Enti orang nerima Jesus Kristus nyadi ka juruselamat, sida deka tunduk serta talok besambiang ngagai Iya ti nyadi Tuhan kitai, kemaya nya meh sida iya nyadi orang Kristen. Uji perati ka genteran-genteran jako tu. Ingat meh selalu pengadang kitai enda bepanggai enggau asai ati kitai tang bepanggai enggau semaya Tuhan iya nya isi tiap genteran dalam Bup Kudus.
Baca Pemandang 3:20
“Dinga! Aku bediri di moa pintu lalu nekong pintu; enti orang ninga munyi nyawa aku lalu muka pintu, aku deka tama ka dalam lalu makai enggau iya, lalu iya deka makai enggau aku”
1. Nama utai patut digaga kitai enti deka Jesus datai dalam pengidup kitai?
Kitai patut muka pintu ati kitai kena kitai nerima Tuhan Jesus.
2. Udah kitai ngereja ka iya, nama utai di gaga Jesus?
Tuhan Jesus deka diau dalam kitai.
3. Kati kitai deka nemu Jesus diau dalam pengidup kitai kemaya ari tu?
Kitai udah nerima pengidup baru, kitai takut ka Allah Taala, talok enggau Jako Iya.
Diatu baca John 1:12
“Sekeda amat nerima iya lalu arap ka iya; nya alai iya meri sida kuasa nyadi anak Allah Taala.”
4. Enti kitai udah nerima Kristus kitai deka nyadi…
Anak Allah Taala, lalu kitai samoa deka di kumbai bala menyadi dalam Kristus.
Laban kitai udah nerima Jesus nyadi juruselamat, kitai diatu udah nyadi keluarga Tuhan. Tuhan meh Apai kitai ti penyayau ti diau diserega sereta Jesus nyadi pangan kitai enggau kitai kini aja penunga kitai iya endang bisi belama. Jesus ti nyadi juruselamat ngampun ka samoa dosa enggau penyalah ti udah digaga kitai suba. Iya ka lebih nyelaie agi, Iya sedia deka ngampun ka kitai tiap kali kitai ngaga penyalah ti udah ngasoh iya lebu ngenang kitai.
Baca 1 John 1:9
“Tang enti kitai ngaku penyalah diri ngagai Allah Taala, iya endang tau dikarap sereta endang lurus lalu iya deka ngampun penyalah kitai lalu nuchi kitai ari samoa penyai.”
5. Nama utai patut digaga kitai enti kitai deka Tuhan ngampun ka dosa kitai?
Nyerah diri sereta ngaku dosa diri empu.
6. Nama utai disemaya ka Tuhan?
Iya deka ngampun laban iya tau dikarap sereta endang lurus, ngelindung kitai ari samoa kuasa jai.
Diatu baca Rome 6:23
“Laban upah dosa iya nya pemati belama-iya; tang pengasih ti diberi Allah Taala iya nya pengidup ti meruan belama-iya, begulai enggau Jesus Kristus Tuhan Kitai.”
7. Nama utai patut diterima kitai?
Kitai patut mati kategal dosa kitai.
8. Enti kitai arap ka Jesus, nama utai deka di beri Tuhan ngagai kitai?
Pengidup ti meruan.
Kitai udah belajar dalam pelajar tu iya nya orang Kristen:
a) Udah ngalu ka Jesus Kristus dalam pengidup iya.
b) Udah nyadi anak Tuhan
c) Udah di ampun ari tanggam dosa
d) Bulih pengidup ti meruan
Genteran ti tau di kingat
John 1:12 sereta 1 John 1:9
No comments:
Post a Comment