Orang Samaria ti Manah (Luke 10: 25-37

Jaku kenang pasal cherita ba Luke 10: 25-37

Orang Samaria ti nulong orang ti tusah

Siko pengajar adat datai ngagai Jesus lalu nanya, “Pengajar, nama utai ti patut dikereja aku awak ka aku tau bulih pengidup meruan?" Tanya iya
nya enda nyalah-nyalah baka tanya siko orang ti kaya ba Matthew 19, ti nanya
munyi tu, “Pengajar, nama utai ti badas, ti enda tau enda dikereja aku, ngambi
ka aku tau bulih pengidup ti meruan belama-lama iya?”

Ninga munyi nya Jesus nanya pengajar adat baru, ba ayat 26: "Nama ti udah ditulis dalam Bup Kudus? Kati ko nuan nerang ka reti utai nya?" 
Jesus endang sengaja enggai nyaut tanya pengajar adat nya laban tanya
iya nya ngayan ka iya enda arap ka Jesus. 
Nya alai ko Jesus, “ Nuan nemu adat; nama utai ti ko adat?

Lalu ko iya nyaut Jesus, "Nuan enda tau enda rindu ka Tuhan ti Allah Taala nuan enggau pengabis ati nuan, enggau pengabis samengat nuan, enggau pengabis pengering nuan, sereta
enggau pengabis runding nuan. Lalu nuan enda tau enda rindu ka pangan diri asai
ti rindu ka diri. Lalu ko Jesus, “Manah
saut nuan nuan; diatu nuan ngereja baka nya.” 

Tang pengajar adat nya nanya Jesus, "Sapa orang ti pangan aku?" Iya nemu bisi dua iti pesan ti besai: (i) rindu ka Allah Taala enggau (ii) rindu ka mensia. Ba iya rindu ka Allah Taala nya mudah, laban
Allah Taala ditemu iya manah. Tang kati
ko rindu ka mensia? Ni bagi mensia ti patut dikerindu enggau ti enda ibuh
dikerindu? Ni bagi mensia ti tau dikira
pangan, lalu ni iya ti munsuh?

Jesus enda nyaut iya, tang lalu nusoi cherita. Cherita tu nyangka kala udah nyadi, laban jalai antara nengeri Jerusalem enggau Jeriko nya jalai ti nengah
menua puang, bebukit, lalu ngembuan mayuh lubang gua ti tau endur bala perumpak
belalai. Mayuh orang udah kena rumpak
tauka kena bunuh ba rantu jalai tu. Jesus
lalu nusoi cherita pasal pengasih.

Nama reti pengasih? Sekali tu aku mai kitai berati ka 5 iti pekara ti bekaul enggau pengasih.

(i) Pengasih patut diberi laban orang ti beguna minta tulong. Pengasih ti bendar enda milih sapa orang ti ditulong. Iya enda ngiga kebuah. Dalam ayat 30 Jesus nyebut, “Nyadi sakali bisi orang siko nurun ari
Jerusalem mansang ka Jeriko. Iya di-amok orang perumpak, lalu sida nelanjai ka
iya, malu` sereta ninggal ka iya setengah mati.”

Lebuh iya tu garing-garing ba tisi jalai bisi 3 iko orang datai ari Jerusalem mansa iya. Orang ti terubah mansa nya siko imam: iya meda orang ti setengah-mati nya, tang iya
ngelaung nengah sepiak jalai. Iya ti kedua mansa iya nya orang Lewi. Lebuh iya datai dia, iya merening orang nya,
udah nya lalu bejalai mansa iya nengah sapiak jalai.

Seduai tu ukai orang ti jai. Imam nya orang ti naka iya dipebasa orang mayuh, iya orang ti betanggung jawab ngenjok piring maya orang
besambiang. Baka nya mega orang Lewi,
sama-sama bisi tanggung jawab. Tang seduai enggai nulong orang ti tusah. Nama kebuah orang ti ngumbai diri bisi
pengarap ba Tuhan ngembuan ulah bansa tu? 
Nyangka seduai enggai kiruh. Tambah agi orang nya enda dikelala. Nyangka seduai takut – enti seduai ngetu
seduai mega deka dijamah perumpak. Tauka
seduai ngira orang bukai ti datai dudi tau nulong iya.

Kati, ba penemu nuan, enda sebaka munyi enggau runding kitai lebuh kitai patut nulong orang? Lebuh orang minta tulong, nama ti suah dalam ati kitai enti kitai enggai nulong? Kitai
enggai kiruh, enggai masau jam tauka hari, enggai rugi. Tauka laban laban orang
ti minta tulong nya ukai kaban tauka pangan, tauka laban ngira nadai tulih ka
penguntong.

(ii) Pengasih deka ngasai utai. Dalam ayat 33 kitai macha, “Baka nya mega siko orang Samaria bejalai nengah jalai nya lalu betemu enggau iya, Lebuh iya meda orang nya, ati iya balat sinu... "

Cherita Jesus tu mar deka diterima orang ti ninga iya laban nya pasal orang Samaria ti nulong orang Judah – dua bansa ti udah lama bemunsoh. Jesus
madah ka lebuh orang Samaria nya meda orang Judah garing-garing ba tisi jalai,
iya balat bendar sinu meda iya, lalu nulong iya.

Orang Samaria nya nadai kebuah deka nulong iya ti bakal nya: kaban ukai, sebansa ukai; dikelala pen enda. Nadai penguntong mimit diulih iya ari ti ngereja pengawa bansa nya. 
Tang iya enda ngira semua utai nya - iya enda ngira ka diri masau jam,
masau hari enggau masau duit ketegal orang Judah ti bakal nya. Laban ba penemu iya, orang ti tusah mesti
ditulong.

(iii) Pengasih ukai semina ngasai utai, tang ngereja utai. Pengasih ti bendar ngujung ka orang ngereja utai. Ingat: ukai mudah ba orang Samaria tu nulong
orang ti dikira munsoh. Jesus, lebuh ke
nusoi cherita tu, ngenang semua pengawa ti dikereja orang Samaria tu: Iya
mansang ngagai orang ti bakal nya; ngiri minyak enggau ai anggur ba abi telih
iya; malut abi telih nya; ngengkah orang nya atas jelu iya empu, lalu mai iya
ngagai sebuah rumah sewa, ti endur iya lalu ngintu orang nya. Jesus nyebut utai munyi tu dikena ngingat ka
kitai: iya nya, kitai enda tiap hari tetemu ka orang tusah lalu ulih nulong
semua sida; tang lebuh maya kitai amat-amat diguna orang ti tusah – kitai patut
meri tulong enggau naka pengulih kitai.

(iv) Pengasih ukai semina ngasuh nuan ngereja utai, nuan mega deka mansut ka belanja. Orang Samaria tu besedia ngereja lebih ari ti patut: iya mai orang nya ngagai rumah sewa, ngintu iya
semalam-malam nya. Sari siti iya meri duit ngagai orang ti bempu rumah sewa nya
– ngasuh iya ngintu orang ti bakal nya. 
Ukai naka nya – iya besemaya deka mayar udah iya pulai baru mansa nya
ila – enti belanja enda chukup. Enda aku
agi nemu nama utai ti patut dikerja orang Samaria tu: udah ckukup magang.

(v) Pengasih ngayan ka gaya kaul kitai enggau Allah Taala. Ba pengujung cherita iya, Jesus nanya pengajar adat: "Dalam runding nuan, sapa sida
tiga ngereja pengawa ti baka pangan iya, lebuh iya kena laban perumpak?" Pengajar
adat nya enda tesebut ka “orang Samaria” lalu nya alai iya nyebut, "Iya ti
kasih ka iya." Disaut Jesus, "Enti pia, bejalai nuan lalu kereja
pengawa ti baka nya." Lalu kedua
kali Jesus bejaku ngagai iya ngasuh iya ngereja baka nya.

Pengajar adat nya nadai agi nemu nama utai disebut. Iya udah nanya, “Sapa pangan aku? Cherita Jesus tadi ngujung
ka tanya nya dipulai ka ngagai iya empu, “Kati nuan empu tu tau nyadi ka pangan
ti manah?”

Lebuh kitai berunding ka cherita tu, aku mai kitai ninga jaku Tuhan ba 1 John 3: 16-18: “Tu kebuah kitai nemu reti pengerindu, laban Kristus udah meri nyawa diri kategal kitai, Kitai mega
patut meri nyawa diri kategal sida menyadi kitai! Enti
orang ti kaya meda menyadi iya ti seranta, tang enda kasih ka iya, kati ko iya
ngumbai diri rindu ka Allah Taala? Anak
aku, pengerindu kitai ukai semina enggau jaku tauka enggau mulut aja; tang iya
enda tau enda pengerindu ti bendar, ti dipandang ka ngena kereja.”

James 2:15-17 nyebut, “Nyema bisi sida menyadi ti lelaki tauka indu beguna ka gari lalu enda chukup utai dempa. Nama penguntong enti kita semina bejaku munyi tu: "Awak ka Allah Taala merekat ka kita! Intu tuboh kita angat lalu makai
kenyang!" Jaku nya nadai guna enti kita enda meri sida utai ti dipeguna
sida kena ngidup ka diri. Nya
alai baka nya mega pengarap: enti semina pengarap aja lalu nadai ngereja utai,
pengarap nya mati.”.

Dalam cherita tu Jesus magi antara orang ti arap ngena mulut aja enggau orang ti arap enggau bendar. Sida tiga dalam cherita tu semua orang ti arap ka Allah Taala, Imam, Orang Lewi enggau Orang Samaria. Tang pengarap sida semina dikelala dalam
pengawa ti dikereja sida lebuh sida tetemu ka orang ti amat tusah ti beguna ka
tulong sida. Lebuh kitai berunding ka
tu, kitai nanya diri: Nama bansa orang Kristian aku tu? Ingat: siti utai ti
suah nagang kitai ngereja pesan ti diasuh Tuhan iya nya ati ti takut – takut ka
diri kiruh tauka rugi; ati ti bechiping (ngira sapa), tauka laban kitai agi
ngira deka ngulih penguntong.