Tuhan, Roh Kudus nuan ti diau dalam aku, minta nuan bekerja ngiring roh aku ngajar anembiak nuan ba dunya tu. Terima kasih ka penyaup nuan Tuhan, berkat kuasa enggau mulia enggi nuan belama iya, dalam nama Tuhan Jesus aku udah besampi.
Aku meri tabi basa ngagai kita bala menyadi dalam Kristus. Sekali agi aku nyerah ka jako ajar aku tu betuai ka Tuhan kitai ti pengasih enggau ti bekuasa iya nya Jesus Kristus. Aku deka bekunsi enggau bala menyadi dalam Kristus:
Orang ti enda pecaya:
“Sida enda arap, laban runding sida mengkang dibalut petang ulih petara ti jai di dunya tu. Iya enda ngasoh sida meda penampak ti manchar atas sida, penampak ti datai ari Berita Manah pasal mulia Kristus, iya ti sama sabaka enggau Allah Taala.” 2 Korint 4:4
Ba ayat nya tadi kitai berati ka leka jako “petara ti jai”, nemu kita nama reti utai ko Paul tu ngagai bala ba Korint? Iya nya madah ka kitai ti agi deka bepanggai enggau reta dunya lalu enggai kitai nerima Jesus dalam pengidup kategal ensepi diri nyau udah kalu success lalu ngumbai diri empu enda beguna ka iya. Bisi orang nya nganggap duit tu petara sida iya. Lalu enggau duit tu meh datai penyai enti kitai salah nguna ka iya. Nyadi aku empu fokus jako tu senentang duit ti mai ulah kitai rangka deka ngulih ka utai tauka amu serta sumbong. Kitai ngeso ka pemisi kitai tang ba moa Allah Taala utai nya baka kertas jamban aja nilai iya. “Pakai buang” aja… reta nya ila enda ulih meli ‘tiket’ kena iya empu tama serega.
Ko tuhan madah ngagai orang ka ngelala iya, “samoa orang ti besembiang nyebut nama Tuhan deka bulih pengidup ti baru”. Rome 10:13 reti iya nya tuhan deka nyelamat ka orang ti arap ka iya ari tama neraka. Besembiang tu meh reta tengkira orang Kristen. Enggau ati amat nyerah ngagai iya. Iya mega utai ti nagang kitai ari ngaga utai ka enda temu tuku.
Orang ke bepetara ka duit deka di sumpah tuhan munyi tu,”Lari ari aku kita ti kena sumpah Allah Taala! Ngagai api ti meruan belama, ti endang udah disedia ka Sitan enggau ka bala melikat iya!” Matthew 25:41
Samoa orang ka bempu ka reta dunya nguna enggau jalai salah deka di tinggang dosa. Mayoh orang ka diatu kenya. Laban endang perlu gak duit tu dalam pengidup. Samina iya kadang di guna ba jalai ti salah. Sema ka jako, duit $1 endang diau dalam gerija duit $100 baru diau ba pub. Tu maksud aku iya nya aku meda orang nguna duit nya enggau jalai ti jai. “Kati orang bulih penguntong enti iya bempu samoa dunya, tang nyawa iya lenyau? Tentu enda!” Mark 8:36
Enti kitai gila reta kitai deka mai pemati kitai empu, “Orang ti bepanggai ba pengaya deka laboh baka daun kayu ti narok, tang orang ti lurus deka galak baka daun kayu ti lekat ba dan.” Jako Dalam 11:28
Nyadi tu meh utai ka nyata ba kitai enti kitai udah kalu kaya kitai deka nyadi sumbong. Tang ukai tu ka deka Allah Taala ba kitai. Iya ngasoh kitai, “diau lurus, rindu ka diri sama diri, lalu betuai ka Allah Taala enggau ati ti baroh.” Mikah 6:8
Tujoh penyalah ti ngasoh semengat mati
1. Penyumbong enda nagang diri
2. Bam rangka
3. Ingin ka utai kamah
4. Begedi enggau kapapas
5. Rangka makai kelalu enda nagang diri
6. Pedis ati ringat, enda enggau patut
7. Ati ngelusu, enggai nguji
Tujoh berkat ti ngidup ka samengat
1. Ngemaroh ka diri (Luke 18:9-14)
2. Meri enggau pengabis ati (Luke 19:1-10)
3. Ati ti tuchi (Luke 7:36-50)
4. Ati rindu (1 John 3:10-12)
5. Nagang diri (Luke 6:44-45)
6. Penyimat (Luke 6:29)
7. Pengerajin (Matthew 25:14-30)
Nyadi bisi tujoh mega kerja pengasih ti patut kena ngidup ka semengat
1. Ngubah orang ari penyalah sida iya (James 5:19-20)
2. Ngajar orang ti enda nemu
3. Ngajar orang ti kakang ati
4. Ngelantang ka samoa orang ti tusah
5. Nat ka penusah leboh kitai kena keduan orang (Matthew 5:38-42)
6. Ngampun orang ti salah ngelaban kitai (Luke 17:3-4)
7. Besembiang ka orang ti idup enggau ti mati
Naka tu dulu jako ajar aku senentang penyumbong, pengerangka serta beguna ka duit enggau jalai ti salah. Sama-sama kitai berati ka pendiau diri dalam Kristus. Amen.
No comments:
Post a Comment