Kena ku ngepun ka jako ajar tu aku deka bekunsi enggau kita genteran tu kena kitai nyadi ka teladan dalam pengidup, "Nyadi utai tiga bengkah tu agi mengkang: pengarap, pengadang, enggau pengerindu; lalu iya ti pemadu besai nya pengerindu." - 1 Korint 13:13
Kenyau kitai baru ada kitai enda mereti nama utai kangau orang pengidup. Lalu udah kitai besai kitai nanya diri empu utai tu, “Sapa meri pengidup ka aku?” Ko Bup Kudus madah kitai dalam genteran jako, iya madah
Jesus ka meri kitai pengidup! “ulih iya (Jesus) Allah Taala ngaga samoa utai; nadai siti utai ti udah digaga tau nyadi enti enda ulih iya.” – John 1:3
“Sapa ngaga dunya endur aku diau kemaya ari tu?”
Bup Kudus madah Jesus ngaga samoa utai nya! “Laban ulih iya (Jesus) Allah Taala ngaga samoa utai, di serega enggau di dunya; utai dipeda enggau ti enda ulih dipeda, nyengkaum kuasa bala antu, bala rajah, bala pemerintah enggau samoa kuasa sida. Allah Taala ngaga samoa utai ulih iya enggau ka iya.” – Kolosi 1:16
“Sapa nemu nama utai kala pansut ari mulut serta runding kita ti dalam ati?”
Bup Kudus madah Jesus nemu samoa utai nya! “Sebedau aku mansut jako, nuan udah nemu utai ti deka disebut aku.” – Masmor 139:4
“Sapa nemu aku tu sunyi seilu-ilu serta takut kadiri? Sapa nemu nama utai di asai nuan?”
Bup Kudus madah Jesus nemu nama utai ditapi kita! “Nadai utai ti ulih di pelalai ka ari Allah Taala. Samoa utai di dunya tu ayan lalu nyata dipeda iya (Jesus); nya alai ngagai iya kitai patut nyerah ka diri” – Hebrew 4:13
“Sapa nemu samoa dosa ti udah di gaga kitai?”
Munoh orang, beleman enggau indu ti ukai bini kitai, kepapas, bemanang, sumbong, angkun ka utai orang, enda arap, benci, beleman enggau sama penempa, jako kamah, beleman enggau menyadi diri empu, bula ka orang, enchuri, pengirup, nyembah engkeramba, begedi ka apai indai, jako jai, enggau orang beburong, enda peduli ka orang bukai enggau mayoh macham utai dosa bukai ti di gaga kitai. Bup Kudus madah Jesus nemu samoa nya! Jesus nemu utai ti dalam ati sida, nya alai ko iya,”nama kebuah kita beperagam ka utai ti jai baka nya?” – Matthew 9:4
“Sapa deka ka kitai begulai enggau iya dalam serega?”
Bup Kudus madah Jesus deka kitai begulai enggau iya di serega! “Leboh munyi panjong ti meri ukom, munyi nyawa pengulu melikat, munyi terumpit Allah Taala, Tuhan empu deka nurun ari serega leboh nya ila. Barang sapa ti udah mati sereta arap ka Krstus deka angkat dulu; udah nya kitai ti agi idup leboh maya nya deka digempuru ka enggau sida di remang, betemu enggau Tuhan di langit. Nya alai kitai deka selalu enggau Tuhan.” 1 Tesalonika 4:16-17
“Sapa enggai meda kitai tama ke neraka?”
Bup Kudus madah ka Jesus enggai meda kitai tama neraka! “Tuhan enda lubah ngereja utai ti udah disemaya iya, munyi ko sekeda runding orang Tang iya udah liat ati enggau kita, laban iya endang enggai ngerusak sebarang orang, tang iya deka ka samoa orang ngesal sereta ngelengka ka dosa diri.” – 2 Peter 3:9
“Sapa kelalu balat rindu ka kita lalu ngasoh iya ninggal ka perintah iya di serega kena nyelamat ka kita?”
Bup Kudus madah Jesus ngereja ka samoa utai nya! “Laban Allah Taala (Apai) udah balat rindu ka dunya (Kitai) nya kebuah iya meri Anak Tunggal iya (Tuhan Allah Anak, Jesus), awak ka genap iko orang ti arap (enggau penoh pengarap sereta pecaya) ka iya enda mati (dalam danau api), tang tau bulih pengidup ti meruan (dalam serega)” – John 3:16
“Sapa orang ti penoh enggau penyayau sereta pengerindu iya ngelak ka orang munoh iya lalu darah iya ti pansut nyadi genselan penebus dosa kitai?”
Bup Kudus madah Jesus sanggup! “ulih darah iya kitai ditebus, reti nya, samoa penyalah kitai di-ampun magang.” Kolosi 1:14
“Sapa sayau ka kitai sampai iya sanggup angkat baru ari mati lalu pulai ka serega?”
Bup Kudus madah samina Jesus aja! “udah iya (Jesus) nyebut nya, iya lalu dibai niki ka serega lalu sida (anak murid Jesus) ngemata ka iya; udah nya remang lalu ngelindong iya ari sida.” – Kerja Rasul 1:9
“Sapa sayau ka kitai sampai iya ngaga ka kitai istana ti besai ba serega din ila endur kitai diau?”
Bup Kudus madah samina Jesus aja! Ko Jesus…”Dalam rumah Apai aku mayoh bilik endor diau, lalu aku deka nyendia ka endor alai kita. Aku enda nusoi ka kita ngapa, enti utai nya enda nyadi baka nya. Lalu udah aku kin nyendia endor ka kita. Aku deka datai baru lalu mai kita ngagai aku, ngambi ka kita diau bgulai enggau aku.” – John 14:2-3
“Sapa deka ngasoh kitai ngaku serta ngesal ati ka dosa kitai ba iya…lalu kitai deka ngubah idup kitai betuai ka iya?”
Bup Kudus madah Jesus deka kitai nyesal penyalah diri! Ko Jesus…”Aku ti datai ukai deka ngangau ka orang ti lurus, tang orang ti bedosa ngesal ati ka dosa diri.” – Luke 5:32
Munyi ditulis dalam Bup Kudus…”Nadai siko mensia ti lurus.” Rome 3:10
“Sapa deka datai dalam ati kitai enti kitai ngangau ka iya?”
Jesus deka tama dalam ati kitai! “Enti kita ngaku enggau mulut kita, ‘Jesus endang Tuhan’, lalu arap enggau ati kita, Allah Taala udah ngangkat ka iya ari mati, kita deka bulih pengidup ti baru.” Rome 10:9
Lalu enti kitai udah ngereja ka nya…utai di baruh tu deka nyadi
“Sapa sayau ka kita sampai iya deka bekunsi samoa reta, perintah enggau kuasa iya enggau kita?”
Bup Kudus madah Jesus sanggup! “Pangan ti di-kerindu aku, kitai diatu anak Allah Taala, tang penyadi kitai dudi hari apin ditemu kitai. Tang kitai nemu tu: leboh Kristus datai baru kitai deka nyadi baka iya, laban kitai deka betunga moa enggau iya.” 1 John 3:2
“Sapa sayau ka kitai lalu iya ngasoh bala melikat ngintu kitai ari kuasa pemetang?”
Bup Kudus madah Jesus ngasoh sida melikat nya! “Enti pia, nama reti sida melikat nya? Sida nya sama ari Roh Kudus. Sida nya betuai ka Allah Taala lalu di-asoh iya nyaup sida ti deka bulih pengidup ti baru.” Hebrew 1:14
“Sapa deka ka kitai begulai enggau iya kemaya ia datai baru ila, lalu kitai deka enggau iya merintah ba dunya tu enggau iya?”
Bup Kudus madah Jesus deka! “ Udah nya aku meda serega tebuka, lalu dia bisi siko kuda ti burak. Nyadi penumpang iya dikumbai Talok enggau Amat; iya ngukum enggau beperang ngena pengelurus…Balu soldadu serega nitih ka iya, nepan atas kuda ti burak sereta ngena gari linin ti burak beresi…Ba baju panjai iya enggau ba senentang punggong iya, bisi ditulis nama: ‘Rajah ari atas samoa rajah enggau Tuhan ti atas samoa pemerintah.” – Pemandang 19:11; 14; 16
“Sapa sayau kitai lalu iya deka mai kitai merintah sepiak iya belama-lama iya?”
Bup Kudus madah Jesus deka! “Nuan udah ngaga sida nyadi perintah imam gawa ka Allah Taala, lalu nyadi rajah merintah ba dunya.” – Pemandang 5:10
Tu meh sapa Jesus Kristus
“Aku tu Pun enggau ujong, pia ko Tuhan Allah Taala ti Pemadu Bekuasa, iya ti endang bisi, ti endang udah enggau deka datai.” Pemandang 1:8
No comments:
Post a Comment