Bepun enggau jalai pemansang pendiau Roh.
Keterubah nya nuju pemansang pendiau roh diri empu.
Kitai bepun ari asas, nama tuju guna Bup Kudus, sampi, enggau maca Bup Kudus.
Nyadi orang Kristen.
Engkah diri dalam pengarap serta ngaku Jesus Kristus tu meh Tuhan serta juruselamat, nya meh pemutus ati ti paling penting sekali ba kitai ti deka nerima iya dalam idup kitai! Enti kitai enda kala ngalu ka iya dalam ati kitai, tauka kitai deka ngelala sapa Kristus nya enggau lebih silik agi lalu kitai deka nyambut iya dalam pengidup kitai. Beri aku peluang tu kena aku bekunsi ka sapa Iya nya ngagai kita.
Lapa nyadi murid Kristus?
Allah Taala ukai deka orang meda alu masuk Kristen enti enda nemu nama reti Kristen, katerubah Iya deka meda orang belajar dulu nyadi murid iya. Dalam pelajar tu kita deka meda pendiau orang Kristen jalai ajar nitih pengarap Kristen nunda ka teladan dalam Bup Kudus – besampi, doktrin, pengidup dalam Kristen, serta puji & sembah. Au, aku deka nginjil mega bala orang ti baru ngelala Kristus, tang tu ukai misi aku ka bendar! Enti aku, nginjil, kita mesti nemu nya ukai peranan aku tang nya peranan Roh Kudus mai orang rindu serta begulai dalam pengasih Allah Taala. Tu meh kumbai orang kuasa Allah Taala serta iya meh pemadu pengasih.
Nama reti murid Iya?
Murid Kristus tu reti iya orang ka mansang dalam pengarap serta nyadi ka teladan enggau ngajar bala anembiak Kristen bukai utai dalam Bup Kudus, besambiang, doktrin, kaul enggau Tuhan, pengidup Kristen, bekerja ka pengawa iya, enggau puji & sembah, enggau mayoh bengkah utai bukai agi ti patut dikereja ka bala orang ti arap ka iya.
Prinsip pengarap
Nguna pengarap kitai kena idup nitih jalai ti udah di tentu ka iya ba kitai.
Jesus ngalu ka kita nyadi murid Iya
Nyadi murid ti bendar reti iya nya diau amat-amat dalam pengarap nyerah diri ngagai Iya dalam samoa jalai pengidup ari samoa utai tinggi lalu nuju utai ti baroh. Reti iya nya kitai ukai samina nyerah diri ngagai iya tang kitai deka iya nyadi sumber penebus dosa kitai, lalu bisi utai deka nyadi ba kitai ti udah di atur iya ila.
Nama reti talok?
Bisi kah nuan penalok? Talok tu reti iya ngasi ka nama utai asoh Allah Taala ti patut dikereja kitai.
Ditangkan enggau pengarap
Awak ka Jesus nyadi teladan nuan ba dalam samoa pengawa kerja nuan.
Kuasa sampi! Bagian1
Nama utai ti patut dikereja ka kami terubah dulu? Komplen? Bekelakar jako enggau pangan diri? Tusut runding? UKAI! Kitai di asoh besampi… “Enti bisi ari bala kita kena penusah, iya patut besampi. Enti bisi ari bala kita gaga ati, iya patut nyanyi pantun puji. Enti bisi ari bala kita sakit, iya patut mesan ka tuai-tuai eklesia, ngambi ka besampi ka iya lalu ngunsut minyak ba iya dalam nama Tuhan. Sampi ti disebut enggau pengarap deka nyuman ka orang ti sakit; Tuhan deka ngasoh iya gerai, lalu enti iya udah bedosa iya deka di-ampun. Nya alai ngaku dosa kita ba diri sama diri, lalu besampi ka diri sama diri, ngambi ka kita tau suman. Sampi orang ti lurus besai bendar kuasa. Elijah nya mensia ti sabaka enggau kitai. Iya besampi enggau ati bendar awak ka hari nadai ujan tiga taun satengah. Iya besampi baru, hari lalu ujan, lalu tanah ngasoh utai tanam mansut ka asil.”James 5:13-18
Kuasa sampi! Bagian 2
Besampi tu ukai samina kena negap ka pengarap. Tang, nya meh jalai kitai berandau enggau Allah Taala; tu meh fakta penting… “Enti bisi ari bala kita kena penusah, iya patut besampi. Enti bisi ari bala kita gaga ati, iya patut nyanyi pantun puji. Enti bisi ari bala kita sakit, iya patut mesan ka tuai-tuai eklesia, ngambi ka besampi ka iya lalu ngunsut minyak ba iya dalam nama Tuhan. Sampi ti disebut enggau pengarap deka nyuman ka orang ti sakit; Tuhan deka ngasoh iya gerai, lalu enti iya udah bedosa iya deka di-ampun. Nya alai ngaku dosa kita ba diri sama diri, lalu besampi ka diri sama diri, ngambi ka kita tau suman. Sampi orang ti lurus besai bendar kuasa. Elijah nya mensia ti sabaka enggau kitai. Iya besampi enggau ati bendar awak ka hari nadai ujan tiga taun satengah. Iya besampi baru, hari lalu ujan, lalu tanah ngasoh utai tanam mansut ka asil.”James 5:13-18
Nama pengawa orang Kristen ka bendar?
Nama kabuah kitai mesti di selamat (Rome 5:12-24)
Tu meh kunci ti patut di temu kitai reti iya, dosa tama ke dalam dunya ari siko mensia ti benama Adam lalu ngerampit samoa mensia bukai; tang laban pengasih Allah Taala, ti udah ngelurus ka kitai, lalu datai meh siko mensia/Tuhan ti nyadi penebus nengah pemerinsa iya di regang. Samoa mensia nerima pemeri iya, taja pan nya enda adil di asai Kristus – tang endang deka ngelurus ka kitai ba moa Apai.
Injil dalam “kerubong kacang”
Allah Taala enda muai kitai; tang, kitai ka muai Iya. Iya nurun ari serega deka meri kitai pengasih ti enda layak diterima kitai. Iya meri kitai jalai, taja pan kitai ngelaban iya belama nengah ati kitai ti kering semampai nulak utai ajar Iya ka bendar.
Nama utai gaga Jesus ba aku? (Rome 5:1-11)
Kitai mesti meda maioh macham utai ka manah ti udah digaga Kristus ka kitai. Kitai patut gaga ati kategal pengarap ti udah di beri Iya ka kitai. Tu meh asas pengidup dalam tuhan.
Nama reti Injil? Bagian 1 (Rome 1:7; 5:17; 7:12-20; 11:6; 16:20)
Dalam jako Gerika reti iya nya “Berita Manah”…
Nama reti Injil? Bagian 2 (Rome 1:7; 5:17; 7:12-20; 11:6; 16:20)
Injil tu meh “Berita Manah” ari Jesus Kristus madah ka nama utai udah di gaga iya ka nuan enggau aku. Tu meh utai padah iya serta reti sapa tauka nama utai udah di gaga Jesus.
Nama reti pengasih (Galatia 3:13-15)
Pengasih tu reti iya penyayau ti cukup pemadu besai. Tu meh pendiau penyinu ti nangkan ka pengerindu dalam ati.
Kati deka meransang diri empu dalam pengarap
Jako peransang Allah Taala
Bisi ka kuasa enggau pengasih Allah Taala meransang nuan? Bisi udah utai temu nuan dalam pengidup Kristen? Ari utai tanya nya tadi nuan berunding bisi kah utai tu nyadi dalam pengidup nuan lalu meri nama kebuah utai tu nyadi lalu kati deka meransang diri empu enggau Jako Allah Taala.
Kati deka bisi masa enggau Tuhan
Kati aku ulih ngiga masa kena begulai enggau Allah Taala awak ka aku ulih makin tegap dalam pengarap Kristen? Lagi aku ngajar senentang tu.
Orang baru ti maca Bup Kudus
Tiga-puloh-satu ari deka nemu rancangan Tuhan ba kitai. Rancangan tu isi iya madah ka kitai kati Allah Taala begulai enggau mensia, jalai kitai nerima Iya, kati deka arap ka Tuhan, minta ditebus ari tanggam dosa, serta pendiau kitai jemah ila ba serega.
Bepun enggau rancangan kati maca Bup Kudus
Tu jalai ti chukop manah kena kitai ngatur nama utai deka di baca kitai, kena kitai ingat baru nama utai udah dipelajar kitai, meri awak berapa minit sehari dalam masa sebulan, nuan deka nyadi lebih tegap dalam pengarap serta nemu agi nama Kabuah Jesus Kristus nyadi penebus kitai.
Kaul enggau Tuhan dalam 90 hari
Deka nemu jako serta nitih ka ajar iya, nuan patut maca Bup Kudus ninting hari. Tu meh jalai kitai bekaul enggau Iya kena kitai meransang pendiau roh kitai.
Asas penalok dalam Bup Kudus
Nama kabuah aku patut peduli enggau Bup Kudus?
Kati Bup Kudus tu lain ari bup bukai? Peda kita bukti iya… enti Bup Kudus ngumbai diri Jako Allah Taala nya reti iya bup tu lain ari bup bukai. Tu mai kitai nanya soalan peribadi kadiri empu…nama reti iya? IYA NGAKU IYA JAKO ALLAH TAALA! IYA BUP ARI TUHAN…iya bisi kaul enggau samoa utai…dalam ngintu…dalam isi jako…serta dalam pengarap!
Kati Bup Kudus ulih ngubah pendiau idup aku?
Sema ka kita bisi utai tanya senentang pengasih, pemedis, asai besalah, sunyi ati diri, pengaga ati, pasal Allah Taala, pasal masa ti ka datai ila, tauka ka reti pengidup, Bup Kudus tu bisi jawapan iya. Nangkan ka jako nya tadi, Bup Kudus tu penerang… iya mega tau nyadi cermin kena betenggau ka ulah diri…pemakai roh kena kitai tegap dalam pengarap…pelindung ari kuasa pemetang…jako ajar Tuhan Jesus Kristus…endur asas pengidup alai kitai bepanggai…serta pengajar!
Nama jawapan ti paling deka di temu kitai dalam pengidup?
Kati deka nyaut 10 iti soalan ti tusah dalam pengidup kitai? Nama ti paling tusah di asai kitai ka diatu? Kati deka nanya Allah Taala utai tanya senentang Tuhan, enggau nuan serta reti pengidup?
Nama ko Bup Kudus pasal Jesus Kristus?
Penatai Tuhan Jesus endang udah di padah kenyau beratus taun sebedau Iya ada. Nadai orang dalam sejarah dunya tu sebaka enggau Tuhan Jesus ti udah menoh ka genera kelia. Jesus tu diau dalam sejarah! Jesus mega bisi kuasa ti kena Iya ngaga kerja ajih! Jesus ukai sebarang mensia! Jesus ulih ngubah pengidup orang bukai iya mega ulih ngubah pengidup kita ka diatu!
Lapa aku patut nurun gerija?
Bisi 5 iti kabuah lapa nuan patut nurun gerija.
TIGA KABUAH NGASUH ARAP KA BUP KUDUS
Sebenar iya mayoh kabuah bukai lapa kitai tau arap ka Bup Kudus ukai samina tiga kabuah di atas tu aja. Ari segi kaul susun jako, susun atur jako dalam Bup Kudus dijaga enggau manah beribu-ribu taun sampai ka diatu, fakta sejarah iya ti betul, ari segi sains iya ti betul, genera ti betul, serta ulih meransang orang ngereja utai ka patut di gaga mensia. Kabuah di atas tu udah umbas madah ka orang bukai ti enda sama agama ngasuh sida tusah deka nyangkal penemu dalam Bup Kudus!
Nama utai deka Allah Taala ba kitai enggau nama patut dikereja ka kitai dalam Iya
Kati deka ngubah pendiau diri enggau manah agi
Asuh ati kita ba utai di atas! Bisi kah orang beduan kita dalam pengidup? Kala kitai nanya lapa kabuah utai tu nyadi? Nya alai, kitai dalam dunya tu penuh enggau dosa. Dosa nya ngerusak kaul kitai enggau orang bukai enggau ngerusak diri kitai empu, lalu kitai mega udah beduan ka orang bukai dalam pengidup kitai.
Buah roh kitai iya nya Pengerindu
Pengerindu tu ulih ngasuh kitai bebasa bala menyadi kitai dalam Kristus, bala kitai diri sebilik enggau orang bukai dalam idup kitai.
Buah roh kitai iya nya Pengaga Ati
Pengaga ati deka ngasuh kitai makin rindu begulai enggau Kristus, serta orang bukai, kitai gaga idup begulai enggau pangan diri laban Kristus ti bisi diau enggau kitai.
Buah roh kitai iya nya Aman
Aman tu kitai nyerah diri ngagai Tuhan kitai awak ka iya bekuasa dalam kitai, laban iya nya meh ti meri asai aman damai dalam kitai!
Buah roh kitai iya nya Sabar
Sabar tu mandang ka orang iya nya enda mudah deka medis ka ati orang enggau leka jako ti jai serta enda ringat ngapa, ari penyabar tu mega kitai ulih nerima nama aja penguji ti datai ba kitai taja pan pia kitai enda minta mayoh macham utai ari Iya.
Buah roh kitai iya nya Pemanah
Tu utai di kerindu Jesus Kristus laban ari pemanah tu kitai ulih ngasuh iya diau dalam kitai. Tu meh jalai ti manah kena kitai bekaul enggau orang bukai.
Buah roh kitai iya nya Pemaik
Ari pemaik tu lalu datai pengerindu! Iya ngasoh kitai ngasai, ulih di pecaya orang, bisi tuju dalam idup, serta bekaul manah enggau pangan diri.
Buah roh kitai iya nya Penalok
Talok tu baka “gam” kena kitai negap ka pengarap kitai serta lalu lekat nyaga ulah diri dalam roh kitai empu, lalu tu meh pendiau orang ti pecaya enggau Allah Taala serta orang bukai.
Buah roh kitai iya nya Lembut Ati
Tu pendiau mandang ka diri nya enda mudah ringat, sayau ka diri empu, sayau ka orang bukai, rindu ka Kristus serta nemu nama utai deka orang bukai.
Buah roh kitai iya nya Nagang Diri
Nagang diri tu ulih ngasoh Allah Taala ngatur pendiau kitai, ati kitai serta nemu nagang roh diri empu ari ngaga dosa.
Kitai mesti bisi pendiau baka Kristus
Nuan deka ngereja pengawa nuan empu tauka nuan deka ngereja pengawa Kristus?
Nama kabuah aku patut bekaul dalam gerempong mit?
Ba bup Kerja Rasul bisi madah ka kitai nama kebuah kitai enda tau enda bekaul enggau orang secara peribadi serta dalam meransang roh diri empu. Paul enggau bala Kristen ti terubah ngajar ari “rumah ke rumah”, kitai pan mesti nunda ka teladan nya bejalai dalam Kristus ngesong rumah pangan diri. (Kerja Rasul 5:42; 20:20)
Kristus ngubah kitai: Injil tu meh jako ti idup serta bisi kuasa lalu enggau jako tu meh kitai engkah ka pengarap kitai ba Jesus Kristus, ari orang mati kategal dosa lalu kitai nyadi roh ti idup! Lalu diatu kitai udah diselamat ka serta udah ditebus, nya alai kitai nerima lalu beguna ka Kristus.
Kristus nebus kitai: Kitai ti udah bisi pengarap diatu udah diau dalam perintah Allah Taala. Kitai patut enggau gaga ati dalam pengarap (laban iya udah nulis nama kitai ba bup pengidup serta deka ngasuh kitai tama serega). Kitai udah bulih pemenang ari samoa penusah lalu kitai patut berasai senang. Pengasih Allah Taala udah nebus kitai lalu nuci kitai nengah pemati Anak Iya ti nadai dosa nyadi ka piring penuci dosa kitai taja pia kitai agi bisi ‘munsoh’ ti semampai deka ngacau kitai. Nengah iya, kitai udah nyadi tuchi ba moa Allah Taala ulih Jesus Kristus Tuhan kitai (John 10:15), kitai diatu udah nyadi mensia baru (Solus Christus, “Nengah Kritus aja”).
Kristus ngelindung kitai: Atonement reti iya ngelindung tauka nutup – Kristus ngelindung kitai nengah pengelurus iya awak ka Allah Taala enda meda dosa kitai nengah darah tuchi iya, Atonement, ba bup Penyanggup Lama, sida nguna jelu nyadi ka genselan kena nutup dosa, tang nya enda ulih nutup samoa dosa mensia baka ti udah digaga Kristus ka kitai.
Kristus muai dosa kitai: Kitai nadai agi dosa kategal Kristus. Kitai nyadi tuchi ba moa Allah Taala kategal Kristus, ukai pasal pengarap kitai tauka ka penalok kitai; laban iya udah mayar dosa kitai. Pengarap serta penalok kitai nya meh buah asil ari dosa kitai ti udah di ampun ka. Nya alai, peda 2 Korint 5:17-19, Allah Taala udah rindu ka kitai mensia. Kaul kitai enggau Allah Taala nya samina nengah Kristus aja. Kristus nebus kitai ari tanggam dosa lalu ngasuh kitai arap serta talok ka Iya nya alai kitai udah nyadi pemenang.
Kristus ngasoh kitai yakin: Allah Taala meri kitai keyakinan lalu meransang kitai gaga ati dalam pemaik Iya dalam nama aja keadaan, laban iya udah lebih agi pemedis ari kitai. Keyakinan kitai nya bepanggai ba Kristus ari pendiau iya – “Yakin dalam Kristus!”
Kristus tu adil: Baca Rome 5:1-21 lalu dia bisi nyaut utai tanya kitai senentang kati dosa tama dalam kitai. Dosa tama kedalam dunya nengah siko mensia, Adam, lalu ngerampit orang bukai; ulih pengasih Allah Taala, nya meh utai ti udah ngelurus ka kitai, lalu datai ba dunya tu siko mensia/Tuhan. Adam, enggau kitai samoa, patut mati, tang Kristus enda patut mati laban iya enda bedosa. Nya enda adil ba Allah Taala! Kitai patut mati kategal dosa kitai, tang kitai diberi Iya jalai kena idup, iya nya ari pengasih, “Idup belama kitai dalam Jesus Kristus.”
Kristus meri kitai pengasih: pengasih endang rancangan Allah Taala kenyau ari mula kelia. Jesus Kristus, ulih pengasih enggau penyayau Iya, nyelamat serta ngelepas ka kitai ari dosa kitai nengah pengasih Iya. Ya, pengasih Iya meh ti nyelamat ka kitai, ukai samina nya aja maioh agi kerja pengasih Iya ka kitai. Iya meri kitai gaga ati ngetat ka pemedis idup kitai. Iya meri kitai harapan kena besabar, Iya meri idup kitai bisi reti. Iya ngereja ka nya nengah Roh Kudus serta Pengasih Iya! Iya nyerah ka diri Iya ka kitai. Tu meh pengasih Allah Taala ti pemadu badas ti ngasoh kitai diau dalam perintah Iya belama iya. Enti nadai Iya kitai deka laboh kedalam tanggam dosa, lalu enda nemu sapa kitai tu ba moa mata Kristus, sama baka bala Israel maya ba bup Penyanggup Lama, terutama ba Pengulu 2. Allah Taala semampai enggau bala mensia – ari Adam lalu ngagai bala pengajar adat, Nabi serta orang bukai – ulih pengasih Iya. Bup Penyanggup Lama udah nerang ka kitai conflict enggau limit ajar adat. Kitai samoa sama baka Adam; kitai endang bisi dosa kenyau ari kitai ada, tang kitai bisi belajar (John 16:33). Roh Kudus nya meh ‘gam’ kena ngelekat ka pendiau kitai ti manah. Iya mai kitai, ti udah bedosa, lalu nuchi kitai ngambi ka kitai enda nyadi munsoh Iya agi, tang diatu kitai nyadi ka pangan Iya (John 14-15)
Kristus ngampun ka kitai: Allah Taala udah ngampun serta nerima kitai diau dalam Iya, Iya mega meri kitai perlindungan ulih pengelurus Jesus Kristus. Nya alai, nuan dikerindu ka Allah Taala. Pengampunan tu ukai samina ‘insuran’ kena kitai ngelepas ka diri ari neraka, Iya nya sumber berkat ti enda nemu abis. Ulih pengampunan tu kitai lalu bulih pemisi ba serega, lalu kitai ulih meda Allah Taala nengah kuasa Roh Kudus iya ti endang di beri iya ka kitai ulih Jesus Kristus. Penyayau tu meh kategal Kristus mati ka kitai. Pengasih ka mengalir dalam kitai tu ukai pengasih ari kitai tang ari Allah Taala nengah Roh Kudus iya ba kitai (1 Korint 13). Kitai enda ulih membuktikan penyayau kitai; kitai samina ulih respon serta nurut perintah iya. Samoa tu nyadi dalam Allah Taala (John 17-1; Kerja Rasul 2:23; Galatia 4:4) diatu kitai patut arap ka Allah Taala.
Kristus meri kitai reta: sigi rindu nyadi orang Kristen laban kitai udah diberi Jesus Kristus reta ba serega din ila serta ba dunya diatu. Ba dunya tu iya meri kitai reta iya baka penyayau, pengarap, pengaga ati, serta pengasih. Kitai ulih berandau enggau iya bila-bila masa aja. Tu meh reta iya ti enda nemu abis ka kitai.
Kristus meri kitai pengelantang: pengelantang tu reti iya kitai tu udah enda agi bedosa serta enda agi nyadi munsoh Allah Taala laban dosa kitai ti udah. Kitai bisi keyakinan serta pengarap, lalu dosa serta penyalah kitai udah ditutup enggau di buai ulih Kristus; tang kitai mesti ngaku serta nerima iya nyadi ka juruselamat enggau penoh pengarap nya baru kitai ulih ditebus ari tanggam dosa.
Kristus ngelepas ka kitai ari penusah: peda Rome 8:28. Sida meransang roh kitai tumboh besai! Tribulation tu reti iya penusah ti di tapi kitai. Allah Taala enda semampai muai penusah tu; iya nguna penusah kitai awak ka kitai tau belajar berunding matang enggau ngubah sikap kitai. Penusah tu membina pengarap enggau pendiau diri empu, awak kitai nemu ngemesai ka Allah Taala. Penguji tu ukai nya datai ari Allah Taala, tang datai ari sitan. Enti kitai alah kena penguji nya kitai enda ulih nerima berkat Allah Taala serta pengadang ati kena kitai nyadi makin talok ka iya. Nama kitai udah tan kena penguji baru kitai di berkat Allah Taala lalu iya deka ngurang ka penusah kitai nya tadi. Lalu ngelepas ka penusah kitai lalu meri kitai nama utai deka kitai.
Bisi kita meda nama utai udah digaga Jesus ka kita? Kaul kitai enggau Allah Taala nya nengah Kristus. Kristus ti udah nebus dosa kitai lalu muai iya nya alai kitai deka arap ka pengawa ti udah dikerja iya. Diatu aku nanya kita, nama utai deka dikerja kita? Kati kita deka idup enggau Kristus?
Kitai ngesal ati ka dosa kitai ba Kristus: Ngesal ati tu ukai nyelamat ka kitai, reti nyesal ati tu iya nya kitai diberi jalai deka ditebus. Kitai mesti fokus enggau nama kabuah (Kristus) ukai lapa kebuah (Nama utai udah digaga Iya), laban kebuah tu datai ari ati ti dalam ti ulih ngasuh kitai matang. Sempama tugas kitai nya nyaga manuk tang ukai nyaga telu, laban telu endang semampai bisi enti kitai nyaga manuk.
Kitai nyerah diri ngagai Kristus: Identiti kitai iya nya sapa kitai tu dalam Kristus, ukai utai bukai. Enti kitai udah nemu nama tuju pengasih Kristus ti udah diberi iya ka kitai, kitai ulih ngiga diri kitai empu dalam Iya. Kitai deka nemu nama utai deka Kristus ba orang bukai serta enggau kitai empu (John 15:3; Rome 9:3; 1 Korint 9:22). Kitai enda tau tusah ati, serta ransi enti kitai bisi (1 John 4:17-19).
Kitai meri pelayanan ka Kristus: Pelayanan ka amat ditu reti iya nya kitai ngelayan/bekerja ka pengawa iya ti ukai deka dikerja kitai (2 Korint 12:15). Pelayanan kitai nya ukai kena kitai ngiga nama tauka kena kitai ngiga untung diri empu. Enti kitai pikir kitai tu “kami ulih ngereja samoa nya”, (Kudus) kitai nyau enda beguna ka iya laban ngasai kitai ulih. Kitai patut ngubah pendiau kitai betuai ka iya enti Allah Taala ngangau kitai nyadi garam enggau penampak. Tuju utama kitai iya nya ukai samina ngelayan aja tang nyadi anak Iya dalam pelayanan nya, lalu enti kitai udah talok ari nya meh penatai pelayanan ti amat datai ari ati ti tuchi deka ngereja pengawa injil. Kitai mesti semampai betuai ka iya dalam samoa pengawa.
Kitai meri penyayau ngagai Kristus: Penyayau tu ukai dalam sifat kitai, respon kitai ukai ngasuh Kristus dulu (John 15: 21:17; 2 Peter 1:5-7; 3:9; 3 John 7) awak ka iya bekerja dalam pengidup kitai. Tuhan deka madah ka kitai kati deka sayau ka orang bukai lalu ari nya kitai alu nemu kati deka sayau ka Kristus. Penyayau kitai ka iya deka ngajar kitai disiplin, talok serta diau dalam pengelurus.
Kitai deka matang dalam Kristus: laban samoa penusah kitai udah disaup serta Allah Taala udah semak enggau kitai, lalu kitai deka nyadi semakin matang secara rohani kitai, Kristus deka datai dalam pengidup kitai enti kitai kena penusah lalu iya deka nyaup kitai. Nya alai kenyau ari tu kitai patut makin matang agi dalam Kristus. Kitai deka ngubah pendiau ulah kitai nitih ka teladan Kristus. Besabar serta ngarap ka pengasih Allah Taala, baka Abraham ti arap ka iya. Tu meh kabuah kitai nyadi murid Kristus awak ka kitai tau besai dalam iya. Kitai deka nyadi makin talok ka iya.
Kitai udah meda nama utai ti pemadu manah ti udah digaga Kristus ka kitai. Kitai meda pengaga ati (James 1:2-4) serta pengarap (Hebrew 6:18-19) ti udah di beri ka kitai. Tu meh asas pengidup. Nadai pengarap kitai enda ulih idup enggau manah, laban kitai deka nganggap penemu diri empu nya ulih lebih ari samoa utai alu kitai enda ulih nerima penyelamat dalam pengidup kitai. Pengarap tu ulih meransang kitai kena kitai tumboh besai dalam roh serta dalam pendiau runding penemu kitai. Dalam pengidup tu, kitai belajar; lalu, enti kitai belajar, kitai deka bepenemu; lalu, enti kitai bepenemu, pendiau kitai deka berubah makin sahari makin deka nyembah Kristus, lalu kitai udah nemu nama utai di gaga iya dalam pengidup kitai lebih ari dunya tu. Kitai mesti nemu kitai tu mansang laban Allah Taala udah begulai enggau kitai tang ukai kategal kitai empu deka. Kitai deka semampai ingat nama batang pengarap kitai.
Kati deka ngasoh ati semak agi enggau Tuhan serta ngaga kaul ti manah enggau Tuhan!
Katerubah Peter bejako pasal pemaroh ati, iya nya entara jalai asai ati diri empu deka meransang diri semak enggau Kristus, nerima utai diajar, ngasai ka pemansang diri dalam penalok. Dua iti jalai ti paling manah kena kitai meransang diri empu iya nya besambiang ati diri serta maca Bup Kudus tauka begulai enggau pangan diri belajar ka Bup Kudus. Peter madah ka kitai patut enggau ati ti baruh enggau diri sama diri awak ka kitai ulih ngelaie pengasih Allah Taala, serta ukai ngelaban nama utai deka Tuhan. Nya ka-dua iya – ko iya, kitai patut maroh ka ati diri, ukai samina ngagai orang, tang ngagai Allah Taala mega. Mudah aja utai tu ka bendar iya. Tu meh berkat nyadi Kristen serta diau dalam gerija iya, bala Kristen enggau gerija iya nyadi mansang, ukai ari penyampau, iya ka penting sekali iya nya – nyadi murid Kristus, iya nya arap ka iya, belajar ka diri empu, serta makin mansang ka penemu diri ba Tuhan, alu mai pengidup nyadi penyembah.
Kati aku deka ngiga masa begulai enggau Tuhan awak ka aku nyadi orang Kristen ti talok serta matang dalam Kristen?
Tu bisi Sembilan iti runding kena nunjuk ka jalai ti betul:
A. TUJU: Peda dini alai nuan secara rohani (Kerja Rasul 22:8-10; Pilipi 2:13) lalu nentu ka tunga kini nuan deka udah tu. Lalu, ngaga tuju diri empu, serta nemu nama TUJUAN nuan. Tuju nuan iya nya nuan deka penoh dalam pengarap Kristus (Kolosi 1:28) tauka ngasoh diri empu matang dalam Kristen, orang ti nunda ka teladan pengawa Kristus (Epesus 4:13). Dini alai nuan secara rohani serta kini ka penunga nuan udah tu? Ukai samina kini penunga nuan ka bejalai tang kini penunga nuan ti di kangau asoh Allah Taala?
B. PROSES: deka nemu nama proses iya (Masmor 16:11; 73:28; Jako Dalam 16:9; Hebrew 11:1-6) ti deka bekerja. Iya ukai ulih dikerja ka nuan semalaman, nuan enda ulih nyingkau botol ba atas sadau enti nuan samina duduk aja. Proses tu meh ka meransang kitai kena mansang tuai dalam runding Kristen. Tu meh pejalai nuan serta endur utai deka di tuju nuan. Nuan deka datai ngagai utai di tuju nuan enti nuan meri masa belajar ka Bup Kudus ka diri empu serta bekaul enggau Tuhan. Pejalai tu meh ti paling penting, makin jauh kitai bejalai makin mayoh agi utai temu kitai lalu kitai deka belajar ari samoa utai ti udah dipeda kitai lalu dia kitai lalu makin tegap dalam pengarap serta mansang tuai dalam Kristus.
C. RANCANG: Rancang dulu (Isaiah 26:3; Mark 1:35) utai tu enda segera alu nyadi. Nuan deka merancang dulu nama utai deka digaga nuan. Nuan deka nyedia jadual kena nuan belajar ka Bup Kudus tauka nuan meli jadual belajar nya ari kedai bup Kristen tauka maya ari minggu nuan ngator nama utai deka dibaca nuan dalam masa tujuh ari ti ka datai. Nengah jalai tu nuan ulih ngator manah agi masa nuan kena belajar, enti tumu nuan udah nyedia ka utai deka di pelajar, nuan enda muai masa diri empu. Nuan ulih nguna jadual maca Bup Kudus, ngiga bup ti manah ngajar pasal Kristen, tauka ngiga artikal ba blog tu kena nuan nambah penemu nuan, lalu anang kalu jampat ka nemu samoa utai laban nya ulih ngasoh nuan enda focus enggau tuju pelajar nuan.
D. ISI BUP KUDUS: simpan maya utai udah di pelajar nuan dalam bup nota (Masmor 16:8-11). Sebulan nuan belajar ka Epistola. Nuan deka ngabis ka masa sebulan tauka dua bulan kena maca bup Penyanggup Lama, i.e 1 Samuel. Udah nya berengkah maca Penyanggup Baru kena nuan belajar ka doktrin baka ba bup Rome. Udah nya pulai baru gak ngagai Penyanggup Lama maca ari bup bala Nabi baka bup Joel. Enti ulih dalam masa setaun tauka dua taun tembu ka nuan maca samoa utai dalam Bup Kudus nya enggau nama reti iya. Tulis kita ba nota kita nama utai udah di baca kita ti udah ditemu kita reti iya. Anang semampai maca ba siti bup aja, baka ba Epistola, anang ninggal ka baca ba Penyanggup Lama. Nuan deka Tusah mereti ka bup Penyanggup Baru enti enda maca bup Penyanggup Lama! Anang ngena jadual ka sama baka ti udah enti udah tembu maca betaun-taun. Ubah ka jadual nya, uji utai ka baru kenya mega bup Kristen bukai ti dibaca nuan. Campur-campur ka utai pelajar nuan dalam jadual nya. Makin suah kita maca renggat ka sama ninting ari makin nemu agi nuan reti jako iya.
E. FOKUS: ingat ka nama tuju nuan maca nya nyadi ka fokus nuan lalu nuan deka tuai dalam runding (Masmor 119:130; John 4:23-24; 15), ambi tu nyadi batang pengawa nuan. Awak Kristus ngubah nuan ari jako Iya. PERANGAI tu meh penting. Nuan mesti bepun ari perangai ti manah! Nuan deka bekaul enggau Tuhan ti KUDUS!!! Perati ka amat-amat jako ajar dalam Bup Kudus lalu ngiga reti iya tu ulih ngasoh nuan fokus. Manah iya nuan tulis dalam nota, nanya soalan lalu nanya bala pengajar tauka nuan email ka aku enti utai tanya nuan nya peribadi. Fokus aja anang kalu maioh utai baca asal nuan paham reti iya baru nuan mindah renggat bukai.
F. BAHAN: ngiga bahan bacaan ti manah, lalu diatu nuan deka meli Bup Kudus (Epesus 4:1-3) kena nuan belajar enggau bendar. Ngiga jako dalam Bup Kudus ka senang di temu nuan. Diatu aku ngena NIV (“New International Version” Jako Inggeris), Al-Kitab (Indonesia) tauka NKJV (“New King James’s Version” Jako Inggeris) enggau Bup Kudus basa Iban kena aku belajar lebih dalam agi. Nuan milih kadiri empu ne bagi utai deka di baca nuan, i.e baka pasal jako ajar, penginjil, enggau macham utai bukai agi. Tulis nama utai udah pelajar nuan lalu enggau utai tanya nuan tulis dalam nota.
G. ENDUR: Ngiga endur sunyi (Luke 5:16) kena nuan belajar awak nuan enda kena kacau. Diau dalam bilik, tutup pintu, tutup tv enggau radio, kemas meja enggau manah, hp beri enda memunyi, simpan mayau dalam bilik mandi – nama aja meh janji sunyi. Ulih nuan numpu ka perhatian ngagai Tuhan. Nuan deka betemu enggau Tuhan.
H. MASA: ngiga masa ti manah (Epesus 2:18). Pilih masa maya nuan dalam pendiau ti segar enda ngantuk. Beri meh pediau nuan ti paling manah ngagai Tuhan! Atur manah brapa minit nuan besampi lalu berapa minit nuan belajar. Anang maksa roh nuan ngereja ka utai kelalu maioh! Enti nuan tusah ka fokus baka aku, anang kelalu ngereja ka pengawa besampi enggau maca Bup Kudus. Tauka ka ba pagi baca nuan ba Penyanggup Lama, renggat ba Penyanggup Baru baca nuan udah makai tengah ari, lalu malam maca nota ti udah di tulis nuan kena nuan ingat ka utai ti udah di pelajar nuan serta nuan deka ngaga sampi pinta kadiri empu sebedau tinduk malam. Ingat kemaya nuan ngereja pengawa nuan dalam pendiau Kudus, lalu meri awak nya ngagai Allah Taala aja dalam runding enggau dalam ati nuan. Enti nuan nunda ka jadual ka gaga nuan empu munyi ti di ajar aku ka nuan tadi, nuan deka bisi masa bekaul enggau Kristus. Rancangan nuan nya deka besai tuai dalam pengarap serta nambah penalok ngagai Allah Taala.
I. BEKUNSI: nama utai udah di pelajar nuan (Masmor 55:14; Matthew 18:20; Rome 12; 2 Korint 12:18) nuan mega belajar ari ngereja pengawa Tuhan serta ari bekunsi. Nama utai temu nuan ari Allah Taala ukai enggi nuan aja, tang nuan deka bekunsi ka iya ngagai bala orang bukai, nya alu nyadi pemeri nuan ngagai orang, pemeri nuan nya enda nemu abis laban orang nya deka nitih Kristus alu semampai deka belajar enggau bekunsi enggau nuan. Ati ti endang deka ngereja iya, ati ti deka di ajar, serta ti bendar deka nyadi murid Jesus aja nerima berkat ari iya.
Ari sembilan iti utai runding di atas, enti nuan nitih ka pendiau Kristus lalu nuan deka nunda ka teladan ti dipadah iya ka nuan. Ari utai pelajar nuan lalu bebuah utai ka manah dalam pendiau roh nuan lalu ulih meransang orang bukai laban nuan udah nyadi ka contoh kati pendiau murid Kristus bisi ba nuan. Nuan enda ulih ngajar orang enti nuan empu enda ngereja ka pengawa ti di asoh Tuhan. Nuan udah di kangau Tuhan ngereja pengawa iya, ukai samina jako ba mulut aja. Siko orang enda patut pikir deka makai aja awak ka iya enda berasai lapar, iya patut nyedia ka dulu utai ka di panduk iya, lalu lauk deka di panduk, nya baru iya lalu makai iya! Nemu nuan reti utai ko aku? Orang Kristen ti amat talok deka meransang diri empu mansang dalam Tuhan, bala gerija deka nguna renggat jako dalam Bup Kudus kena ngangau Tuhan enggau pemendar ati, lalu nguna jako tuhan nyadi ka teladan dalam pengidup.
Tu bisi jalai di beri aku di baruh tu kati deka nguna utai udah di pelajar nuan
A. Nuan enda ulih ngasai ka Tuhan dalam pengidup nuan enti enda ngereja ka utai di asoh iya serta ngubah pendiau diri lalu nitih ka utai ti di ajar iya. Belajar awak ka Roh Kudus nguna tuboh nuan ngereja pengawa iya. Jadi ka Kristus ketuai dalam pengidup nuan awak nuan arap ka iya.
B. Nuan deka muai samoa sifat jai nuan lalu ubah nuan, i.e “aku enda kala berandau enggau orang udah tembu sambiang mass di gerija, diatu aku berubah lalu betanya sapa aja, baik tuai tauka biak endang sama tau di tanya, aku muai pendiau aku ti sumbong lalu ngubah nyadi endang di ajar Jesus ka aku.”
C. Kadang nuan bisi meda nama utai udah dipelajar nuan dalam Bup Kudus lalu nuan secara automatik alu ngereja ka iya, lalu nuan deka bulih macham jawapan ari utai tanya nuan. Tuhan deka nyaut sampi nuan mega.
D. Bekerja pengawa Tuhan enggau ati lurus, enda ngelakar. Anang datai sembiang deka ngiga nama aja, yang penting datai enggau ati ti amat deka ngiga Tuhan.
Penutup ajar:
Mayoh endar cara kena belajar ka Bup Kudus enggau manah. Nadai jalai bukai ka ‘paling manah’, nya endang udah patut dikereja kitai. Mayoh orang Kristen enti datai sambiang ninga jako ajar aja meh maya sida iya belajar baka “on & off” button. Nama ari minggu baru “on” Jesus dalam pengidup iya, udah nya enam ari “off” Jesus dalam pengidup sida iya (contoh). Tu ukai jalai ti bendar kena kitai mansang dalam Kristus. Nuan enda ulih mansang tuai dalam runding enti nuan samina buruk enda ngereja ka pengawa iya. Enti deka mansang dalam Kristen, kitai deka nemu Jako Allah Taala kadiri empu nengah cara belajar. Kitai ngereja ka sambiang, kerja keras, disiplin diri empu, fokus, guna ka utai udah dipelajar nuan, enggau mayoh ka agi besampi!
Simpan tu dalam ati: Saup aku Tuhan kena aku ingat, Jesus, nadai utai enda ulih di kerja ka tua saritu… “Aku bisi pengering kena nangkup samoa macham utai ulih kuasa ti diberi Kristus ngagai aku” (Pilipi 4:13)
Ingat tu, Kristus sayau ka nuan, lalu iya deka nuan meri tuboh nuan enggau penoh ati. Iya meh jalai ti bendar, kitai mesti bisi Iya dalam pengidup serta pendiau idup kitai ti meruan dalam Iya, ukai utai deka ati kitai patut nyadi raja dalam idup kitai.
“Barang sapa ti nadai Roh Kudus enda ulih nyambut pemeri ti datai ari Roh Allah Taala. Sida endang enda ulih mereti ka utai nya. Utai nya nadai guna ba iya. Laban reti utai nya samina tau ditemu ulih tulong Roh Kudus aja. Tang barang sapa ti ngembuan Roh Kudus ulih ngabas guna genap bengkah utai, tang nadai siko orang ti ulih bechara ka iya.” (1 Korint 2:14-15)
Ayat kena kita nyadi murid Kristus serta kena kita ngajar orang bukai perintah Allah Taala:
Jako Dalam 18:24; Matthew 7:18-24; 10:1-42; 19:28-30; 28:16-20; Mark 1-5; 1:35; 2:12; Luke 9:23-25; 48; Luke 14:26-27, John 8:31; 12:20-26; John 14; 15; 1 John 5:3; Rome 12; 1 Korint 3:5-11; 12; Galatia 6:1-10; 2 Timoti 2:7; 1 Peter 3:15.
No comments:
Post a Comment