pilipi 4:19)

Rumah sida enda jauh ari kedai, ulih peda mata. Anak Bob Cratchit meda apai sida tama ngagai kedai nya lalu sida nitih, meda ari cermin luar kedai nya sida, meda utai kayam ti bisi di pandang ba atas meja dalam kedai nya. “Badas amat utai kayam nya!” Ko Tiny Tim anak Bob Cratchit ka lelaki. ”Au rindu aku meda anak patung nya!” Ko Annie anak indu Bob Cratchit nyaut utai ko menyadi iya Tiny Tim. Udah tembu mayar itit serati, Bob Cratchit lalu pansut ari kedai, dia iya tetemu ka anak iya dua iko benong ba luar cermin kedai lalu iya bejako, “Engkila ka utai kayam dia kita anak?” “Kami nemu kami miskin, apai, tang kami semina rindu mda iya aja, tau kenya kami apai?”  Ko tanya Tiny Tim enggau penoh budi basa ngagai apai iya. “Au nadai nya salah deh Tim.” Ko apai iya nyaut. Annie majak engkila anak patung nya lalu bejako, “Oh apai, badas endar anak patung nya!”

Sida anak beranak mupuk ari kedai lalu mansang pulai kerumah, salji turun enggau lebat. “Kami endang nadai maioh utai kayam, apai tang kami gaga ati kitai bisi bala diri sebilik.” Ko Tiny Tim ka betungguk ba bahu apai iya laban iya enda entu ulih jalai jampat kategal kaki iya timpang sepiak. “Amat jako nuan nya, Tim.” Ko saut Bob Cratchit ngagai anak iya, Annie bejalai berimbai enggau apai iya seraya apai iya megai lengan Annie ngena jari kanan iya. Datai sida ba rumah, “Peda nuan itit serati tu, indai Tim?” Ko Bob Cratchit ngayan ka bisi iya utai beli iya ba kedai tadi. “Au, Bob… besai amat itit serati nya. Aku deka mela iya enggau mayuh macham rempah ti tau ngasoh iya nyamai!” Ko saut bini Bob Cratchit. Sida anak ia pan serta nyebut, “Oh. Indai…gaga ati kami ninga!” Lalu sida lekik-lekik ketawa enggau pangan diri.

Ba dalam rumah sida begempuru semak enggau dinding ka udah di sedia sida api kena sida bela bekindu ngangat ka isi. Kucah-kucah sida berandau anak beranak, lalu sama bela meri tanda selamat enggau sida sekayu bilik. Ko Bob Cratchit, “Aku meri terima kasih ngagai Allah Taala ti udah ngintu kitai sebilik…aku sayau ka kita semoa!” sida anak bini iya nyaut, “Kami sayau ka nuan mega, apai.” Bob Cratchit enggau gaga ati mai sida meri selamat ngagai Mr. Scrooge, ko iya, “Aram kitai meri tanda selamat ngagai bos aku, tuan Scrooge?” Bini iya enda entu setuju lalu nyaut, ko iya, “Ampun ka aku Bob…Aku enggai meda orang tuai ka jai nya. Enda ulih tat aku agi!” lalu Annie nampung utai jako indai iya, ko iya, “Indai, kitai mesti besampi ka tuan Scrooge. (1 Timoti 2:1-3)

Ba maya ka siti endur, di luar kemaya nya udah penoh enggau salji, di peda ari jauh Mr. Scrooge benong bejalai cukok-cukok betungkat enggau kayu, dalam runding iya ngenang utai jako Cratchit ngagai iya. Bisi indai tuai siko merati ka Mr. Scrooge mansang semak iya, indai tuai tu bejako enggau sora ti mit penoh enggau pengirau ati “Apu…Nyin tuan Scrooge datai, Aku besampi ngagai Tuhan awak iya enda nganu-nganu!” Mr. Scrooge bejako kediri dalam ati iya empu, “Nama kebuah Cratchit nya meri rambai jako nya ka aku? Aku nyau BEGEDI KA IYA kategal nya! Kaban lama aku…Marley…nyau udah 10 taun udah mati. Aku arap iya ulih idup baru lalu madah ka utai ti amat ngagai Cratchit!” ko iya. Indai tuai nya tadi nyapa iya, “Mansa, tuan Scrooge.” Ko iya enggau munyi sora ti nangi. “Lapa?” Ko saut Mr. Scrooge enggau sora mangah!

Ko indai tuai nya nampung jako iya, “Tuan Scrooge…aku enda entu gerai diatu. Ulih aku minta tambah timpoh sepuloh ari kena mayar utang aku ba nuan?” Enggau mangah iya nyaut indai tuai nya, ko iya, “ENGGAI AKU! Indu tuai! Ka ke seminit pan aku enggai! Kedai nuan deka ditutup aku!” Lalu Mr. Scrooge lalu terus bejalai enda peduli ka indai tuai nya tadi. Udah nyau jauh mimit ari indai tuai nya, Mr. Scrooge nyau tegepang tekenyit ati kategal indai tuai nya nyerauh merak iya ari belakang, ko indai tuai nya “Allah Taala deka ngukom nuan! (Jako Dalam 17:5).” Tang Mr. Scrooge enda malik lalu nerus ka pejalai iya nuju rumah iya.

Ba moa pintu rumah Mr. Scrooge nya bisi utai lekat iya endang kena ngetok pintu, gamal utai nya baka pala singa. “Nyamai asai udah datai di-rumah.” Ko Mr. Scrooge. Lalu iya tekenyit baru, iya lalu bejako, “Nama utai tu? Pengetok pintu aku bebali gamal! APUUU!!! NYAU KA GILA ASAI AKU…aku deka ngenat ka diri ba katil!!” meda gamal pengetok pintu iya nyau bebali baka gamal antu sitan, lalu jampat iya tama ke rumah, lalu belanda ka bilik iya terus iya engkechit ngagai katil lalu bebungkur takut.

“Aku berasai selamat udah bebungkur tu. Udah aku tinduk malam tu aku enda mikir utai ti enda masuk akal bansa nya!” Ko iya maya nya. Ba masa iya ka sama, Tiny Tim besampi ka Mr. Scrooge ba di bilik iya empu, ko iya, “Tuhan, aku minta nuan nyelamat ka tuan Scrooge! (Mark 11:22-24) Leboh Mr.Scrooge jenak tinduk dia iya lalu bemimpi ka kaban iya ka benama Marley ti udah sepuloh taun udah mati, ko Marley dalam mimpi Mr. Scrooge, “Scrooge…dani nuan! Aku tu…Marley!” di peda Mr. Scrooge dalam mimpi, Marley tampak bendar enda lantang semengat iya, dipeda iya Marley nyau di ikat enggau rantai enggau baka udah diperinsa. Ko iya nyaut Marley, “Marley! Ari dini penatai nuan?” “Aku mati dalam dosa! Diatu aku benong nganti maya kena pechara, Tuhan deka ngukom aku belama masuk ka aku dalam neraka. (Pemandang 20:11-15) Ko Marley nusoi ka pendiau iya kemaya nya. “M-Marley…kati enggau aku deh?” Tanya Mr. Scrooge. Saut Marley, “Nuan deka kena ukom dua kali lipat ari aku Scrooge. Meda nuan meh aku enda lama agi!” dia semoa orang ka udah kala endur Mr. Scrooge jai pegari dalam mimpi iya lalu ngutuk iya, ko sida, “Aku minta tulong…tang nuan ketawa ka aku! Nuan ngancur ka idup aku Scrooge! Nuan nadai irau ka orang bukai! Anak aku lapar laban nuan! Allah Taala deka ngukom nuan!” Mr. Scrooge nyau majak takut, jantung iya nyau majak laju agi bepandam. Dia iya lalu ingat, ko iya, “Cratchit bisi nyimpan utai dalam kocek aku ko iya tau nyelamat ka aku ari pengeringat Allah Taala!”

Keruk iya dalam kocek ngiga kertas surat ti di beri Bob Cratchit ngagai iya leboh ba jalai bepanga tadi. “Ahh…dah temu aku! Ko iya enti aku nerima Tuhan Jesus nyadi ka juruselamat aku, Tuhan deka ngampun ka penyalah aku (John 3:36).” Ko Mr. Scrooge bejako maya udah tetemu ka kertas surat nya. Lalu iya besugang udah nya iya nunduk kediri besampi enggau ngesal ati, ko iya, “Oh, Tuhan Jesus…aku nerima nuan…amat-amat nerima! Tulong meh selamat ka aku! Aku pecaya Nuan mati ba kayu regang kategal aku. (Rome 5:8) Ampun samoa penyalah aku. Ampun ka aku Tuhan…Ampun Tuhan!”

Lalu kemaya nya datai runding ka manah ngagai iya munyi sora orang betelai madah ka Mr. Scrooge patut ngaga kerja manah! Enggau gaga ati iya bejako, ko iya, “Allah Taala, nuan udah ngelepas ka aku ari semoa dosa! (John 8:32, 36) Aku udah tuchi bersi! Aku deka ngaga kereja manah diatu. Aku deka nebus semoa penyalah aku ngelama tu, Tuhan! (Luke 19:8)” Mr. Scrooge lalu berumban begari lalu pansut ari rumah iya, lalu terus iya ke luar. Bejalai iya nuju kedai enda jauh ari rumah Bob Cratchit enggau ati ti gaga, tama iya kedalam kedai nya iya pan lalu bejako, “Jampat, sua ka aku manuk belanda ti paling besai dalam kedai nuan tu enggau semoa utai kayam ti paling badas ba atas meja nya! Saritu meh ari ti chukop manah!” Taukey kedai nya nyau berasai heran meda perangai Mr. Scrooge nyau berubah nyadi manah baka nya, nya alai iya lalu bejako munyi tu, “Nuan kah nya, tuan Scrooge?” lalu Mr. Scrooge nyaut iya, “Ukai kaban, Scrooge ka lama udah mati. Diatu aku udah nyadi mensia baru maya aku nerima Tuhan Jesus. (2 Korint 5:17)”

Mr. Scrooge nampung jako iya baru ngagai taukey kedai nya, ko iya, “Aku deka kita nganjung semoa utai tu ngagai rumah Bob Cratchit… diatu ah! Aku enda peduli enggau rega iya.” Lalu taukey kedai nya nyaut, “Au, tuan Scrooge. Diatu kami nganjung iya…tuan Scrooge!” lalu berumban sida kuli taukey kedai nya nyimpan utai ti udah di bayar Mr. Scrooge lalu ngirum semoa utai nya ngagai rumah Bob Cratchit. Mr. Scrooge mansa baru jalai endur iya betemu enggau indai tuai ka tadi ti minta tangguh mayar utang iya ba Mr. Scrooge. Ko Mr. Scrooge bejako enggau pengelantang ati, ko iya, “Indu tuai…ampun ka penyalah aku. Utang nuan udah dibatal ka aku!” Indai tuai nya nyau gaga ati ninga utai ko Mr. Scrooge, lalu iya malas jako iya ngagai Mr. Scrooge, “Oh, terima kasih, tuan Scrooge, terima kasih! Berkat Tuhan enggau nuan!” Lalu saut Mr. Scrooge, “Au nya meh. Sama enggau nuan mega!”

Iya nerus ka pejalai iya nuju rumah Bob Cratchit, nyau enda lama iya bejalai lalu iya datai, udah iya datai di rumah Bob Cratchit, iya lalu tama ngaga rumah nya lalu terus betemu moa enggau Bob Cratchit, ko Mr. Scrooge bejako enggau iya Bob Cratchit, “Cratchit…Aku bisi mai pemeri ka anak-anak nuan…lalu saritu aku ka niki ka gaji nuan empat kali lipat!” Nyau tekenyit Bob Cratchit meda Mr. Scrooge nyau nyadi manah, ko iya, “Nuan….nama ko nuan? Amat nya, tuan? Terima kasih, tuan!” Bini Bob Cratchit nyau heran mega lalu iya bejako ngau nyawa ti mit, ko iya, “Nyau ka enda pecaya aku!” Mr. Scrooge ninga utai ko Mrs. Cratchit lalu iya mansang ngagai iya ngenjok ka manuk belanda ngagai iya, ko iya bejako, “Mrs. Cratchit tu bisi pemeri aku ka nuan!” Ba tempat enda jauh enggau Mrs. Cratchit nya dia Annie benong main anak patung ti diberi Mr. Scrooge ka iya, anak patung nya ti di kerindu iya ti di peda iya ba kedai tadi, ko iya “Aku rindu amat ka anak patung tu!” Lalu Mrs. Cratchit nyaut utai ko Mr. Scrooge, “Oh, tuan Scrooge besai amat manuk belanda nuan nya! Nuan mesti enggau kami makai malam!”

Salji nyau majak nurun, udah menoh tengah laman rumah Bob Cratchit, nyau burak magang utai peda. Mr. Scrooge nanya Tiny Tim, “Kati pendiau nuan Tiny Tim?” Ko Tiny Tim nyaut iya, “Aku udah besampi ka nuan, tuan Scrooge! (Pilipi 4:6-7)” Di saut Mr. Scrooge, “Terima kasih…Tiny Tim! Allah Taala udah nyaut sampi nuan.” Mr. Scrooge nampung jako iya lalu malik ngagai Bob Cratchit, “Bob, kitai deka mai Tiny Tim ngagai doctor ti paling landik berubat ba menoa tu.” Bob Cratchit nyaut enggau gaga ati, “Terima kasih, tuan Scrooge!” Mrs. Cratchit bediri semak enggau laki iya, iya pan bejako, “Tiny Tim deka gerai, ila!” Annie pan ke bediri enda jauh ari nya, iya pan nanya Mr. Scrooge, “Tang tuan Scrooge… ne hadiah nuan empu deh?”

Ko Mr. Scrooge nyaut enggau penoh tuchum, “Aku udah nerima utai diberi Allah Taala ka aku…pengidup ti meruan belama iya, maya aku nerima Jesus nyadi juruselamat aku. Diatu aku SAYAU KA SEMOA ORANG… diatu aku bisi pengelantang!” Annie ketawa nyaut utai ko Mr. Scrooge, ko iya, “Oh, tuan Scrooge aku amat gaga ati nuan ila ngagai serega begulai enggau kami!” Mr. Scrooge nyaut, ko iya “Pia meh anak…nya utai deka aku!” Mr. Scrooge nyagu ka Tiny Tim atas bahu iya, Tiny Tim bejako lalu meri berkat enggau sida semoa, “Berkat Tuhan diau enggau kitai selalu!” Ko Scrooge nyaut, “Iya udah meri berkat Tim!” nyadi diatu Mr. Scrooge udah diau dalam perintah serega, kati baka kita deh?