TERUS IDUP ENGGAU KRISTUS – Bagian 2

Tuhan Trinity

Orang Kristen samina nyembah SIKO TUHAN. Tang SIKO TUHAN nya dipeda nyadi TIGA OKNUM (Peribadi) dalam Bup Kudus. Nya alai kitai ngumbai tuhan nya TRINITY. TRINITY tu datai ari dua iti leka jako reti iya nya Tiga nyadi Satu. Endang tusah enti deka ngiga reti iya ka amat. Ba kitai satu nya reti iya satu lalu tiga reti iya pan tiga tang dalam genteran Tuhan madah ka diri iya bisi Tiga dalam Satu. Kitai nemu reti tu dalam pengidup sereta dalam penemu kitai sari-sari. Kitai ulih ngelaie SIKO TUHAN iya ka diau dalam TIGA kaul ti ajih.

Baca 2 Korint 13:13

“Pengasih Tuhan Jesus Kristus, pengerindu Allah Taala, enggau penyaup Roh Kudus enggau kita samoa”

1.      Tuhan (Iya semampai di kangau kitai Tuhan Allah Apai)

Nama utai diterima kitai ari Tuhan Allah Apai?

Iya meri pengasih Tuhan Jesus Kristus, pengasih iya empu enggau kaul Roh Kudus.

2.      Tuhan Jesus Kristus

a)      Nama utai diterima kitai ari Tuhan Jesus Kristus?

Kitai bulih idup ti meruan

b)      Kati Jesus mantai ka kitai pengerindu iya?

(Baca 2 Korint 8:9 “Kita nemu pengasih Jesus Kristus Tuhan Kitai; iya sigi kaya tang ngaga diri empu miskin kategal kita, awak ka kita tau nyadi kaya ulih pemerinsa iya,”)

Iya nyadi miskin awak ka kitai kaya, iya mati kategal kitai ngambi ka kitai ulih diselamat ka.

3.      Roh Tuhan

a)      Nama utai diterima kitai ari Roh Tuhan?

Kaul enggau Roh Kudus

b)      Kati Roh Tuhan mandang ka pengawa iya ba kitai?

(Baca Rome 8:26 “Baka nya mega Roh Kudus datai nyaup kitai, laban kitai lemi. Laban kitai enda nemu ni jalai kitai patut sambiang; Roh Kudus empu minta ngagai Tuhan ngari ka kitai, enggau jako ti enda ulih diperati kitai.”)

Mantu kitai ti lemi dalam pengarap, ngajar kitai besampi, Roh Kudus ngaga sampi pinta ka kitai ngagai Allah Taala.

c)      Nama agi utai bukai digaga Roh Tuhan ba kitai?

(Baca John 16:14. “Iya deka meri mulia ka aku, laban iya deka nyambut utai ti disebut aku lalu nusoi iya ngagai kita.” ‘Iya’ nya mandang ka Roh Tuhan sereta ‘Aku’ nya Jesus Kristus)

Nyadi saksi ba Tuhan Jesus

d)     Kati Roh Tuhan mantu kitai talok enggau jako Tuhan?

(Baca Rome 8:4 “Awak ka pengelurus ti diletak dalam Adat tau dititih ka kitai ti diau nitih ka Kuasa Roh Kudus, ukai ka gaya pengidup mensia ti bedosa ari asal.”)

Iya mantu kitai idup ukai nitih ka dagin kitai tang nitih ka peneka Roh Kudus.

Nya alai TUHAN nya SATU iya madah ka kitai iya nya dalam TIGA OKNUM. Tang Tuhan enda bebagi dua. Iya tetap SIKO. Tiap-tiap PENDIAU dalam Trinity nya meh TUHAN ti sama.

Genteran ti tau di kingat

Belajar baru nama genteran ti udah di kingat kita

(John 1:12 sereta 1 John 1:9)