Pengidup mensia, enti iya disimpul ngena siti ayat tau dikira kitai baka orang ti bejalai nengah jalai. Kitai ti idup tu baka orang ti bejalai mansa utai: utai ti diasai dalam pengidup berubah ari siti ngagai siti: ari pemedis ngagai penyamai; ari penusah ngagai pengaga; lalu iya mega tau bekalih ari pengelantang ngagai penusah. Lalu pejalai kitai tu berengkah ari kitai ada kelia datai ka kitai mati, lalu disambung udah kitai ninggal ka dunya tu.
Saritu kitai begempuru ba gerija baka ti selalu digaga kitai maya Palm Sunday: kitai nerima daun regang. Lalu beserimbai enggau tu kitai mega ninga cherita pasal Jesus ti tama ngagai nengeri Jerusalem, nepan siko keledai. Cherita tu ngenang pasal Jesus ti bejalai nengah jalai ti teleba ditengah iya, lalu ngagai nengeri ti teleba digaga iya. Bala murid Jesus mega udah suah nemuai ngagai Jerusalem, lalu udah suah nengah jalai ti ditengah sida nya. Sida nemu maya Gawai Paska tu, nengeri Jerusalem deka penuh laban beratus-ribu iko mensia ti datai ari genap bengkah menua.
Jalai nya suah ditengah, lalu nengeri ti digagai mega ditemu; tang sekali tu tuju pejalai sida kin jauh bendar lain. Jalai enda berubah, lalu nengeri meruan sebaka; tang utai ti deka nyadi lain ari ti udah. Taun-taun ti udah Jesus bejalai kaki enggau murid iya ngagai Jerusalem. Lalu sekali tu Jesus ngasuh murid iya nyendia ka siko keledai awak ka ditepan iya lebuh iya tama ngagai Jerusalem. Ngelama tu orang enda kiruh lebuh iya tama ka Jerusalem, tang sekali tu mensia begau meda penatai iya, lalu manjong, “Berekat ka iya ti datai dalam nama Tuhan!”
Bala murid Jesus teleba enggau jalai nya laban iya endang enda berubah. Tang utai ti nyadi dalam pejalai sida sekali tu lain ari ti udah, lalu semina Jesus aja nemu utai ti deka nyadi. Iya nemu pasal keledai ti deka ditepan iya. Lalu siti utai ti nyelai iya nya Jesus milih anak keledai ti enda kala ditepan orang. Nama kebuah Jesus milih anak keladai bansa nya? Laban nitih ka Adat dalam Sempekat Lama, semua utai ti diberi kena ngereja pengawa Allah Taala mesti baru, lalu enda kala dikena orang.
Lebuh dua iko murid datai ba endur ti ko Jesus, seduai tetemu ka keledai nya, lalu utai ti nyadi mega sebaka enggau utai ti udah disebut Jesus. Seduai lalu mai keledai nya ngagai Jesus, ngengkah ka serayong atas keledai nya endur Jesus duduk. Kuda ti enda kala ditepan orang siga. Enti kita nguji ka nepan kuda ti bansa nya, semina ngiga penusah tauka pemedis. Lalu keledai lebih agi siga ari kuda. Tang lebuh Jesus duduk atas belakang keledai tu, iya enda engkasak tauka takut taja pen orang mayuh begau. Keledai nya, taja pen iya jelu, ngelala sapa Tuhan Jesus.
Orang mayuh sama nyempulang Jesus ngagai Jerusalem, tang semina Jesus aja nemu reti pejalai nya. Lebuh iya duduk atas keledai nya, iya nemu kini penunga diri. Iya nemu, sari nya orang mayuh begau nyambut penatai iya, tang lima hari udah nya sida deka manjong nyebut, “Regang iya, regang iya!” Sari nya sida nganchau serayong enggau dan kayu ba jalai ti ditengah iya, tang lebuh Hari Lima sida semina bediri ba tisi jalai ngemata ka iya nyan regang ngagai Golgota. Orang mayuh nemu jalai enggau nama ti nyadi maya nya, tang Jesus nemu penunga pejalai diri enggau utai ti deka nyadi udah nya. Nama reti cherita tu ba kitai kemaya hari tu?
Terubah iya tu, iya ngayan pasal pengerindu Jesus ka kitai. Jesus sengaja nengah jalai ti nuju pemedis enggau pemati awak ka nyelamat kitai. Iya mega dikena nunjok pasal pengamat jaku Tuhan ti dalam Bup Kudus. Sekariah 9: 9 udah nyebut utai tu deka nyadi lebuh iya ngenang pasal rajah ti deka datai di Jerusalem nepan atas anak keledai.
Kedua, pejalai tu mega lain ari pejalai bukai. Kitai ti udah kala mai kerita ari Limbang ka Kuching tauka ari Kuching ka Limbang, kitai tau ngumbai diri udah nemu jalai. Tang taja kitai nemu jalai, kitai enda semesti iya nemu nama utai ti deka nyadi tiap kali kitai nengah jalai nya. Kitai tau nyendia perengka ti deka dibai – ai, minyak, bekal, duku, spanner, lampu pichit, duit – tang perengka ti dibai enda semesti iya nyelamat kitai. Baka nya mega lebuh kitai berunding ka pengidup kitai empu. Kitai tau ngaga perambu, belajar ka penemu, besimpan ka duit, bebeli ka reta – tang utai nya mega enda nentu ka pemujur pengidup kitai. Iya ti bendar kitai enda tentu nemu pejalai diri. Enti pia, nama utai ti patut dikerja kitai? Kitai bepanggai ba iya ti nemu – iya nya Tuhan Jesus. Laban iya ti bendar pengidup kitai tu nya pejalai enggau Jesus Kristus, lalu penunga pejalai kitai iya nya perintah iya di serga.
Ketiga, cherita tu madah ka taja Jesus nemu pejalai tu mai ngagai pemedis enggau pemerinsa, Jesus besedia nerima iya. Mayuh bendar mensia di dunya tu semina ngira pasal penyamai enggau pengelantang diriempu, lalu enda ibuh ka orang bukai. Ba sida, pengidup tu endur be-ambi ulih ka utai ti nguntong diriempu. Cherita pasal penemuai Jesus ka Jerusalem ngingat ka ka kitai – kitai ukai semina idup ka diriempu. Iya madah ka pengidup kitai tu bisi kaul enggau anak, laki-bini, pangan, kaban, enggau orang bukai ti begulai enggau kitai – lalu nyengkaum munsuh kitai. Nadai siko kitai tu digaga Tuhan ka penguntong kitai empu aja.
Tang ati ti semina berunding ka diriempu enggau pengerangka nya endang bisi ba tiap iko kitai ti bedosa. Tu utai ti suah mai pengerusak ngagai kaul kitai mensia, lalu kadang-kadang iya ngerusak diriempu. Nya alai kitai dilalau awak ka kitai ingat – pengidup aku ukai semina ka aku empu; iya bekaul enggau Jesus Kristus. Pengidup nuan ukai pasal nuan – Jesus Kristus udah meri nyawa diri mati ba regang awak ka pengidup nya tau nyadi meruan. Uji perunding ka tu: nama reti pengidup ti nadai Kristus? Pengidup ti nadai Kristus nya pengidup ti meruan dalam dosa! Enti enda ari pengawa Jesus Kristus, aku meruan orang bedosa ti patut pulai ka neraka. Tang kebuah pengidup tu bisi reti laban Jesus udah nebus iya ngena pemati iya empu (1 Korint 6:19-20). Pengidup orang Kristian nya pengidup ti udah dibayar Jesus ba kayu regang.
Nama reti pengidup ti udah nerima pengampun? Reti iya – kitai udah nerima pengampun ari Allah Taala, ukai laban kitai manah, nelap, tauka lurus. Kitai nerima pengampun laban Allah Taala rindu serta kasih ka kitai. Lalu kitai ti udah nerima pengampun patut besedia ngampun orang ti udah salah ngelaban kitai. Kitai mega ngampun laban pengidup tu pelajai ti jauh, lalu utai ti dibai kitai udah chukup berat: nya alai nadai kebuah deka ngiruh diri ngema pengeringat enggau pemedis ati tauka dendam enggau orang ti salah ngelaban kitai. Aku ukai madah ngampun orang tu utai ti mudah. Enti iya mudah Jesus enda mati ba regang ketegal dosa mensia. Tang kitai ngereja tu laban kesatu, kitai empu udah diampun. Lalu kedua, tu utai ti diasuh Tuhan kerja kitai. Tu meh reti nyadi anembiak Tuhan tauka nyadi murid Jesus: kitai ngasi ka Iya ti dititih kitai. Lalu kitai nitih laban Iya ti ngulu kitai nemu penunga pejalai diri.
Maya nya suba Jesus mansang deka tama ka nengeri Jerusalem. Saritu, Jesus mansang lalu deka tama ka dalam ati kitai. Tang enti kitai majak ka penemu diri, lalu ngira ka penemu kitai nya lebih manah ari penemu Tuhan, Jesus enda ulih tama ka dalam ati kitai. Tang enti kitai ngaku diri enda nemu penunga pejalai diri, lalu minta iring Tuhan – Tuhan Jesus besedia ngulu kitai ngagai endur semina Iya aja ti nemu.
Nadai siko kitai nemu utai ti ka nyadi pegila-lusa. Kitai tau ngaga perambu, besedia ka tu tauka nya, tang Tuhan tau bisi perambu ti bukai ba kitai. Kitai tau nengah jalai nya pulai-mansang tiap hari baka orang bukai, tang lebuh kitai bejalai serta enggau Jesus, pejalai kitai berubah.
Saritu, lebuh kitai ngerami Palm Sunday, kitai ingat ka iya ti udah bejalai dulu ari kitai – nuju pemati enggau pemerinsa awak ka nyelamat kitai. Nya alai kitai bisi jalai ditengah. Enti enda, meresap kiba-kanan meh kitai, enti enda tesat. Lalu kitai ti benung bejalai nengah jalai Tuhan patut ingat: pengidup kitai tu ukai agi di-empu kitai tang enggi Jesus. Lalu kitai idup ukai semina ngira utai dunya tu aja: kita ngira perintah serga ti dituju kitai nya. Baka nya mega, laban kitai tu orang ti udah nerima pengampun, kitai patut besedia ngampun orang ti bedosa ngelaban kitai. Lalu laban kitai udah ngembuan pengidup ti diberekat Tuhan, kitai mega besedia dikena Tuhan merekat pengidup orang bukai ti begulai enggau kitai.
Enti kita bisi ka gerija saritu lalu nerima regang daun, dipeda mata iya semina daun aja. Tang iya ngembuan reti ti besai – iya ngingat ka nuan pasal utai ti udah digaga Jesus ka nuan.
No comments:
Post a Comment