Masmur 23

Masmur 23 nya Masmur ti suah bendar dibacha orang. Iya udah digaga nyadi lagu lalu; diajar ngagai anembiak Sekula Hari Minggu enggau dikena sambiang maya orang rabat. Masmur tu ngenang pasal pengibun domba enggau jelu iya.

Sekeda kitai ti kala bejalai ngagai menua jauh baka England, Australia enggau New Zealand udah meda jelu bedus tu idup-idup. Menua kitai tu mega bisi nupi bedus tauka domba tang ba ladang sawit. Taja pen kitai kala meda bedus kitai bisi penanggul mereti ka pengawa orang ti nyadi pengibun domba di menua Palestine lain ari chara kitai nupi bedus ditu. Nya alai aku ngarap ka utai ti diterang aku ditu tau nulong kita nemu ka pemesai reti Masmur 23 tu ba kitai ti bisi pengarap ba Allah Taala.

Masmur 23 tu dipelaba ka ditulis Raja David. Lalu Raja David udah bekerja nyadi pengibun domba apai iya lebuh iya agi biak. Nya alai lebuh iya bejaku pasal Tuhan bansa Israel, iya manding pengasih Tuhan baka siko pengibun domba ti manah. Nitih ka utai ti udah diasai iya, iya nemu pengidup domba bepanggai ba penyiru orang ti ngibun domba. Enti pengibun domba nya jai, domba mega merinsa idup. Tang enti pengibun nya manah, domba deka di intu enggau manah – chukup utai empa, ai irup, lalu dijaga ari utai ti tau nganu sida. Nya alai aku mai kitai berati ka 6 iti ayat ba Masmur 23 tu:

1Tuhan ti pengibun aku: aku bisi semua utai ti dipeguna aku: Ayat tu ngenang pasal Allah Taala ti Pengibun Domba, ti ngintu domba iya enggau manah lalu meri iya sida semua utai ti diguna sida. Ayat tu madah ka Tuhan kitai meri ka kitai semua utai ti dipeguna kitai, ukai semua utai ti dikedeka kitai. Paul ba Pilipi 4: 11-12 nulis munyi tu: “Aku bejaku munyi tu; ukai laban aku enda dipeguna agi; aku udah belajar enda tau enda tepantup ati enggau utai ti dikemisi diri. Aku nemu asai bakani lebuh nadai utai, enggau bakani asai lebuh utai mayuh enggau belaloh. Aku udah belajar ka utai tu ngambika di sebarang endur, barang maya, aku tau puas ati, sekali ka aku lebuh aku kenyang tauka lapar, tauka lebuh maya aku bisi mayuh tauka nadai.” Ba ayat 19 iya lalu nulis munyi tu: “Lalu Allah Taala aku, deka meri semua utai ti dipeguna kita, nunda ka pengeraja mulia iya dalam Jesus kristus”. Ingat: Tuhan ti meri semua utai ti dipeguna orang Israel, nya Tuhan ti meri utai ti dipeguna bala rasul, sida ti sakit enggau seranta: Tuhan tu mega deka meri ka kitai semua utai ti dipeguna tubuh enggau semengat kitai diatu.

Jesus, ba John 10: 1-18 mega bejaku pasal iyaempu ti pengibun domba ti ngintu domba iya enggau manah. Pengibun domba ti manah rindu ka domba iya. Iya nadai pengawa bukai – tang semina nentu ka domba bisi pemakai ti chukup, ai irup ti chukup, dijaga ari jelu bukai tauka penchuri. Iya nyendia ka kandang endur jelu nya tindok, ngubat jelu enti sida bisi sakit tauka digigit indu utai. Iya ngibun domba iya ari pagi datai ka malam.
Ba John 10: 7 Jesus bisi madah ka diri pintu kandang domba. Udah semua domba dibai ke dalam kandang, pintu ditutup, lalu pengibun domba deka tindok ba mua pintu kandang nya – jelu bukai tauka mensia ti deka tama ke dalam kandang nya enda tau enda mansa pengibun domba nya. Nya meh baka Tuhan Jesus ti pengibun kitai – iya nyaga kitai maya kitai dani enggau tindok.

2Iya ngasuh aku belelak ba padang ti manah: Domba tauka bedus tu jelu ti mudah bendar takut, lalu sida enggai diau jenuh enti sida takut. Nya alai pengibun domba enda tau enda nentu ka nadai utai ngachau bedus. Kitai mensia mega baka bedus: mudah bendar takut tauka irau enti kitai ninga berita ti enda manah. Lalu utai ti suah agi ngenakut ka kitai tauka ngasuh kitai irau ati, iya nya utai ti enda ditemu kitai tauka diadang kitai. Kitai ti bisi pengibun ti Manah, nadai kebuah kelalu takut tauka irau ati pasal utai ti nyadi ngelingi kitai – laban Tuhan bisi semak kitai.

Bedus mega enda ulih diau jenuh enti sekeda bedus ti bukai belaya enggau pangan diri. Enti manok – sida bepantok ka diri sama diri, bedus betandok enggau pangan diri laban berebut ka tempat endur ngulam rumput. Pengawa pengibun domba iya nya ngerara sida belaya, lalu mai sida mindah ngambi ka enda berebut ka rumput ti diulam. Kitai mensia selalu baka nya – orang ti nadai Tuhan nyadi ka Pengibun sida endang selalu belaya, berebut kuasa, berebut ka penudok, berebut ka pengaya –betandok tauka bepantok diri sama diri. Lalu kitai ti di ibun enggau di-iring Allah Taala, patut diau dalam pemaik enggau selamat di dunya tu.

Bedus mega enda ulih diau jenuh enti iya lapar. Kitai enda tau enda ingat, di menua Palestine rumput enda baka rumput kitai di menua tu. Rumput nya betumpok-tumpok lalu tusah digiga laban menua nya padang pasir. Nya alai pengibun domba enda tau enda mai sida mindah berari datai ka sida chukup rumput diulam. Kitai ti lapar semengat mega enda ulih diau jenuh – kitai selalu kasak-kasak ngiga utai kena ngemantup ka penengok kitai ati nya – ngiga utai ti betul, ti lurus, ti mai pengelantang tauka pengaga. Pengawa Tuhan kitai iya nya ngiring kitai ngagai endur ti alai semengat kitai tau ditupi, enggau endur ti meri pengelantang enggau pengaga ti meruan.

“Iya ngulu aku ngagai danau ti sunyi, ai ti beresi”: Bedus enggai ngirup ai ari sungai ti deras tauka ba endur ti inggar. Nya alai pengibun bedus enda tau enda nekat ai sungai ba endur sida ngirup awak ka ai nya enda deras bejalai; tauka ka iya ngulu sida ngagai danau tauka pegong. Tu meh utai ti dikerja Jesus - iya ngangau kitai datai ngagai iya ngambika kitai badu aus; lalu ko iya ba John 7:37: “Barang sapa ti aus datai ngagai aku lalu ngirup.”

3Iya meri ka aku pengering ti baru: Bedus ngembuan bulu tebal, lalu enti iya kelinchir, nya ngujung ka iya gali telentang ba tanah lalu kaki iya ranggak-ranggak katas; bedus tu enda ulih ngangkat diri agi. Lalu enti iya diteju baka nya kelalu lama, iya deka mati. Nya alai enti pengibun tetemu ka bedus telentang ba tanah, iya ngalih ka bedus nya, ngurut kaki iya, awak ka darah bejalai baru ba kaki iya, nya baru ngangkat iya bediri baru.

Penulis Masmur dipelaba ka ingat ka utai tu lebuh iya nyebut “Iya meri ka aku pengering ti baru”. Nya meh baka Tuhan enggau kitai. Lebuh kitai labuh, nadai daya ngangkat ka diri, Tuhan dalam pengasih iya, deka nulong kitai angkat. Dalam Injil kitai ninga orang ti labuh, tang diangkat ka Jesus – Sakius, ti pengumpul chukai; Maria Magdalin; Peter ti udah tiga kali madah ka diri enda ngelala Jesus. Lebuh kitai ngaga penyalah, Tuhan ngampun kitai; lebuh kitai tesat jalai – iya mai kitai pulai baru.

Iya ngiring aku nengah jalai ti ngena nunda ka semaya iya (3b). Jelu domba, enti iya diteju ngulam rumput kediri, iya deka ngulam rumput nya datai ka urat. Nya alai pengibun bedus enda tau enda mai jelu iya selalu mindah, enggai ka rumput nya abis diulam lalu enda ulih tumbuh baru. Kadang-kadang mega bedus limpang ke bukai laban nguji ngiga rumput ka diri empu.

Kitai mensia mega baka bedus. Sekeda kitai enggai mindah ari endur kitai diau laban kitai udah teleba ba endur nya. Sekeda kitai kelalu ka mindah, ngujung ka kitai tesat. Tang orang ti ngelala Tuhan, di-iring Tuhan, awak ka iya enda tekandang ba endur ti dikerindu iya, lalu baka nya mega enti iya mindah – iya bisi Tuhan ngiring iya ngagai jalai ti betul. Pengibun Domba enda bejalai ari belakang kitai, neruju’ kitai ke mua; tang iya bejalai dulu, ngulu kitai nitih iya.

4Taja jalai nya petang nadai peda achok mata, aku enda takut, Tuhan; laban nuan nulong aku”. Dalam jaku English disebut, “valley of the shadow of death” – iya nya “lebak kelemayang pemati”. Tiap iko kitai deka bejalai nengah jalai tauka lebak ti petang. Sekeda kitai benung ngasai ka diri bejalai nengah lebak nya diatu. Sekeda kitai udah pansut ari lebak nya. Lebuh kitai bejalai nengah lebak tu, kitai enda ulih mai orang bukai (baik ka nya bini, laki, anak, tauka pangan) enggau kitai. Aku bejaku pasal penusah ti nuntong pengidup kitai siko-siko, ti semina ulih diasai kitai empu aja. Tang enti nuan arap ka Tuhan, nuan enda takut bejalai kediri laban Tuhan bisi bejalai enggau nuan.

Sekeda orang nyangka sida ulih ngemata diri empu, lalu enda beguna ka Tuhan. Tang maya pemati datai sida lalu belabuh takut tauka irau. Nya alai lebuh ditinggang pemati, orang selalu minta padri besambiang lalu ngangau Tuhan awak ka ngiring semengat iya ti mati nya. Diatu aku madah ka kita: anang nganti maya kitai ditinggang penusah rabat, nya baru kitai ngangau Tuhan nulong kitai. Tuhan enggai digaga kitai baka nya: maya agi idup kitai enda ibuh ka iya; maya mati baru kitai kiruh bekangau minta tulong iya.

Ayat 4b: “ tungkat nuan ngasuh aku likun”. Salin ba Bup Kudus Iban enda tentu betul, laban kayu ti dipegai pengibun bedus bisi dua iti (rod and staff). Iya mai kayu ti pandak dikena nyadi ka senyata kena iya nyaga diriempu enggau raban domba. Kayu pandak nya mega dikena iya nikau bedus enti sida mansang ngagai endur ti bisi rumput ti berachun tauka bisi ular.

Tungkat ti dibai iya kurang lebih baka tungkat ti dibai Bishop, bisi belingkok datas kena iya narit domba ti tesangkut ba madang duri tauka labuh ke dalam lubang. Pengibun bedus enda kala malu’ jelu sida tang negu sida ngena tungkat awak ka sida enda limpang ke bukai. Tu meh gaya gambar Tuhan kitai: iya enda ngukum kitai enti kitai salah, tang ngena jaku pesan enggau jaku ajar iya ngiring kitai ngagai jalai ti betul.

5Nuan nyendia pemakai ka aku alai semua munsuh tau meda aku: Tu chara pengibun bedus nyendia ka tempat alai jelu iya ngulam rumput. Sebedau iya mai jelu ngulam dipadang pengibun domba dulu meresa tempat, lalu iya mega mai garam ti ditabur iya be sekeda endur alai bedus ngulam, lalu milih endur iya ngaga palan endur bemalam. Rumput diperesa iya magang enggai ka bisi bansa ti berachun. Semua tugong batu enggau lubang diperesa enggai ka bisi ular.

Baka nya mega Jesus ngintu kitai ba mua munsuh kitai (iya nya Sitan enggau orang ti ngembuan tuju ti jai). Semua akal munsuh di bungkar iya magang. Jesus udah kiruh,udah merinsa, udah diuji Sitan dalam iya nyendia tempat ka kitai.

Nuan nerima aku, ngiri minyak atas pala aku, lalu ngisi mangkok ti dikena aku nyentok ka penuh (5b). Sebansa indu utai ti tau nganu domba iya nya lalat ti suah nutu pala sida laban ka betelu ba idung bedus. Enti sida mujur, telu nya deka mechah, lalu ulat nya deka tama ke dalam lubang idung bedus lalu ngasuh iya sakit. Nya alai sebedau musin lalat, pengibun bedus nya ngaga ubat ti digaga ari minyak kana, menirang enggau rempah, lalu nya digusok ba pala tiap iko bedus, ngambika lalat enda nutu sida. Minyak mega dikena sida ngubat kuris ti mudah berampit. Baka nya mega Tuhan enggau kitai ti anembiak iya: iya ngiri Roh Kudus atas kitai awak ka kitai dijaga ari utai ti tau nganu enggau ngerusak kitai.

6Pengasih enggau pengerindu nuan tetap meruan ba aku sa-agi-agi aku idup; lalu rumah nuan deka nyadi ka pendiau aku Tuhan belama-lama. Tiap iko domba enda tau enda ditanda: lalu sepiak pending sida tebok awak ka iya dikelala pengibun ti bempu iya. Kemaya hari tu bedus ditanda ngena “tag” ti dilekat dipending sida, lalu tanda nya ulih dipeda ari jauh. Baka nya mega Tuhan kitai: iya besedia ngintu kitai, tang kitai ti nyadi domba iya mega besedia ditanda ti ngasuh kitai lain ari orang bukai.

Ditanda ba pending endang pedis, tang tanda nya seumur idup. Lalu lebuh kitai ditanda nyadi raban domba Kristus, iya mega pedis – laban tanda nya tanda regang. Tanda regang ukai tanda ti mudah dibai kitai, laban iya mai pengiruh, lalu kadang-kadang iya mai penusah enggau pemedis.

Mayuh orang ngumbai diri domba Jesus Kristus, tang sida enggai kiruh nyan tanda regang Jesus. Sekeda nguji ngiga chara ti mudah – semina naka ngerejista nama ba gerija aja. Aku enggai enda ngingat ka kitai: nadai chara ti mudah nyadi domba Jesus – nadai jalai muntang. Domba mesti nurun ka padang nitih pengibun iya, enti iya deka ditupi lalu di-intu pengibun iya. Iya enda tau enda ngasi ka pengibun iya.

“Tuhan ti pengibun aku” - Lebuh nuan ngumbai Tuhan pengibun nuan, iya besai bendar reti ba nuan. Iya nentu ka nuan bulih pengelantang ti meruan, pengidup ti bisi reti enggau tuju, enggau pengidup ti semak Tuhan. Enti kitai nemu Tuhan nyadi pengibun kitai, kitai mega nemu pengidup kitai bisi pemanah, lalu kitai semampai ngasai ka pengasih Tuhan.

Sekeda orang Kristian ngaku Tuhan Jesus nya Pengibun sida tang sida takut ka rumah Tuhan. Kati ko iya tau nyadi bansa nya? Enti nuan amat ngelala Pengibun nuan, nuan tau nyebut, “rumah nuan deka nyadi ka pendiau aku belama-lama”.